2019 KUM HLUI NGAIHAWM

2019 KUM HLUI NGAIHAWM

                                                HC Lalramdina

          Hun leh ni leh kum te a liam zel a ni tih hriatna hian mihring damlai kan ni tih a entir a, nunhlui ngaia lunglêng thei dinhmuna kan la din chhûng hi chuan,

"Kan ngai êm a ni nunhlui zawngte kha

Kir rêl lo i liampui ta maw" 

tiin, kumhlui kan vailiam reng mai dâwn a nih hi maw!

          Kum thar kan chuankâi avânga Pathian hnêna lâwmthu kan sawi hnu reilo tê emaw kan tih mêk laiin, kum tâwp kan thleng lehnghâl ta dêr mai! Mi dang tâna thil țha tih tumna pawh nei lova, mahni inhaivûr tum rêng rênga kan hmanhlel mêk lai hian, an sawi Pharo-a Sakawr tlân chak ang maia chakin hun leh nite an her liam puat puat a. Châwl lova Sana bân vir reng mai chuan ni 365 hi a va'n her chhuahpui rang thîn tak êm!

          Kum hlui a liam a, kum a lo thar  leh a, hetianga hun hlui leh hun thar inthlâk lai vêl hian lung a lêng duh a. Hun thar thlir ai mahin hun hlui thlira hun hman a awl a, nun hlui ngaiin, "Hmân lai," kan ti vawng vawng fo a nih hi!

          Mi lunglêng thei tak mai ka ni a, hun hlui, hmun hlui leh nunhlui te hian ka thinlungah hmun sâng tak an chang a, ka lung min lên țhîn. Kumin chhûnga ka hun hman tâk zawng zawngte'n, chatuan hmun min thlen khalh tûra min her liamsan vung vung tûr te hi a lunglênthlâk ka ti mang e!

          He hun, kum tâwp, ni hnuhnung ber kan hman lai mêk hian khua a har vawng vawng a, ka nun hi a ruak deuh nghuai a, khawvêl hi a reh tlawk tlawk ni berin ka hria! Hmangaih lungduh te nêna hlim leh lâwm taka hun kan hman lai ni te, chhûngkima hun kha zawng kan hman liam tâk te khân lung a tilêng vawng vawng mai!

          Țhian hlui mualliam ta te leh damchhûng khawsak țûlna avânga lam hlaa awm te mitthlaah an rawn inlâr zut zut a, kan seilenna chhuahtlâng leh a chhûnga chêng, kum tam liam taa lung ka rualpuite zawng zawngte ngaih a na mang e! Nunhlui leh kum hlui hi zawng, a thlah liam hnem apiang tân ngaih tûr a tam ting mai si a.

          Hring nunah hian nun hlui leh hun liam hnu ngaih hian bân ni a nei thei dâwn lova. Kan ngaih ber ber leh kan hriat rei ber ber te hi hun nuam leh hlimawm ber ber a ni kher lova. Kan  hringnuna kan ngaihtuahna lairil ber luahtu leh kan ngaih vawng vawng țhin chu kan hun tawna lungchhiatthlâk lai takte kha a ni châwk țhîn.

          He khawvêl inher zêlin kumthar a rawn herchhuahpui apiang hian kumhlui a herliampui ve thung țhîn a. Chu kumhlui herliam zêl chuan nunhlui a herliampui zêl bawk a. He kumthar lo thleng leh tûr pawh hian nakin lawka kumhlui ni leh mai tûr a rawn herchhuahpui leh dâwn a ni. Nunhlui ngaihawm ni leh mai tûr nun hi ni tinin kan  vuiliam zêl zawng a nih maw!

          Kum tâwp ni hnuhnung ber a lo herchhuah ruala Calendar hlui kan nuai hlâwm tawp tawp țhin ang hian, engtik niah emaw chuan chu Calendar ang chiah chuan hun hian kan nun hi mathei lovin a la nuai hlâwm ve ang a, tuai thar leh tik a awm tawh ngai lovang. Hun vawngtu Calendar  kan thlâk thar tam poh leh thlân lam kan hnaih sauh a ni mai si a!

