TUARTU THAWNTHU NGAIHNAWM CHU

TUARTU THAWNTHU NGAIHNAWM CHU

(2018 Good Friday Quote)

                                                HC Lalramdina

Tuartu thawnthu ngaihnawm kha
Dam nân an la chhiar nawn leh fo dâwn a ni

Hun leh ni inher zêl te chuan a hmangaihna te, a thiltihtheihna te, a ropuina te, chatuan Pa a nihzia te an tilang fo va

Suihlung mâwltê mah ni ila, Isua Krista ka tân a thi a, a tho leh a ni tih ka hriatna hian, ka thinlungah beiseina thar min neihtîr țhîn.

Min hmangaih avânga min chhandam tûrin, Pa Pathianin a fapa mal neihchhun Isua Krista chu, he leiah a rawn tîr a

"Hosana Lalpa hminga lo kal chu fakin awm rawh se, chungnung berah khian Hosana"

Lei ropuinaa thuam ni lo mah se, lei lalte Lal, kan Pathian Fapa chu a ropui si a

Dâwt tinrêngin an puh a, nasa taka nghâisak ni mah se, chatuan nunna ka neih theih nân Kraws ah khenbehin a awm a, ka tân a nun a hlân a ni

Chatuan Pa, remna Lal chu a thi hlen lo va, ka tân a tho leh a, a thlarau thianghlim chu chatuan atân ka hnênah a awm reng tawh ang

Ka tlantu chu a nung tih ka hre si a,
Nakinah chuan leiah hian a lo la ding ang

                         HLAWNCHHING

CHUNGNUNG BERAH KHIAN HOSANA!

CHUNGNUNG BERAH KHIAN HOSANA! (TÛMKAU PATHIANNI) (Article)

                                                HC Lalramdina

          Vawiin, 25 March 2018 (Pathianni) hi khawvêl puma Kristiante ni pawimawh tak, 'Tûmkau Pathian Ni' (Palm Sunday) a ni  a. He Ni hi khawvêl pumah Kristiante chuan urhsûn takin an hmang țhîn a ni.

          Tûmkau Pathian Ni hi Lal Isua Jerusalema 'LAL' anga a luh Ni hriat rengna ni a ni a. Pathianni a nih bâkah, Kristiante tân ni pawimawh bîk, Lal Isua Lal a nihna puan chhuah thar lehna hun leh amah châwimâwina Ni atân hman a ni țhîn. Tin, Tûmkau Pathian Ni hi 'Hnehna nêna (Jerusalema) a luhna Ni' (Triumphal Entry) ti pawhin sawi a ni bawk.

          He Ni hi a pawimawh êm avângin, 'Chanchin Țha Bu' ziaktu palite hian an ziak țheuh a ni. (Matthaia 21:1-17, Marka 11:1-11, Luka 19:28-42, Johana 12:12-14)

A pawimawhna chhante chu :-

(1) He khawvêla a awm chhûnga vântlâng hriat khawpa langsâra Jerusalem khuaa a luh chhun a ni.

(2) Tîsaa a awm chhûnga mipui vântlâng châwimâwi a hlawh ve țum a ni.

(3) Vântlâng hriata 'LAL' a nihzia târlana a awm țum a ni.

          Matthaia chuan he hun ropui takah hian mipui zînga a tam zâwkin Lal Isua kalna tur kawngah chuan an puante an phah bâkah, thinga mi chhâwl an sât a, an phah bawk tih a sawi a (Matt 21:18). Johana chuan Jerusalem mipuiten Tûmkau kengin an hmuak a ti a (John 12:12-13). Lal Isua chu Galili ram ațangin a thilmak tih hmutu mi tam takin an rawn zui a, Jerusalem khawpuia chêng, amah ringtute'n an lo hmuak bawk a, amah rawn zuitute leh lo hmuaktute chuan rilrû hmun khatin Lal Isua chu an theih tâwkin he hunah hian an châwimâwi a ni.

