2024 KUM THAR

2024 KUM THAR

KUM THAR QUOTE

                                     HC Lalramdina

I nun keh tawh kârah khân Pathianin a hmangaihna mâwi tak luan tir a duh a

A din thar leh ang che

Amah nên in mâwi leh ang

Kum thar chibai vek ule

                    HLAWNCHHING

2023 KUM HLUI THLAHNA

2023 KUM HLUI THLAHNA

                                     HC Lalramdina

          Pathian hruaina avâng liau liauvin kumin 2023 kum tâwp (Ni hnuhnung ber) chu ka lo thleng ve leh ta reng mai! Hriat loh kâr hian hun hi a lo kal chak kher mai tih hi ka ngaihtuah lêt a. Kum khat (Ni 365) hi reilo viau angin lang mahse, kumin chhûng hian thil hrang hrang ka va tawng hnem si em!

          Ka nun ka chhui lêt a, ka hun hman ral tâk te kha ka ngaihtuah lêt a, ka rilrûah zawhna tam tak a lo lût a. Kumin chhûng hian eng thil ropui nge ka hnutchhiah a, eng thil ṭha nge ka lo tih ve le?! Ka hre lo! A ni, ka hre lo takzet!

          Min siamtu Pathian, ka ngaihtuahna, rilrû leh ka engkim hrilh kher ngai lova min hriatpui kilh kelh tu, ka sam zai zât nên lama min hrechiangtu tân hian eng chiah nge maw ka nih le? A beisei ka phâk chiah em? Min siam hi a inchhîr ang nge a lâwm ang? Ka ṭhatna lai ber leh ka sualna zawng zawng te min hriatpuitu hi ka kum hmanral mêkah hian a lâwm ang em? Chhuan theih ka neih lohzia ka in hrechhuak uar uar mai! Ani chuan min hmangaih a, ka tân a nun a hlân a, malsâwmna chhiar sên loh min vûr zâwk si a!

Nun awmzia ka hriat hmain nunna min pe a

Kawng a awm tih ka hriat hmain min hruai a

Ka bo tih inhre lo khawpa ka bo laiin min zawng ṭhîn

Ka rin loh lai che pawhin ka ring leh ang che tih i ring tlat a

Ka chau a ni tih inhre lo khawpa ka zawi hnuin thahrui min pe a

Ka khawharzia hrelo khawpa ka nun a ruah laiin min kan ṭhîn

Kawng diklo ah chak takin ka tlân a ni tih ka hriatloh lai pawhin i kut chakin min chelh dingin, ka hriat ngailoh kawng ṭha min zawh tir a

Thim hnuaia ka awmin êng min pe a

Hlauhna in min chîm laiin min muan ṭhîn

Ka lâwm e, LALPA

          Hun hian ka lung min lên ṭhîn a. Hun hlui, hmun hlui leh nun hluite hian ka thinlungah hmun sâng tak an chang ṭhîn.

          Kum a lo thar ang a, "Kum khatin ka upat belh leh ta," kan tih liam mai mai lai hian, khawvêl aṭanga kan her liam tak tak hun tûr hi a rawn inchhawp hnai tial tial a. Kum khat a her liam rual hian kan vânglai ni leh kan vul lai ni te pawh an liam ve hret hret zêl si a!

          Zan lama Thla leh Arsi ten an kawng zawh ṭhin zawha vânlaizâwl an mâwi zantin lai leh Pangpâr chuai tawh te pawh an rawn pâr vul nawn leh ṭhinna ramah hian, mihringte erawh hi chuan hawikîr tawh lovin kan zinkawng kan zawh zêl a. Kan hringnun chul tawh hnu chu engti kawng mahin tih vul nawn leh theih a ni tawh ngai dâwn silo.

          Tichuan, hun hi a her liam zêl ang a, "Vawiin" tia kan sawi, 'hlim ni leh lâwm lai ni te' hi "Nun hlui, Kum hlui" tiin kan sawi tawh dâwn si! Chatuan hmun min thlen khalh tûra kumin chhûnga hun leh nun kan hman dân zawng zawng ten min her liamsan vung vung tûr te hi lunglênthlâk ka ti mang e!

          Khuareiah chuan he kum (2023 kum) pawh hi hmânlai a la chang ang a. Kumina ka hun hman dânte thlir kîrin tawnmang ang maiin fiahlo riaiin ka la chhuikîr ang a, rilrûah a lo la thar leh ngei ang.