          Engtikah emaw chuan tu mah nghâk lova chak taka inher liam hun leh kumte hian kan țhat lai leh kan vânglai hun nuam tak mai hi hmânlai a la chantir dâwn a. Châwl lova Sana bân vir reng hian hringnun chawhnu khawvêl min la vir thlenpui ang. Chutih hunah chuan kan țhian kawm țhin te, kan lainâ te, kan ngaihzâwng hlui te... a tam zâwk chu thlânah an mu reh țhiap tawh ang. Khawvêl ram zâu takah hian ngaihtuahna bâk kawm tûr nei lovin khawhar takin kan hawi vêl ang a. Kâwlkila her liam mai tawh tûr, tlai lam Ni êng dul ruih ang maiin hringnun kâwlkil tâwp kan hnaih tawh hle ang.

          Hmânlai chang tawh hnu vânglai ni leh vul lai ni ngaih luat vângin thi thei khawp hialin kan lung a lêng ang a. Hun liam tawh hriatrengna te chuan kan mittui a titla fo țhîn dâwn a. Kawm hlim tûr leh kâwm hlimtu tûr nei lova chawhnu khawvêl kan chuankai hunah meuh chuan, "Hringnun hi heti êm êm hian a lo lunglênthlâk a ni maw?" kan la ti vawng vawng ang.

          Hun awm tawh lohna ram kan thlen hma loh hi chuan mihringte nunah hian "Mangțha" tih thumal hian hmun sâng tak a chang kumkhua ngei ang. He khawvêlah hian "Kumhlun lo" chauh hi "Kumhlun awmchhun" a nih avângin hlim ni leh nuih ni kan vui liam a, hun nuam leh hun hlimawm tak pawh hi hun lunglênthlâk ni tûrin an her liam leh si thîn!

          Kumina kan thil tih zawng zawngte chu, December 31 tlaia khawthlang kâwlkila Turnipui her liam tûr chuan chatuan a tân a her liampui dâwn ta a.

"Ni tlâkna kâwlkil piah lam ram hla takah sâwn

Kan nunhlui te kha lo la châmbâng tak ang maw?"

                    HLAWNCHHING

HLAWNCHHING LUNGLÊNG HLA - 3

HLAWNCHHING LUNGLÊNG HLA - 3

KUM HLUI NGAIH LUNGLÊNG HLA

                                                 HC Lalramdina

Ni tlâkna kâwlkil piah lam ram hla takah sâwn

Kan nunhlui te kha lo la châmbâng tak ang maw?

                    HLAWNCHHING

MI TIN TÂNA CHANCHIN ȚHA

MI TIN TÂNA CHANCHIN ȚHA

                                                HC Lalramdina

          Mizo Kristiante hian Krismas hi kum za chuang kan lo hmang tawh a. Tûn hmaa kan hman dân leh tûn laia kan hman dân chu inperhsan tawh hle mahse, Krismas a nihna leh a hlutna erawh a danglam chuang lova, a hmangtu a zirin kan hmang țhain kan hmang țhalo mai niin a lang.

          Kumin 2019 Krismas pawh kan lo chuang chhuak leh ta reng mai! A mimal ang te, a kohhran ang te, chhûngkua leh țhian zaho ang tein Lal pian champha lâwm tûrin kawng hrang hranga kan inbuatsaihna te chuan a vâwrtâwp a thleng ta a. Kan inbuatsaih dân leh kan rilrû sûkthlêk erawh a inang lo hlawm viau mai thei. Krismas hi kan hunpui ber a nih angin a naupang ber ațanga puitling thlengin min khawih danglam deuh vek a ni ber e. Hetianga Krismas atâna kan inbuatsaih mup mup lai hian, mi dangte tâna malsâwmna ni tûrin inbuatsaih tel ila a țha ang e.

          Kan pi leh pute hunlai kan thlir kir chuan thlarau lam nuna an hmathlir kha rinthu mai mai hlir niin a lang a, mi hnuaihnung deuh tân phei chuan beisei a bo êm êm a tih theih âwm e. Kan pi leh pute hunah kha chuan pialral kai tûrin In lam leh ram lama thangchhuah a ngai a, a ti ve thei lo tân chuan damlaia hrehawm, thih hnua hrehawm bawk nihna a ni mai. Chutianga beidawng taka thim thuneihna hnuaia hlau rêng rênga kan awm laia ênna ropui rawn thlentu chu Bethlehem-a nau lo piang, Isua Krista ngei hi a ni. Zawlnei Isaia'n, "Mi thîm hnuaia kalte chuan êng nasa tak an hmu ta; thihna hlim rama awmte chungah ngei chuan êng chu a lo êng ta," (Isaia 9:2) tia a sawite zîngah khân keini ngei pawh hi kan tel ve a sin! Chanchin Țha, chhandamna leh chatuan nunna rawn thlentu tluka Mizo nun her danglam thei hi a la awm ngai lova, a awm thei ngai hek lovang.