          Khatih hun lai kha, rilrû suangtuahnain a han mitthla a... Lal Isua leh a zirtirte leh mipui sâng tam takte kha Jerusalem kawtthlêr lûn lai vêlah an inzui lût hum hum ang a. Tichuan, Lal Isua chuanna tûr Sabengtung no leh mipui lo kal khâwm ten an puan leh Tûmkau leh hnahchhâwl te kenga, Lal Isua Jerusalem khawpuia ropui taka lût tûr lâwma an au thâwm, "Hosana! Lalpa hminga lo kal chu fakin awm rawh se, ram lo thleng tûr, kan pa Davida ram chu châwimâwiin awm rawh se, Chungnung berah khian Hosana!," an tih ri te chuan, Jerusalem khawpui dung leh vâng chu a khâwk vêl rum rum hian ka ring țhîn. A hunlaia awm ve leh tel ve angah ka inchan a, ka lung a tilêng țhîn!

          Chutianga amah ngaisângtuten an châwimâwina chu chhunzawmin, Tûmkau/hnahchhâwl châwiin Lal Isua châwimâwina kawng zawh hi Kristiante zîngah neihzui a ni ta zêl a ni. Jerusalem chhehvêla mipui, Lal a nihzia la hre chiang tak tak lotute mahin khati khawpa an châwimâwi chuan, vawiin Tûmkau Pathianni ah hian, keini a hre chiangtu, thinlung a tihvâr tawhte hi chuan theihtâwpa châwimâwi hi kan tih ngei ngei tûr a ni.

          Lal Isua khân Jerusalem khawpui a luhna kawngah khân, Amah chawimawi tûrin mi ropui ber ber a thlang lova, A hming faka au tûrin a aw mawi mawi a thlang lo. Amah fak leh châwimâwi nâna an hmanraw hmante pawh a ropui lo khawp mai, A kalkawngah an puan te an phah a, Tûmkau an keng a, Amah fakin an au mai a ni. Hmanraw changkâng ber ber leh an ropui ber ber an thlang khâwm kher lo.

          Kan phâk ang tâwk kan fak leh kan châwimâwinaah hian Isua hi a lawm mai țhin a ni. Amah fak leh châwimâwi han tih hian zai leh lâm ringawt a huam lovang a, A Hming ropui nâna kan rawngbâwlna zawng zawng, inkhâwm, hnatlân, thilpêk, midangte țanpui, etc thlengin Isua fakna leh châwimâwina hian a huam vek a ni.

          Kan thiam ang ang leh kan phâk ang tâwka kan tih ve te hi khawngaihna avângin min pawmsak a, a lâwm a ni tih hre chungin, Lal Isua ropui nân, A hmaah kan thinlung puan phahin, kan nitin nunah 'Kristian Nun' mawi taka lan chhuahtîra nungin kan nun pumpui hi Amah châwimâwi nân i hmang ang u.

          Hemi niah chauh lo pawh hian, eng tik lai pawhin kan nun zawng zawng hian Lal Isua hi chawimawi se la. He khawvêla kan hun hman zêl tûrah hian Isuan châwimâwina te, ropuina te, Lalna te a chan theihna tûrin kan nun țheuh buatsaih thar ila. He khawvêla a lo kal laia a hmêl an hmuh ang khân keini chuan kan hmu thei tawh lo. Mahse, kan thinlungah Lal Isua Krista hi kan hmu thei a ni. Chuvângin, "Chungnung berah khian Hosana!" an tih ang khân,  keini pawhin Isua Krista hnênah châwimâwina sâng ber i hlân ang u.

                         HLAWNCHHING

THINLUNG

THINLUNG (Article)

                                                HC Lalramdina

          Mi tin mai hian thinlung kan nei țheuh va, amaherawhchu, mita hmuh theih a nih loh avâng hian eng ang takin nge mihringte nunah hian pawimawhna a neih a, eng ang chiahin nge mihringte nunah hian hna a thawh tih sawifiah thiam a har hle mai a. Mihring nun dân leh mizia, chêtzia hrang hrang ațangte hian mihring nunah hna erawh a thawk nasa hle a ni tih a lang chiang hle a ni.