          Nakinah chuan, hun hian thlânah min la hruailût ang a, kan damchhûng ni hi a tâwp tawh ang. Aw.... Hun  liam zêl hian lunglên a va tithui ṭhîn tak êm!

                    HLAWNCHHING

KRISMAS 2023

NAU PIANG ISUA - MI TIN TÂN

                                     HC Lalramdina

          Miten an sawi fo ṭhin ang leh Bible ziak ang ngeiin nau piang Isua hi "Mi tin tân" ngei a ni a. Mi lian leh sâng ber aṭanga mi tê leh mi tlâwm ber thleng huapin mi zawng zawng tân a ni.

          Khawchhak aṭanga Lal thar chibai bûk tûra lo kalte aṭang hian, mi fing leh mi lian deuh te chungah chuan ril tak, chhût neuh neuh, zir chet chet, chhût vang vang ngaiin a pian thu a inpuang tih kan hmu thei a. ("Khawiah nge Judate lal lo piang chu? Khaw chhak lamah a Arsi kan hmu a, amah chibai bûk tûrin kan lo kal a ni," an ti a - Matthaia 2:2) Chutih laiin, mi tê leh mi mâwl deuh zâwk, thil chhût thui ve vak thiam lote hnênah erawh chuan a haia hai rual loh, a hmuha han hmuh ṭhelh rual loh tûrin a pian thu a inpuang tih Berampute hnêna a inpuan dân aṭang hian kan hmu leh thei a. ("Tin, hei hi in tân chhinchhiahna tûr a ni; nausên puana tuam, ran chaw pêkna thlênga mu in hmu ang," a ti a - Luka 2:12)

          Amah chibai bûk tûr pawh hian milian leh mi fing, nei nung deuh te chuan an panna pawh a hla tham a, kal vang vang ngai a ni. (Tin, lal Heroda a lal laia, Judai rama Bethlehem khuaa Isua a lo pianin ngai teh, khaw chhak lama ta mi fingte Jerusalem khuaah an lo kal a - Matthaia 2:1) Mi mâwl leh mi tê te ho tân erawh chuan a inchhawp hnai a, nasa lutuka kal buai ngai lo, hla lo tê ah a piang a, an pan phâk ve mai tûrah amah leh amah a inchhawp hnai a, Berampute tân harsatna a tam lo tih kan hmu. (Tin, heti hi a ni a, Vântirhkohte chuan vâna an kalsan veleh, Beram vêngtute chuan, "Tunah Bethlehem khaw thlengin kal ila, Lalpa'n thu min hrilh lo thleng chu i en ang u," an inti a - Luka 2:15)

Chuvângin, a ni ang.. Krismas vuak vêtah hian mi nei nung te leh tlêma khawsa thei deuh ten midang an kêp ṭhin ni! Chuvâng chuan alâwm hausa zâwk ten hautak zâwka Krismas an hman fo ṭhin le!!

Tlâwm taka ran ina a pian avângin tu tân mah pan a inthlahrunawm loh va, mi chhe ber tân pawh tîmna tûr awm hauh lo tûr khawpa tlâwmin a lo piang a ni. Ran ina a piang te hi lainat hle ṭhîn mah ila, hei aia hmun ropui zâwk ah lo piang chu ni se la chuan keini, mi chhe ho tân hi chuan chibai bûk tura kal ve ngawt a tîmawm thei mai lâw'ng maw? Kan pan ve ngamna tûr tâwkah Pathianin Isua a lo piantir hi Pathian remruat fing, fel leh ropui a tling a ni.

Ran inah ni lo, tute inah emaw lo piang ni ta se, chu a pianna hmun chu tlâwm êm êm pawh ni tehrêng mah se, mihring ina a pian miau chuan, kan mihring rilrû en hian, tute emaw tân chuan a pianna in kha tlawh châkawm loh tak a lo ni maithei a. A pianna chhûng te kha mi fel leh tute pawhin an tlawh pawh ngam leh inhawng tak pawh ni se, mi zawng zawngin an pan huai huai leh an tlawh huai huai kha a rem lohna chinte pawh a awm thei a, mi tin tân a piang lo emaw han tih mai te, tu tu te emaw tân chuan Isua hi phûr taka chibai bûk te pawh a harsat phah thei ang. Chuvâng chuan, Pathianin rem hre taka ran in tlâwm taka a piantir ringawt te pawh hi lâwmna tham a ni.