          Good news țhenkhat hi chu mi țhenkhat tân chanchin lâwmawm a nih laiin, țhenkhat tân erawh a ni lo thei ve bawk a, mi tin ta tûr chanchin lâwmawm nih a tling țhîn lo va; kan Pathian thu erawh hi chu mi tin tâna Chanchin Țha a ni tlat mai a ni.

          Khawvêl lâwmna thil țhenkhat hi chu mi țhenkhat tâna lâwmna a nih laiin, țhenkhat tân chuan lâwmna a ni lo thei bawk a. Khawvel sual chhandam tûra Van Lal Fapa lo pianna thu erawh hi chu mi tin tâna chanchin lâwmawm êm êm a ni thung a, mi hausaten an pumbilh thei lo va, mi rethei te tân pawha lo kal a ni tlat a ni. Lehkha thiam leh mi ropui tak tak te tân chauhva lo kal a ni lo va, keini mi mâwl tak tak leh pachhe daikil kâra mi te tân pawha lo kal a ni a, mi tin te tâna lo kal a ni. (Mi tin zîngah hian kan tel ve ngei a ni tih hi kan hriat fo a țha a ni.

          Isua Krista Chanchin Țha hre ve hman lo leh Krismas pawh hmang ve hman lova mual liamta te kha vawiinah hian kohkir leh an châkawm hle a ni. Keini erawh chu, Isua Krista avânga Krismas hmang theia kan awm hi kan vânnei tak zet a ni, lâwm nachâng kan hriat a țûl hle  mai.

          Kan mimal nun, kan chhungkua, kan khawtlâng, kan ram leh hnamte hi han thlir chiang ila. Krismas hmang ngai lo hnam zîngah tel ta ila eng ang meuhva dinhmun chhia-ah nge kan awm ang? Ngaihtuah ngam a ni lo. Mahse chutiang ang dinhmun râpthlâk taka kan awm lohna tûra min chhanchhuaktu ropui chu Bethlehema Lal lo piang Isua Krista ngei hi a ni a sin! Hei vâng ngawt pawh hian theihtâwp chhuaha fak hi a phu a ni.

          Mihring nun hi ngun taka kan chhui chuan kan pian ni ațanga kan thih ni thleng hian harsatna tinrêngin min bâwm țhîn. Lungngaih ni te, mittui tlâk ni te, kan thiltihin min ûm phâk avânga lungngaia kan vân ruai ni te a lo thleng țhîn. Nimahsela, thinlung lungchhia tuam dam te, lungngai zawng zawng thlamuan te, vut aiah pangpar țhihrui hlan te, lungngaih aiah hlimna hriak hnawihte leh nguina thlarau aiah fakna silhfên tea min tuam hi Lal Isua Krista lo pian pian chhan a ni. Chuvâng chuan, lungngaihna ruam ațanga hlimna tlâng chhîpa min hruai thleng tûrin Lal Isua hi a tling tâwk a ni tih i hre nawn fo ang u.

          Mi thiam zâwk te leh chhuizau mi te chuan, "Khawvêl chanchin hi Bethlehem ran in khawngkhâr kawpzaah a inher vêl a ni," an lo ti țhîn. Lal Isua hi rorelna fawng vuantu a nih avângin Amahah leilung a inher a ni tih hi a dik êm êm a ni. He khawvêl chanchin virvêl (Flow of history) thununtu chu Bethlehema nau lo piang Isua Krista ngei hi a nih avângin a kiangah, Amah nêna Krista ruai, Krismas kîl hi a him ber a, a țha ber a ni zêl ang. Thlarau leh tihtakzetin Krista pianna thlarau lam Bethlehem khuaah kan hmang ang a, tah chuan Lalber lo piang Immanuela chu hmuin kan thinlung hlânin hlim takin chibai kan bûk ang a, Chatuanin kan lâwmin kan hlim kumkhua tawh ang.

          Kan tâna lo piang Lal Isua hi thinlung taka chibai kan bûk a, kan tân ngei he Lal thar hi a lo piang a ni tih kan hriata, thinlung leh thlarauva kan lo hmuah a, he hun lâwmawm takah hian malsâwmna thar kan hmuh țheuh theihna tûrin i inbuatsaih thar țheuh ang u tiin kan insâwm a ni.

