HLAWNCHHING QUOTE - 15
NUN AWHAWM BER
HC Lalramdina
Suangtuahna chuan beiseina min pe a
Beiseina chuan chakna min pe țhîn
Rilru țhatna chuan nun hlimna min pe a
Hmangaihna chuan dawhtheihna min pe țhîn
Duhâmna chuan engkim awhna min pe a
Awhna chuan rilru chhiatna leh îtsîkna min siam sak țhîn
Khawvêla nun awhawm ber chu 'Nuna Isua Krista neitute' hi an ni
HLAWNCHHING
ȚKP DAY (VAWI - 67 NA) CHIBAI
HC Lalramdina
Chhiartu zawng zawngte 'ȚHALAI KRISTIAN PAWL (ȚKP) DAY, VAWI - 67 NA' (30.7.2018) chibai ka bûk a che u. Pathian chunglam koh chhan, lâwmman hmu thei tûrin, Pathian rawng kan bâwlna kawngah tiam chin lam pana hma sâwn țheuh tûrin kan infuih thar leh a. Vawiin hun hlim leh lâwm taka hmang țheuh tûrin duhsakna sâng ber ka hlân a che u.
PATHIAN CHUNGLAM KOH CHHAN (PHIL 3:14)
Mi kan koh rêng rêngin, chhan nei lovin kan ko ngai lova, kan mamawh avângin kan ko țhîn a ni. Chutiang bawkin, Lal Isuan, keini Țhalaite hi min ko va, chhan neiin, a duh anga nung tûr leh a mamawha a hman atân min ko a ni. Thil țha ti atâna a siam, Țhalaite hi kan țhatlai hunah hian Pathianin a rawngbâwl tûrin min ko a ni.
Pathianin Kohhran Committee leh hruaitute kaltlangin kawng hrang hrangin a rawngbâwl tûrin min ko va, ȚKP hruaitu, Group hruaitu, member rinawm tak, Zaipawl, Sunday School Zirtirtu etc… Tin, Amah faka inkhâwm te, midangte tâna malsâwmna ni tûra kan awmna hmun apianga a rawngbâwl tûrte in min ko a ni. Kan thiltih țhat vâng leh kan tlin vânga a rawngbâwl tûra koh kan ni lova, a khawngaihna vâng zâwk a ni tih kan hriat a pawimawh.
Ani chuan kan thiltih angte ni lovin, ama ruat leh khawngaihna ang zâwkin min chhandam a, kohna thianghlimin min ko bawk a ni. Chuvângin, a rawng kan bâwlna kawng hrang hrangah inthlahdah lovin, phûr châng chauh ni lovin, kan thlen chin ațanga hma sâwn zêlin, tiam chin lam panin, thih thlengin rinawm takin a rawng bawl ila, Pathian chunglam koh chhan lâwmman (Nunna Lallukhum) chu kan chang ngei ang.
TKP THUTIAM
KRISTA LEH KOHHRAN TÂN
Ka chakna Isua Krista chu ring tlatin
nitin Pathian ka pawl ang a;
Kan Kohhran Pathian biakna leh
hnathawhnaah ka tel zêl ang.
Khawtlâng thatna leh inunauna tinghet
tûrin ka thawk ang a;
Krista hnênah midangte hruai
ka tum tlat ang.
HLAWNCHHING
RANDI (Poetry)
HC Lalramdina
Ami hraite'n ei leh bâr zawn nân
An hûm e 'Kawlawm mawi'
Pisa rûnpui mâwiin an hûm e
Sum leh pai hai luh nân
Kei erawh chuan sum pai hai luh nân
'Randi' mai maw ka hûm?
Ami hraite'n ten sitin sêl mah se
Duh ten hûm zêl nân'g e
A sakhming leh hmêl zawng tlâwm mah se
Thai leh hrai puar ve nân
Ka ei hmuhna Randi tlâwm tak hi
Duh ten hûm zêl nân'g e
Hûm zêl nân'g e Randi duhawm chu
A tu'n min sêl bîk lâwn'g
Kawlawm mâwi zawng chhîng zo lo mah se
Ka tân zawng a hlu si
Ami hraite'n pisa rûn chhûngah
Ei bâr an zawn laiin
Kei a riang ve hian Randi hûmin
Thai, hrai țâm hnêm nân'g e
HLAWNCHHING
HLAWNCHHING QUOTE - 14
I VAWIIN HUN HMANG ȚHA ANG CHE
HC Lalramdina
Sana bân chu i duh chen chen i herh lêt theiin, Calendar pawh i keu lêt i keu lêt thei a ni thei e. Mahse, i hun hman tawh erawh i kokîr thei tawh lo. Chuvângin, i 'Vawiin hun' hmang țha ang che.
Hun hi, a rei lam aiin a hman dân hian a hlutna a hril si a.
HLAWNCHHING
HLAWNCHHING QUOTE - 13
THU LEH HLA ȚHA
HC Lalramdina
'Thu leh Hla' hi hringnun lipui so bulh bulh laka ta chawlhna nuam min pe theitu a ni a, kan țah châng leh kan nun a nguai chânga hlimna min pe theitu a ni. Kawng lehlamah chuan, kan lung tilêngtu leh kan mittui titlatu pawh a ni ve thei tho mai. A enga pawh chu lo ni se, mihringte tân hian he khawvêl hi mittui nêna hman ai chuan nui chunga hman hi thil țha zâwk leh hrisêl zâwk, chu chu tute pawhina kan thlan zâwk țheuh a nih miau avâng hian min tihlimtu leh min tinui theitu, thu leh hla țha leh hlimawm hi mihringte hian kan mamawh êm êm a ni.