          Chu thinlung chuan a neitu (Mihring) a dam chhûng hi chuan a nunah hna a thawk reng a, a hnathawhte erawh chu a neitu (Mihring) tân lo chuan, mi dangin-a va hmuhsak theih leh va hriatsak theih a ni lova. A neitu pâwn lam lanchhuah dân hrang hrang ațang tein a thinlung chhûngril hnathawh tam tak a lan theih laiin, mi țhenkhat chu an rilrû leh ngaihtuahna ni miah lova an lanchhuah thiam tho avângin, pâwn lama an lan ang ngawta teh theih loh an awm ve tho mai. Chuvâng chu a ni ang, Pathian thu (Bible) pawhin, "Thinlung hi thil zawng zawng aiin Bumhmang ber, chhe lailet dêr a ni a; Tuin nge hre thiam thei ang?," (Jeremia 17:9) a lo tih ni!

          Thinlung hi mak tak mai a ni a, a na thei a, a suangtuah thei a, a hmu thei a, a hre thei a, hliamin a awm thei a, a tuiral thei a, a châng chuan a kehsawm hial thei bawk. Tin, hmangaihna te leh huatna te, duhsakna te leh îtsîkna te, duhnate leh iaina te, hlauhna te leh thlamuanna te, lungngaihna te leh hlimna te, thinrimna te leh lâwmna te, inngaihtlâwmna te leh chapona te, duhamna te leh mahni hmasialna te, etc...engkim mai hi, mihring mihrinnaa pawimawh lutuk hlir mai siamtu leh neitu a ni a. Mi, a thunun a, thinlung tello chuan nun hian awmzia a nei lova, kan hringnun zawng zawng inchhûnkhâwmna hmun a ni a, nun awmze hriltu ber a ni. Chuvâng chuan, thinlung hi kan nuna thil pawimawh tak a ni.

          A chângin kan nui a, a chângin kan țap a. Thinlunga thil awmte avângin kan hlim a, chu thinlunga thil awmte vêk chuan min tițap leh țhîn. Thinlung avângin kan nun ram a chau va, beidawnna lo pian chhuahna a nih ang bawkin beiseina nung nei țhîntu pawh a ni. He thinlung hi a châng chuan a hnual țhîn a, a chângin a hlim a, hringnun mawi taka pârchhuah tirtu a ni bawk. Mihring thinlung hian thil tam tak a ngaihtuah țhîn a. A putu mihringin a hun tawn mîl zêla a ngaihtuah țhin avângin hun hrang leh hmun hrangah thinlung ngaihtuahna hi a danglam ve zêl țhîn a ni.

          Thinlungin a ngaihtuah zawng zawng hi sawichhuah vek a ni ngai lova, tlâwmngaihna te, rinawmna te, taihmâkna te leh hetiang lam chi, thil hrang hrangte hi chu midang hnêna hrilh leh sawichhuah kher ngai lova lang chhuak mai thei thil a ni a. Hmangaihna erawh hi chu, hmangaihtuin a hmangaih hnêna a hrilh lohva, sawichhuak lova a thinlunga a vawn reng chuan awmzia a nei phâk lova. Awmze nei tûr leh hmangaihtu leh hmangaih an intawn a, an thinlung chhûngril an inhriat tawn theih nân chuan sawichhuah kher a țul ta bîk țhîn a ni.

          Thinlung hi mihringte timihringtu, nun hruaitu, chhûngril ațanga pâwn lam landân kaihruaitu a ni a. A putu mihring taksa a lo awngrawp a, tîsa tuamtu vunte a chuar a, hmêl leh hmai a zûr a, hriatna mit leh bengte an chak loh hnu pawha rinawm taka mihringte nun kaihruaitu a ni a, Pathianin mihringte a pêk zînga hlu ber a ni hial âwm e.

          Nang leh kei hi Pathianin thinlung min pê a, chutah chuan Ama tâna a hmun ruat chu a dah a ni. Chu hmun (Kan thinlung) chu Pathian chauh lo chuan tûman an luah khat zo lova, Pathian chuan kan thinlung luahtu nih a duh a ni. Kan thinlung hi Pathian ta a ni a, a hnênah kan hlân tûr a ni. Pathian chuan ka finna te, kan hausakna te leh kan thiamna te a mamawh lova, kan hmingthanna te leh kan thuneihna te, kan mâwina leh ka chakna zawng zawngte pawh engah mah a ruat lo. 'Kan thinlung erawh a duh a ni'.