                    HLAWNCHHING

HLAWNCHHING ȚAH HLA - 22

HLAWNCHHING ȚAH HLA - 22

                    KA VAI RUAI E

                                                 HC Lalramdina

Ka thlir fo țhîn chung Si-ar zawng khi

"Tah khian a lêng mahnâ,"tiin

Ka thlir fo țhîn Chhawrthlapui thangvân zâwl kai khi

"Tah khian ka tawng mahnâ," tiin

Ti hian ka dâwn țhîn, "A ngaia vân ruai țhîn kei riangmi hi

Vân ațang khian min thlir ve mahnâ," tiin

Kan sûl hmun hlui ka chhui nawn fo țhîn

"Tah chuan ka tawng mahnâ," tiin

I zâlna thlân hmun ka pan fo țhîn

"I rauvi thla tal ka tawng mahnâ," tiin

Ti hian ka dâwn țhîn, "Kumpui sûl tam a vei ang a

Khuarei hian min hnêm ve mahnâ," tiin

Ti hian ka inhrilh țhîn, "Khuarêl hi ngaithiam thei rih lo mah ila

Engtik ah emaw chuan ka la hrethiam ve mahnâ" tiin

Ka thlâkhlelh țhinte chu an liam a

Ka mi ngainat te pawh lei thûk takah phûm bovin an awm tawh

Mahse, engtik niah emaw chuan, khawi hmunah emaw kan la intawng leh ngei ang

                         HLAWNCHHING

HLAWNCHHING ȚAH HLA - 21

HLAWNCHHING ȚAH HLA - 21

               HMANGAIHNA RETHEI

                                                 HC Lalramdina

Tin, heti hi a lo ni a,
Rin loh takin min lo chhâwn a
Rin lohna thinlung min hnâwl sakin
Rin phâk bâkin rinna min siam a
Rinhlelh rual lohva beiseina min siamtu khân
Rin phâk loh natna min thlen leh si!

Chuti chuan,
Ka beisei phâk loh nia ka ngaih
Ka beisei rûk reng țhin kha
Ka beisei loh deuhvin a rawn inlâr a
Ka beiseina rawn chhêm alhin
Beiseina ramah min chêntîr a!

Mahse,
Beiseina tifamkim tûra ka lo nghah
Beiseina tinung zêl tûra ka ngaih
Beiseina nêna ka lo thlîr kha
Beisei phâk loh, beisei bo
Bei tisei thlâwn mai maw lo ni?!

Tin, ngai teh,
Beisei ber pawh beisei ngam tawh si lovin
Beiseinain ka khat a
Beisei ber pawh chiang tawh lovin
Engmah lo piahlamah eng emaw beisei nei chung siin
Beidawnna bâk ka beisei ngam chuang si lo!

Tunah zawng,
Ngaihtuahna kâwm hmana ka awm châng hi chuan
Ngaihtuah loh atâna țha zâwk thil tam tak ka ngaihtuahnaah a rawn lût țhîn a
Ngaihtuahnain ngaihtuah tûr dang a ngaihtuah chhuak zo bawk si lo
Ka ngaihtuah veng veng lai che hian
"Ka ngaihtuah tawh lovang che," tiin, ka lo inngaihtuah leh veng veng țhîn!

                    HLAWNCHHING

HLAWNCHHING QUOTE - 32

HLAWNCHHING QUOTE - 32

I SUANGTUAHNA HMUH KA CHÂK ȚHÎN

                                                HC Lalramdina

Suangtuahna hi mita hmuh theih chu nise
Hmuh ka châk țhîn i suangtuahna
Ka hmaah chhawpin ka thlir ang
Ka tel ve em tih hre tûrin

                         HLAWNCHHING

LALPA HNÊNAH I KÎR LEH ANG U

LALPA HNÊNAH I KÎR LEH ANG U (Article/Sermon)

                                                HC Lalramdina

          "Hawh u, Lalpa hnênah i kîr ang u: Min lo pawtsawm tawh na a, min tidam leh dâwn si a, Min lo vaw tawh na a min tuam leh dâwn si a" (Hosea 6:1)

      

          Mihringte hian Pathian hmangaihna tlân bosanin mahni duh ang angin kan khawsa țhîn a, sual kawng hrang hrang zawhin kan hun kan hmang țhîn. Kan thlahtu bulten Pathian phalloh thil an lo tih avângin chu an thil tih sual avâng chuan Pathian hmangaihna ângchhûnga ta tihhranin kan lo awm ta a.

