NUN KAIHRUAITU ATÂN

Eng anga hmeltha, ngo leh duhawm pawh ni mahla, i hlimthlâ erawh a dum zel tho vang;
          Chuvângin mi zawng zawng tilâwm turin i tha famkim lo a ni tih inhria la, a tha thei ang berin nung ang che.

I nalhin i mawi a, i hmêl a tha a ni mai thei. Hna sâng vuanin sum tam tak i nei a, i duh leh ît zâwng chu i hlah lo a ni thei. Eng hunah nge i thih dâwn tih erawh i hre si lo. Thlânmuala i zâlna tur tlâwmngai taka laitute chu eng vaka i ngaih ngai lohte, i in leh lo rawn chuangkai zen zen lote an ni ngei ang;
          Tu chungah mah inchhuang ngai suh ang che.

Tunlai mîl ang zêla awm hi a that rualin, chhûngkaw khawsak dinhmun mîla awm hi a zahawm zâwk a;
          In chhûngkaw khawsak dinhmun hrechiang ang che.

Chanchin tha lo hi khawvêla Mechanic thiam ber pawhin an siam tha thei tawh lova;
          Neih loh hrâm tum ang che.

I thuam, i incheina chu a lo mawi a ni thei e. Mahse, mi ruala titi i vawrh chhuah ve thiam loha, mi nuih ruala i nuih ve theih loh chuan i mawi thlâwn mai a ni;
          I sum lâkluh milin inchei thin ang che.

'Neih hmanga thangchhuah' thinte hnênah chuan 'Nun hmanga thangchhuah hlutzia' kawhhmuh la;
          'Pâwla nghehna thuthlung' thlahleltute hnênah chuan 'Nun thatnathuthlung' chungnun zâwk zia lantîr thinang che.

Eng ang pawhin i thiamna chu sâng mahse, 'Naktûk' hi chu i hmu phâk ngai chuang lovang;
          I 'Naktûk hun' atân hun duhawm i neih theih nan i 'Vawiin hun' hi hmang tha ang che.

Mahni intodelh mi nih tum la, thilpêk dawngtu ni lovin, a petu nih tum zâwk thin ang che;
          Englo lâk aiin pêkin lukhâwng a nei zâwk si a.

Eng anga tam thian tha pawh nei mahla thihna kotlâng i thlen meuh chuan, nangmah bâkin i liam chuang lovang;
          I thlarau nun kha ngaihtuah fo thin ang che.

Kan hma hunte hi lo hre lâwk ni ila chuan hreawm kan tawrh kher a ngai lovang a, hlawhchham ta te pawh hi an awm ka ring lo;
          Harsatnate hi mitin tâna siam a ni a, vanduai bîk avânga tawng kan ni lo va, kan hlutzia tehna mai zâwk a ni.

Mihring hian beisei tûr nei tawh lova a in hriat tawh chuan nung reng chungin a thi mêk tihna a ni. Beiseina hi Mihringte min tichak a, min tichheltu a ni. Chutih rual chuan, beisei tûr dik beisei erawh a hlu leh zual;
          Pathian beisei rawh, amahah chuan damna a awm si a.

Nih loh ngamna hmangin nihna lâwmtute chungah i thla zâr la;
          'Tamna' aiin 'Takna' thlang ngam zâwk ang che.

Midangte beiseina tihchhiatsaktu ni ngai suh ang che;
          An neih chhun pawh a ni thei.

Tumah mahni chauhvin an nung chhuak zo ngai lo tih hre reng la. Nangmah tanpuitute hnênah lâwmthu sawi theihna thinlung pû la;
          I tân an hlutzia hrilh hreh suh ang che.

Nitin eizawnga hnathawkte ngaihlûin zah thiam ang che;
          An hnathawh eng ang pawha nêp angin lang mah se.

'Tisa model' aiin 'Thinlung model' ngaipawimawh zâwk la, 'En vawng vawng tlâk' nih ai chuan 'Entawn tlâk' nih tum zâwk ang che;
          Pâwnlam lan sân chu vawikhat mitkhap atân chauh a ni a, chhûngril mawina erawh chu damchhûng daih a ni si a.

Pangpâr hian a nihna ang ang zahpui lo leh thup lova a rawn pâr chhuahpui thin avâng hian 'a mawi' kan ti thin. Hringfâte zîngah hian 'mahni' nihna thup a, a dera langchhuak thinte hi 'an mawi ngai lo';
          I nihna kha zahpui ngai suh ang che.