          Pathianin min pêk thinlung hi, " Thil zawng zawng aiin Bumhmang leh chhe lailet dêr" mah nise, a tâna kan hlan lêt ve hun tûr min nghâk reng a ni.

                         HLAWNCHHING

INHMAKHUA

INHMAKHUA (Dâwn tisei)

                                                HC Lalramdina

Inhmakhua rêng rênga khawsak chu a va'n ninawm tak;
          Hma lam hunah kan hahdamna tûr a hril si!

Inhmakhua rêng rênga Pathian rawngbâwl chu a va'n hreawm tak;
          Thih hnu piah lam hun tûr a hril si!

Inhmakhua rêng rênga ei chu a va'n ninawm tak;
          Kan rilțam hun tûr a hril si!

Inhmakhua rêng rênga zir chu a va'n ninawm tak;
          Kan eizawnna kawng tûr a hril si!

Inhmakhua rêng rênga tlâwmngaih chu a va'n ninawm tak;
          Chhiat kan tawh ve huna țanpui kan ngaih ve hun tûr a hril si!

Inhmakhua rêng rênga taksa enkawl uluk chu a va'n ninawm tak;
          Kan hrisêlna tûr kawng a hril si!

Inhmakhua rêng rênga in chhêkkhâwm chu a va'n ninawm tak;
          Kan mamawh hun tûr a hril si!

Inhmakhua rêng rênga mi hmangaih chu a va'n ninawm tak;
          Min hmangaih lêt ve hun tûr a hril si!

Inhmakhua rêng rênga mi chunga țhat chhuah chu a va'n ninawm tak;
          Kan chunga țhat an chhuah ve hun tûr a hril si!
("Miin i chunga an tiha i duh tûr ang bawkin mi chungah pawh ti ve rawh" tih ziak a ni bawk si a!)

Inhmakhua rêng rênga thawh chu a va'n ninawm tak;
          Kan dam khawchhuah dân tûr a hril si!

                         HLAWNCHHING

HLAWNCHHING ȚAH HLA - 6

HLAWNCHHING ȚAH HLA - 6

                    MIN DÎM RAWH

                                                HC Lalramdina

Thinlung hliam tawh ka ni a;
Min dîm la, nang lehzêl chuan min hliam suh aw
Engtia nasain nge ka tawrh dâwn i hre si lo

                         HLAWNCHHING 

HLAWNCHHING QUOTE - 6

HLAWNCHHING QUOTE - 6

               MIPA vs HMEICHHE HNUTÊ

                                                HC Lalramdina

       

Mipate hi kan pian ațanga kum 2/3 vêlah Hnutê kan nghei a,

Kum 15/16 vêl kan nih ațangin kan beisei țan leh a...

Hnutê kan nghei hun chhûng hi kan dam chhûng hun ngaihtuah chuan a va reilo si êm!

                         HLAWNCHHING

LÊN BO TAWH SE

LÊN BO TAWH SE (Poetry)

                                                HC Lalramdina

Vawiin chu lungpui chungah ka țhu a
Lui luang laiah chuan ka ke chu chiahin
'Lui luangte chuan nunhluite chu lên bo tawh se' tiin duhthu ka sâm a
'Thinlung ser hi lo damin, nunhlui ngaih lunglên salna hrêng hi chhat se' tiin

Tuipui ang maia thahrui chakna pai
Lunglên khawharna hian min nuai mêk a
A tui a fâwn emaw a dam diai emaw
A ngawi reng emaw a lêm chuang lo ang hian

Vân dum pâwl piahlam ram nuam chu ka suangtuah a
Nunhlui ngaih lunglênna, thinlung hliam leh serte an damna hmun chu
Fam chang lo chuan ka kai thei âwm si lo va
Kai tûra dairial chan lah kan zuam bawk si lo

Aw! Nang lui luang mawi leh duhawm
Mal leh khawhar taka ka vahvaihna
Lungngaih, mangan leh beidawnna hringnun hi
Kumkhua atân i lên bo thei hrâm lâwm ni???

                         HLAWNCHHING