          Pathian anchhia dawng kan nih tawh avângin chatuana hrem tûr kan lo ni ta a. Kan duh thuin Pathian hmangaihna ângchhûngah kan kîr leh thei tawh lova, mahsela, Pathian hmangaihna chuan a fapa Isua Krista ngei kan sual thâwi nân rawn tîrin, a thisenin min tlan ta a, a hnêna kîr leh theihna kawng min rawn hawnsak leh ta a ni.

          Mihringte hi Pathian vahbosan reng mai țhîn kan ni a, kan duhzâwng te kan châk zâwng te hi Pathian duhloh zâwng hlir mai a ni țhîn a. Khawvêla kan lo pianchhuah phat ațang hian sual lam âwn nghâl mihring kan ni a, sual kawng zawh tûrin kan rilrû a hmanhlel țhîn. Chutiangin, mi tam tak chuan nîtin nuna an buai êm avângin an nunin a pan lam pawh an ngaihtuah hman lova, sual kawng thui tak zawhin, kîr leh an harsat fo țhîn. Bible thusawite hria a, nunpui tum zet si a, dam chhûng lungkhamnate avânga tawlh bo leh ta mi ṭhenkhat an awm bawk a. Pathiana nun nei tawhte ngei pawh Amaha kan awm reng loh chuan sual tân kan lo nung reng tawh țhîn a lo ni.

          Sual tâna nung țhînin mahni duhna lam kawng kawngah, mahni duhdân ang angin kal țhîn mah ila, Pathian hmangaihna chuan min lo ûmzui zêl a. Kan sualte sima Ama hnên lama kan kîr leh theih nân kan nunnate min la zuah sak a, sual hle mah ila, damna leh hrisêlna țha tak kan neihte hi Pathian hmangaihnain Ama hnêna kan kîr leh theihna kawng min hawnsakna a ni tih kan hriat a pawimawh hle mai.

          "Mi suaksual chuan a awm dân chu bânsan sela, mi fel lo chuan a ngaihtuahnate chu bânsan bawk rawh se: LALPA hnênah kîr leh rawh se, tichuan Anin a lo khawngaih ang; kan Pathian hnênah kîr leh rawh se, Anin a ngaidam nasa khawp dâwn si a" (Isaia 55:7) Pathian duh loh zâwngin lo kal tawh țhîn in, Pathian hmangaihna lo vahbo san tawh mah ila, inchhîra a hnên kan pan phawt chuan min lo ngaidamin a fa nihna hlu tak chu kan tân a la dah reng a ni.

          "Pain mi pêk zawng zawng ka hnênah an lo kal vek ang; tupawh ka hnêna lo kal chu ka hnawtchhuak tawp lovang" (Johana 6:37)

          Fapa tlânbo khân a inhriat chhuah khân neih a nei tawh lova, ka thil lo tihsual tâk zawng zawng te hi ka'n siam țha leh phawt teh ang tiin a pa ro a deh ral tâk zawng zawng te kha rulh tum phawt se chuan a tân tihngaihna a awm lovang. Thil tam tak a lo tisual a ni tih a inhriat vêleh a nihna ang anga a pa hnêna a inlamlêt mai khân a pa'n a lo ngaidam a, a sum deh ral tâk leh a hloh tawh zawng zawng te kha a pa zâwk chuan a rûl leh ta a nih kha.

          Mi tam tak chuan thil ka lo tisual a ni tih kan in hre chhuak a, amaherawhchu, Pathian hnêna lêt nghâl mai lova, keimahniin kan tihsual tawh te lo siam țhat hmasak ve phawt kan tum țhinna hian min ti tangkhang ta țhîn a. Kan thei leh tak tak chuang si lova, țûl lovah hun kan khawhral a kan buai telh telh țhîn.

          Chuvang chuan, hei hi ka'n siamțha phawt a nge, kan chhûngkaw buaina ka'n chingfel hmasa phawt a nge, midang nêna kan inkâr buaina hi ka'n chingfel hmasa phawt a nge, kan tih hmasak hian eng buaina mah kan chingfel tak tak ngai lova, a buai telh telh zâwk țhîn. Chutiang tûr chu a ni lova, kan inhriatchhuah vêleh kan nihna ang anga Pathian hnêna kan lêt nghâl mai hian thil tam tak a lo fel hma zâwk țhîn a ni. Eng dinhmunah pawh ding ila, eng ang pawhin sual mah ila, "Lalpa ka nihna ang angin ka rawn pan che" kan tih mai hian Aman a bâk chu a lo chingfel mai țhîn a ni.

