Khai le, kumin 2016 kuma ni hnuhnung ber chu kan lo thleng leh ta reng mai! Tûn atanga reilotêah hian, kumin chhûnga ka chanchin ziahna lehkhabu chu ziah zawhin a awm dâwn ta!!! A lunglênthlâkin a ngaihawm dâwn hle mai. Tih dikloh leh tihsual tam tak ka nei a, thiltihtheihna neiin keu lêt leh theih chu nise chuan a tam zâwk hi chu thaichhiain ka ziak tha leh duh ngei ang le. Kumina ka thiltih zawng zawngte kha he kumhlui rual hian a liam ve dawn a, chatuan hmun min lo thlen khalh ang a, Lal hmaah ka la dinpui dawn a ni. Ka nunhlui tâwmkâilo zet nêna intawn leh chu, ka zahna khua tiseitu lek an la ni ta ve ang. Mahse Lalpa, i felna zârah ka lungngai lovang.
Kumin 2016 kuma ka hun hman tâk zawng zawngah khân lâwmna tûr tam tak ka nei a. A hmasa berah chuan, kum bul atanga kum tâwp thlenga damna leh hriselna, malsâwmna tinrênga min vûrtu Pathian hnênah lâwmthu ka sawi a. Lalpa, ka lâwm e. Ka rinna hi fiahin a awm fo thin a. Ka hriat chian êm êm chu, nitin hian ka mamawh zual zêl reng che a ni tih hi a ni. Nang chu ka nun chhûngril leh ka chhûngkaw nun chhûngrila pawimawh ber i ni. Kum za tam tak kal tâa i thu (Pathian thu) kha vawiin thleng hian a la dik reng a ni tih hi ka thinlungah hian a chiang hle a ni.
Ka nu leh pate hnênah lâwmthu ka sawi duh bawk a. Tunah hian min la dampui mêk a, nitin hian an hmangaihna ka dawng mêk zêl a ni. Ka nu leh pate hi mi nu leh pate anga fing, lehkhathiam leh zir sâng ni lêmlo mahse, ka nitin nun min chhiarpui a, ka hma hun tûrte min chhût sak ve fo thin. Ka lo pianchhuah atanga vawiin thleng hian min hmangaihna a la danglam ngai lova, kei min hnualsuatin midang fa an awt ngai hek lo. Humsual ka dai loh nan tûk tin, zan tin min tawngtai sak thin a. An mi tawngtai sakna avânga Pathian khawngaihna dawnga tun hun thleng thei chauh hi ka ni si a! Ka nu, ka pa, ka lâwm e. In phû tâwk hlimna pêk theih cheu hi ka va duh thin tak êm! In tân hian tih theih ka nei tlêm hle mai si a! Min hmangaih zia hrechiang hle mahila, hmangaih lêt dan cheu ka thiam lo. He ka thuziak mâwltê hi ka hmangaihzia cheu lantir nân in tân ka hlân e. Ka nu, ka pa, ka hmangaih che u.
Tin, ka u leh naute chungah pawh lâwmthu sawi tûr tam tak ka nei a. Ka pa fate zîngah pawh buaipui ngai ber leh enkawl ngai ber ka ni a. Ka mualphona tur leh ka hmingchhiatna tur zawng zawngah min hliahkhuhin, ka tlâkchhamnaah min chhawmdawl a, hetiang ang u leh nau ka nei hi chu ka vannei mang e!!!