          Mihring nun hlutna sâng ber leh, mihring damchhan hlu ber chu, kan mihringpuite tâna tangkâina nei zâwnga Pathian hriatna nunchhuahpui hi a ni.

HLAWNCHHING

HRINGNUN GAME

          Thu leh hla thiam tak nih hi ka thil châk berte zinga mi a ni. Nasa taka ka inzir chung pawhin ka hlawhchham leh fo thin. Ka chak lohna lai tak nimahse, bânsan tumna erawh ka nei ngailo. Thu leh hla thiam tak takte leh mithiam tak takte karah, Themtlêng tê zâwk anga inrawlh ve chhên hi ka bânsan hun chuan, ka lei taksa chu vaivutah a kir leh ta tihna a ni ang! Chuvangin, ka damlai hi chuan Themtlêng tê zâwkah ka tang reng mai nânge!

          He ka 'Hringnun Khêl Mual' zau tak maiah hian, keimah chauhvin ka 'Hringnun Game' chu ka khêl thin a. Mahni chauhva khelh chi, (Individual Game) a nih avangin lamtang/pawl neih a rem lo a ni. Nuam tih riau chângte chu awm ve bawk thin mahse, nuam aiin hreawm a tam zawk fova. Beidawnnain min tuam châng phei chuan, "Ka hlawhchham mai ang a...," tih te ngaihtuahin, bânsan mai te ka duh rum rum thin. Mahse, thil theih a ni silo. Chawlhlâwk a awm ve thei lova, bânsan theih a ni lova, engtiklai pawha tan mar pât a ngai zawk si a. Game hahthlâk tak zawng a lo ni! Ka beidawn zual châng phei chuan, kir leh mai châkin hnunglam ka hawi fo thin a, Aigupta sabêl ka ngai zual thin. Mahse, ka han thlir chian chuan, ka kalsan tâk thilte kha an lo hluiin an lo chhe tawh a, pawm leh châkawmin an tharlam tawh si lo. Ka kalsan tâk ka hlimna thinte pawh kha, beidawnna belhchhahtu mai an lo ni tawh si. Tin, ka han hawikual vel a, tuilâirapa awm mêkte ka han hmu a, an zinga chên ve châkawm khawpa nun hlimawm tak nei an nih loh avangin, hmalam ka pan a ngai a ni. He, "Kir leh nun" hi chuan ram ropui min thlen dawn lo tih ka hriat avangin hmalam ka pan hrâm hrâm a ni. Ka hmalam ka han thlir a, kawng bumboh tak piaha kawng zâwl nuam tak chu mittui far zawih zawih chunga thlirin, thlan tla zawih zawih chungin ka pan hrâm hrâm a ni. Chutah chuan hahdamna a awm tih ka hria a, beiseina tlêmtê ka la neih hi thanlen tir chungin chu hmun chu thlen hlân nghâkhlel takin ka pan hrâm hrâm a ni. Chu hmun ka thlen hun chuan, lungngaihna, beidawnna leh harsatna ka tawrhte avanga ka thinlung kehsawm chu "HNEHNA HLADO" ka chham khum thei dawn a ni tih ka hriat avangin. Chu hmun chu engtikah tak thleng thei ang i maw?

          Ni e, he hringnun game hi zawng, game hahthlâk tak zawng a lo ni! A 'fair lo' tih châng tam tak ka nei thin a, ka hnual leh rawih thin. Mahse, "Hnehna Hlado" chham thei tur chuan, 'Fair lo tak' atang pawhin 'Fair thei tura' kan 'Fight' ngam a tul si! Kan fight loh chuan hnehin kan awm dawn si a. Tlanchhiat a rem lo a ni. Reilotê hlimna hlawhchhuak tur pawhin hreawmna tam tak hmachhawna, paltlang a ngai fo thin. Kan damkhawchhuah ve theihna tur chuan, kan chêt chhuah ve a ngai thin. Hmuh theih loh kut kan vawn tâng tâng thin te, mamawh lote tâna kan thinlung kan hlan thin te, hrui tel lova kan inphuartirna zawng zawngte kha a vai takmeuha kan kalsan a ngai a ni; Kan chauhpuia kan thihpui hma ngei hian. Beiseina beitham tak nen pawh hian hringnun hi hmachhawn a lo har miah lo! Risk la ngam tura kan huaisen erawh a ngai ve a ni.

HLAWNCHHING