          "Mi fel takte lam tûra lo kal ka ni lova, mi sualte lama simtir tûra lo kal ka ni zâwk" (Luka 5:32)

          Keini pawh hian thil kan tisual vek tawh ang, tunah pawh kan tisual mêk pawh a ni thei e. Kan tisual a nih chuan, Lalpa hnenah i kir ang u, Kraws-a min tlanna thisen chhuak kha engmahin a pawlh dal theilo. Sual nasa ber pawhin Isua Krista min tlanna thisen kha thiltithei lovin a siam thei lo a ni. Sual ngaihdamna beiseia Isua pantu te chuan, Isua an pan thlawn ngai lo. va, "Fel phawt lam a ni lova, Pan phawt lam a ni zâwk" Tisual tawh leh tisual chungin Isua hi pan ila, anin kan sim theihna tûrin min lo pui zâwk dâwn a ni.

          Pathian hmangaihna tâwp khâwk chuan Vân hmun ropui chu Kalsanin he lei ânchhedawngah hian min rawn zawng chhuak a, min rawn pan a, a hnên kan thlen theih nâna kan mamawh engkim chhandamna hna min thawh zawh sak tawh a ni. Pathian hmangaihna tâwp khâwk chuan a vawikhatna atân a rawn zawng chhuak tawh che a, a rawn pan tawh che a, i mamawh engkim a ti zo tawh a. A vawihnihna atân a rawn pan tawh dawn lo che a, a vawihnihnaah chuan nangmah ngeiin i pan ve a ngai tawh a ni. A rawn kal leh hun chuan engmah min tihsak tawh dawn lova, Amah ringtute a rawn lam ringawt tawh dâwn a ni. Chuvâng chuan, hun țha kan neih lai hian Pathian hnên i pan pan ang u.

LALPA HNÊNAH I KIR ANG U

                    HLAWNCHHING

HLAWNCHHING ȚAH HLA - 20

HLAWNCHHING ȚAH HLA - 20                              

RAUHSAN HRINGNUN

                                                HC Lalramdina

Mombati anga ka luan ral lai hmuh châkin min thlîr reng țhîn a
Chauva ka tlûk hun an nghâk reng țhîn!

Ka 'THINLUNG' ni lovin ka 'HUN' chauh an duh a
An mamawh 'Ka hun' ka pêk a
An natna ka tuamdam sak hnuah erawh
Zâwimuangin min kal san leh si țhîn!

                    HLAWNCHHING

INNGAIHSAK TAWNNA

INNGAIHSAK TAWNNA (Article/Sermon)

                                                   HC Lalramdina

           Mihring nupa, chhûngkua, unau, țhenawm khawvêng leh țhenrual te inrem tirtu țha ber chu inngaihsak tawnna hi a ni ti ila a sual âwm love. Nupa, Nula/Tlangval inhmangaih takte pawh hian kan kawppuite laka kan beisei ber pawh inngaihsak tawnna tho hi a ni.

          Ram mipuite pawh hian ram hruaitute laka kan beisei leh kan lungâwina ber țhin pawh inngaihsakna hi a ni fo mai. Mihringte hi ngaihsak mamawh miah lo tumah kan awm lova, inmamawh tawn vek kan ni a, kan inngaihsak tawn țheuh tûr a ni.

          Kristiante ngei pawh hian kan Kristianna kawngah hian kan Kristian pui te emaw kan khawvêl țhiante emaw țanpuina kan mamawh châng a awm țhîn. Kan thinlung leh thlarau țhanlenna tûr atân hian kan nun hian paltlang tûr leh hmachhawn tûr tam tak a nei a. Kan nitin nun hmandân kawng hrang hrang te, kan chhehvêla thil thleng a zirte a lo insiamrem zung zung thiam te leh hun kal tawh chu thlahliam mai țhîn te leh tûn hun zêla kan chunga lo thleng te lo pawm thiam te leh hun lo kal tûr chu Pathian nêna lo duanlâwk te a țûl a. Hêng hi kan Kristian pui te leh kan țhiante hnên ațang pawn kan inzir thei a ni. Chuvâng chuan, kan bul hnaia uluk taka thurâwn min petute kan mamawh châng a awm a, chûng mite chu kan nuna tuihnâng thar rawn chhûng lût tu an ni thei a. Chuvâng chuan, mihringte hian ngaihsaktu kan mamawh țhîn a ni.