Thian tha tam tak, ka lama tang tlat mi, ka rilru min tawmpui thei ka neih avangin kumin hi ka tân chuan kum chhinchhiahtlâk a va ni tak êm! Thian thate hlutzia leh thian neih loh khawharthlâk zia pawh kumin hian ka chiang thar hle mai. Chutih mêk lai chuan, Dt 12 Oct 2016 khân ka thian kawmngeih berte zînga mi, V.Rotlâwmlova, S.Chawilung a mi chuan chatuan ramah min kalsan ta a. Ka ngaiin ka lung pawh a lêng hle mai. Ani hi ka naupan lai atanga ka thian tha, a thlum, a al ei za thin kha kan ni a. Hetia min awmloh san ta mai hi chu a hrilhhaithlâkin tawrh thiam harsa ka ti hle mai. Thianpa, ka ngai khawp mai che. He kumhlui hi chu liam mahse, nang erawh chu ka thinlungah hian i liam ve tawh ngai lovang.
Kumin hian kan chhûngkua kan damtlâng angreng hle mai a. Engemaw chânga taksa nawmloh deuh chângte chu awm ve thin bawk mahse, han inbuaipui leh inenkawl êm êm ngailo leh damdawiin luh ngai khawpa harsatna tâwk lêm lovin kumtluanin Pathian vênhimna kan chang a. Hêng hi Pathian khawngaihna liau liau a ni. Tin, kan mimal tin eizawnna leh zirna kawngah Pathian malsâwmna chhiarsên loh kan dawng a, kum duhawm tih loh rual a ni lo. Khua leh tui tha ni tûra mawhphurhna kan neih zawng zawngte kan hlen thei bawk a, Pathian hruaina vang chauh a ni. Mîte angin rinna kawngah chak vak lêmlo mahila, kan mimal tin thlarau nun pawh a tha tlâng viauin ka hria.
Ka mimal hun hman dan hrim hrimah chuan induhkhawp lohna tam tak nei mahila, kumtluanin harsatna êm êm tâwk lovin kum ka khâr thei tur hi ka lawm hle a. Kohhran huangchhûngah, thalai pawl huangchhûngahte leh khawtlângahte mawhphurhna ka neih ang angte pawh Pathian zârah ka hlen ve theih zêl a. Ka mimal eizawnna pawh chhuanawm lêmlo mahse, ka thawhchhuah ang angte Pathianin mal min sawm sak a, rualawt lutuk lovin min siam a, kan chhûngkaw tân tangkaina ka nei ve ringawt mai pawh hi ka thinlung tilawmtu a tling a ni. Kumin hian hun inanglo tak takah chêngin hringnun ka chhiar a. Lawmna nasa tak ka neih châng a awm a, lungngaihna hlimkawr ruam ka zawh chângte a awm bawk a. Beidawn rum rum chângte leh beiseina kâwl êngin min hmuah chângte a awm bawk a. Hêng ka thil hmachhawn zawng zawngte hi Pathianin ka thatna tur leh hringnun ka chhiar thiam theih nana 'a hun' min pêk a lo ni.
Kum 2016 hian hriat reng tur min hnutchhiah tam hle mai. Pathianin chhûngkua tha tak min pê a, malsâwmna tam tak min vûr a, hlimna leh lawmna chhiarsên loh min neihtîr a, kan sualnate min ngaidamin, insiamthatna hun min pê a, tûn hun min hruai thleng a, tihborala ka awm lo hi Lalpa zahngaina vang liau liau a ni.
He kum hi chelh dina he kuma chên reng mai hi duh viau mahila, hun hian chu ka duhthusâm chu min dâwnpui lovin a her liampui mêk a. Khuareiah chuan he kum pawh hi hmânlai a la chang ang a. Kumina ka hun hman dante thlir kîrin tawnmang ang maiin fiahlo riaiin ka la chhuikîr ang a, rilruah a lo la thar leh dawn a ni. Lehkha leh vaivuta thil ziahte chu khuareiah an ralin an reh leh mai thin; Kum 2016, nang erawh chu ka thinlungah ngei hian ka ziak che a, khureiah pawh i ralin i reh ve tawh ngai lovang.
Aw kum 2016, Au ding tur khawp che hian 'Aw lungkuai leh mawi' ka fah zo lo che em ni??? Auh din rual lohvin i herliam mêk chu a ni si a...
MANGTHA 2016