HLAWNCHHING
HLAWNCHHING QUOTE - 12
KA HLAU ȚHÎN
HC Lalramdina
Ka Pathian hming lam fo chung si hian, suihlung mâwl luat vânga midangte thinlung hliamtu ka ni fo ang tih hi ka hlau țhîn.
HLAWNCHHING
FIFA WORLD CUP FINAL 2018
HC Lalramdina
FIFA WORLD CUP 2018 chu khelh zawh a lo ni ta a, France National Football Team chuan Croatia National Football Team chu 4-2 a hnehin champion nomawi an chawi ta.
Champion :- France
Runner up :- Croatia
Third Place :- Belgium
LÂWMMAN HRANG HRANGTE
Golden Ball :- Luka Modric (Croatia)
Silver Ball :- Eden Hazard (Belgium)
Bronze Ball :- Antonio Griezmann (France)
Best Young Player :- Kylian Mbappe (France)
Golden Boot :- Harry Kane (England)
Silver Boot :- Antonio Griezmann (France)
Bronze Boot :- Romelu Lukaku (Belgium)
Adidas Golden Glove :- Thibaut Courtois (Belgium)
Fifa Fairplay Trophy :- Spain
HLAWNCHHING
LALPA, KA LÂWM E
(6.7.2018, Ka Birthday pualin)
HC Lalramdina
Engkim chunga roreltu leh thuneitu remruat ang zêlin ka hun leh nite chu ka chhiar chho ve bek bek a. Ka piancham (Birthday) duhawm tak pawh ka lo thleng ve leh ta reng mai! Pathian khawngaihna vâng liau liau a ni e.
Nikum ka birthday leh kumin ka birthday inkâr (Kum khat) chhûng hian ka nunah thil tam tak a thleng hman a. He kum khat chhûnga ka hun hman tâkte leh ka thil tawn hrang hrangte ka han chhuikîr a, lâwmna tûr hlir a lo ni!
Ka ngaihtuah chian poh leh ka chunga rinawm tlat, min phatsan ngai lotu leh min chenchilh tlattu Pathian ka nei hi vânnei ka inti thîn. Ani'n min hnaih a duh a, thil chi hrang hrang hmangin min kar a, keiin ka hlat lui zêl a, a hlat thei ang bera awmsan ka duh apiangin amah ka mamawh a zual zêl a lo ni.
Lalpa, ka lâwm e
HLAWNCHHING
FIFA WORLD CUP HISTORY (RECORDS/AWARDS) ȚHENKHATTE (PART-VIII) (Hriatzau nân)
HC Lalramdina
FIFA WORLD CUP 'THE MOST ENTERTAINING TEAM' AWARD
He Award hi mipui hmuha game khêl hmuhnawm ber te hnênah hlan țhin a ni. World Cup final tournament chhûngin mipuiin an duh ber an thlang țhîn a. Chuta thlangtu ngah ber team chuan an dawng țhîn a ni. He lâwmman hi kum 1994 ațanga sem țan a ni.
WORLD CUP MOST ENTERTAINING TEAM AWARD DAWNG TAWH TE
1994 - Brazil (18)
1998 - France (18)
2002 - South Korea (42)
2006 - Portugal (43)
2010 - Germany (44)
2014 - Colombia (45)
2018 - ???
HLAWNCHHING
FIFA WORLD CUP HISTORY (RECORDS/AWARDS) ȚHENKHATTE (PART-VII) (Hriatzau nân)
HC Lalramdina
FIFA WORLD CUP 'FAIR PLAY TROPHY'
Second round thleng pha chin team te zînga game khel mâwi ber te hnênah hlan țhin a ni. Kum 1970 ațanga sem țan a ni.
WORLD CUP FAIR PLAY TROPHY DAWNG TAWH TE
1970 - Peru
1974 - West Germany
1978 - Argentina
1982 - Brazil
1986 - Brazil
1990 - England
1994 - Brazil
1998 - England & France
2002 - Belgium
2006 - Brazil & Spain
2010 - Spain
2014 - Colombia
2018 - ???
HLAWNCHHING
FIFA WORLD CUP HISTORY (RECORDS/AWARDS) ȚHENKHATTE (PART-VI) (Hriatzau nân)
HC Lalramdina
FIFA WORLD CUP 'MAN OF THE MATCH' AWARD
'Budweiser Man of the Match' tih a ni bawk. Tournament chhûnga game tina khêl țha bîk hnênah hlan țhin a ni. Kum 2002 ațanga sem tan a ni.
(He lâwmman dawngtute hi chu an tam tham êm avângin kan târlang lo mai ang - HC)
FIFA WORLD CUP 'ALL STAR TEAM'
Technical study group in tournament chhûnga player khêl țha bîkte an thlang chhuak țhîn a ni.
(He lâwmman dawngtute pawh hi an tam tham êm avângin kan târlang lo mai ang - HC)
HLAWNCHHING