          Inngaihsak tawnna chu khawtlâng mipui te, kohhran mipui te, kan rawngbâwlpui te, kan chênpui te, kan țhian kawm te leh a mamawhtute hnêna tisa leh thlarau lam nun tichak tûra fuihna leh ṭanpuina te, hmangaihna nêna ngaihsakna leh rawngbâwlsakna hi a ni.

          Natna leh thihna te, manganna leh harsatna hrang hrang tuar tute, thlarau nun chau avânga hnungtawlh mêk te dâwm kânga țanpui te hi inngaihsak tawnna hian a huam a. Tisa leh thlarau lama malsâwmna leh hlawhtlinna dawngte hriatpui leh lawmpui a, hmasâwn zêl tûr leh thlarau lama tichak tûra fuihna te hi a keng tel vek a ni.

          Tûnlaia pawl chakna leh hmasâwnna dâltu lian tak zînga mi nia ka hriat chu memberte zîngah inhriatpawh tawnna leh inngaihsak tawnna kan tlâkchham vang a ni fo țhîn. Chumi siam țha tûr leh chumi atâna hmalâkna chu pawl hian a ngai pawimawh hmasa ber tûr a ni.

          Inngaihsak tawnna hi mîte rilrû leh ngaihtuahna tiphûr a, tisa leh thlarau nun thlenga tichak tûra fuihna leh ṭanpuina pawimawh tak a ni. Hemi kawngah hian mitinin mawhphurhna kan nei țheuh va -

- Thil țha leh mawi a nih vâng chauhvin kan ti tûr a ni lo.

- Pathian thu leh Lalpa laka kan mawhphurhna zâwk a ni.

- He mawhphurhna hi hlim tak leh phûr takin kan thawk tûr a ni.

- He mawhphurhna hi chhûng lam ațanga pawm thlapna rilrû nên kan kalpui tûr a ni.

- Thurâwn inpêk hi Pathian ringtute kan inhmangaihna leh kan ingaihsak tawnna tihlanna hmanrua țha tak a ni a, in hlân chhâwn zêl theih a ni bawk.

- Mi zawng zawng hian intihphûr tawnna, inthlawp tawnna leh inngaihsak tawnna kawngah inzirtîr zêl kan ngai a ni.

- Kristian zawng zawng te hi inchawkphûr tawnna leh midangte țanpuina kawnga hma la ho tûra koh vek kan ni.

- Kristiante chu inhmangaih tawn a, phurrit inchhâwk tawn tûr leh in țawngțaisak tawn țheuh tûr kan ni a. Kristian Biakin tin ațang hian kristian nun dik tak, mite nun châwm lian thei inngaihsak tawnna hi kan ngaih pawimawh a hun tawh a ni.

          Midangte ngaihsakna leh hmangaihna nêna rawngbâwltu te inpêkna hian, midangte tân tisa leh thlarau malsâwmna a thlen țhîn a ni. Chu hmangaihna leh ngaihsakna chuan mîte a hîp khâwm a, pawl a tinungin a lo țhang lian țhîn a ni.

          Inhmangaih tawnna leh inngaihsak tawnna hi Isua Krista pawh khân a ngai pawimawhin a zirtir nasa hle a - "Thupêk thar ka pêk che u hi, in hmangaih ula; keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtirte in ni tih chu miah chuan an hria ang" (Johana 13:34,35) a ti a. Isua Krista ṭawngkam leh zirtirna aṭang hian keini ringtute tan a pawimawhzia leh kan mawhphurhna hetiang hian kan hmu thei bawk -

(1) Isua Krista thupêk a ni.

(2) Kan zavaia kan tih tûr leh kan mawhphurhna a ni.

(3) Isua Krista hmangaihna leh rilrû ang pu a inngaihsak tawn tûr kan ni.

(4) Kan inhmangaihna leh inngaihsak tawnna ațangin ringtu kan ni tih midang ten an hre dâwn a ni.

          Ringtute hi kan zavai hian thlarau thilpêk leh malsâwmna kan dawn ang zêl a, midangte hmangaih tûr leh rawng inbâwlsak tawn tûra koh kan ni a. Chutiang tûra koh kan nih vek avângin ringtu mimal tinte hian Lalpa lakah mawhphurhna kan nei țheuh tihna a ni. Kan nihna leh thuneihnate chu a inang vek thei lo va, amaherawhchu, kan zavaia chunga thuneitu leh min kaihruaitu chu Isua Krista hi a ni a, Ama hnên ațanga malsâwmna leh thlarau thilpêk kan dawn ang zêla hna thawk tûr kan ni zâwk a ni tih hriain, hmalam panin țan i la thar zêl ang u.

I INNGAIHSAK TAWN ȚHEUH ANG U

                    HLAWNCHHING

HLAWNCHHING QUOTE - 31

HLAWNCHHING QUOTE - 31                                   

               HRINGNUN SUANGTUAHNA     

                                                HC Lalramdina

Ka hlimna te hian țahna min thlen si chuan
Ka țahna te chuan eng tak min thlen ang maw?

Suangtuah hlimthla mai pawhin hlim hmêl a chhuah theih si chuan
A tak ram chu eng ang taka hlimawm ni ang maw?

                          HLAWNCHHING

HLAWNCHHING ȚAH HLA - 19

HLAWNCHHING ȚAH HLA - 19

          I HRETHIAM SI LO

                                                HC Lalramdina

Ka sawi chhuah kher ngai lovin hrethiam se ka ti fo va
Âtthlâk takin ka nghâk reng a
Beidawnthlâk takin a hrethiam dêr si lo!

I tân thil tih neih ka va châk êm
I kawl reng tûr leh i hlut tûr thil
Pêk tûr che neih ka va duh êm
"Ani khân min hmangaih," i tih ve nân

Hmangaihna hawisanin
Hmangaihtu pawh thliar thiam lo mahla
I hriatthiam loh hmangaihna hi
Hrilhfiah theih che ka va châk tak êm!

Eng tikah emaw chuan he ka lungphu hi a la tâwp ang a
Kum khua atân a tâwp hlen tawh ang
Nangmah avânga thinlung țap țhîn kha
A châwl hlen tawh ang a
Chutih hunah chuan
"Min hmangaih êm êmtu chu a liam ta," i la ti ang.

                         HLAWNCHHING

HLAWNCHHING QUOTE - 30

HLAWNCHHING QUOTE - 30

                    PATHIAN PAN RAWH

                                                HC Lalramdina

I keh sawm vek a nih paw'n, i keh them zawng zawng nên Pathian pan la
A hma aia țha in a lo remkhâwm ang che

                         HLAWNCHHING

2019 KUM THAR THUCHAH

2019 KUM THAR THUCHAH

                                                HC Lalramdina

          Kum 2019 kum thar, ni thar duhawm tak chu kan lo chuang kai leh ta reng mai! He hun thar, tûma la zawh ngai loh hi Pathian khawngaihna zârah kan zawh ho leh dâwn a ni a, kum tâwp dam tlâng takin thleng kim ang i maw?

          Hun kalta leh kum 2018-a kan thiltihte chuan min la ûm zui zêl dâwn a, lunglênna leh inchhîrnaah te, lâwmna leh țahnaah te min hnuh luh tumin kan sûlhnu leh nunhlui te chuan min la chîm buai fovang. Mahse, hawh u, kan sûlhnu leh nunhlui sala kan tân loh nân, hma lam hun, hun thar leh duhawm chu thlir tlatin kan zin kawng hi i zawh zâwk teh ang u.

          He kum 2019 hun thar kan zawhna tûrah hian taksa, rilrû leh thlarau lamah inbuatsaih thar ila, ruahmanna duhawm leh beiseina thar i insiam ang u. Kan la zawh ngai rêng rêng loh leh kan la tawn ngai rêng rêng loh hun thar leh thil thar kan paltlangna tûrah hian, tûna rilrûa kan inbuatsaihna leh kan ruahmanna te, beiseina nung kan neih te hi he kum kan zawh chhûng zawnga chakna leh hlawhtlinna min pe theitu tûr chu a ni.

          Hmânni lawkah khaw chhak mifingte angin nausên Lal Isua chibai bûkin Krismas kan hmang a, tunah chuan, khaw chhak mifingte ang bawkin kawng thar i zawh ve ang u. Anni chu, (Heroda hnênah kir leh lo tûrin an manga hrilha an awm avângin, anmahni khaw lamah kawng dangah an haw ta a. Mat.2:12) Keini pawh, kan nunhlui leh sûlhnu lama kir leh tawh lovin, nun thar kawng thar zawh tûrin kan rilrû, taksa leh thlarau tân i inbuatsaih thar țheuh ang u.

                         HLAWNCHHING