Kan sual tlan tûra Isua Krista a lo piang hi a lâwmawm êm êm a. A lo pian dân zawng zawng chhût hian a lâwmawm tluan parh a, a chhût thiam thiamin an chhût lâwmawm thiam a, a chhût thiam lo deuh te tân pawh ropui tak, lâwmawm takin kan rilrû mîl tâwk ang, kan thinlung tlin tâwka sânga lâwmawmin a lo piang a ni. Hêng avâng hian Krismas hi a ropui a, nasa taka lâwm tlâk a ni.

Krismas chibai vek ule

               HLAWNCHHING

‌

HLAWNCHHING QUOTE - 43

HLAWNCHHING QUOTE - 43

KRISMAS QUOTE

                                      HC Lalramdina

Mahnia êng chhuak zo tawh lo te

Krismas hian ênna rawn thlensak che u rawh se.

Krismas chibai vek ule

               HLAWNCHHING

KA PIANCHAM PUALIN

KA PIANCHAM PUALIN (6.7.2023)

                                     HC Lalramdina   

   

          Pathian hruaina avâng liau liauvin kum 2023 a ka piancham pha awmchhun chu ka lo thleng ve leh ta reng mai! Hriat loh kâr hian hun hi a lo kal chak kher mai tih hi ka ngaihtuah a. He khawvêla ka la châm rei loh zia leh thil ka tawn hnem si ziate ka ngaihtuah hian mak ka ti a, eng nge he khawvêlah hian ka 'Mission' ni ang aw ti hian ka inngaihtuah fo țhîn.

          Naupang chumchiap tak leh sawngnâwi tak mai dinhmun ațanga mite ngaiha tlangvâl (Vâl senior) dinhmun kan han kai chhoh ve tâk hnu hian mihring hi mahni inngaih ang ngawt kan lo ni lo tih hi ka hrechiang thar êm êm mai a. Keimahni inthlir dân hi midangin min hmuh dân a ni kher lo a lo ni!

          Piancham azawnga piancham ropui ber chu a ni lêmlo. Ka țhiante leh ka chhûngte bâk chu he khawvêl hian ka piang a ni tih pawh min hriatpui ve hauh lo. Mahse, midangin min hriatpui leh hriatpui loh lam ka ngaihtuah lêmlo. Mihringte hunbi chhiara ka piancham ve liau liau a ni e.

          A ho zâwnga ngaihtuah chuan hringnun hi chu a ho ngawt mai. Kan naupan laiin lehkha te kan zir a, kan lo țhang lian a, kum te a lo tam zêl a, kan lo puitling a, chhûngkaw din a, khawsak rêl a lo ngai a, kan lo tar leh a, he khawvêla kan châm chhûng chu a zo dêr chu a ni leh mai a!

          Mahse, chutiang lo lam zâwnga ngaihtuah erawh chuan hringnun hi ropui tak a lo ni. Ramsate ang ni lova, siamtu min lo ruahman dân te hi han chhût chian hi chuan kan lo chungnun bîk zia te hi! Thilsiam dangte aia kan ropui leh sân bîk zia te leh thiam taka a bîk taka duan kan nihna te hi!

          Ka nun ka chhui lêt a, khâng kum tam tak ka hmanral tâk te kha ka ngaihtuah lêt a, ka rilrûah zawhna tam tak a lo lût a. Eng thil ropui nge ka hnutchhiah?! Ka hre lo! A ni, ka hre lo takzet! Ka chhûngte tân Fapa/nau chhuanawm ka ni em? Ka u leh naute tân entawntlâk ka ni takzet em? Țhiante tân țhian ngainatawm leh rintlâk, an innghah ngamna ka ni em? Khâng kum ka hmanral tâk zozai te kha, eng thil ropui tehchiam tih nân nge ka lo hman le?!

          Țhiante zînga a huai pawl nih ve si loh chuan nungchang te hi a engemawti țhat rûk phah phian thei emaw ni?! Mahse, eng he hu ka nihpui ka hre lêmlo va! Mi tlâktlâilo intih chu ka inphal bîk lova; mahse, mi țangkai intih chu ka ngam bawk si lo! Mi suaksual ka nih ka inhre lova, mifel intih ngawt lah ka tîm deuh si! Ka nu leh pa leh ka chhûngte leh ka țhiante min hmangaihna te hi ka chhânglêt țha tâwk em? Nge an tân phurrit mai ka lo ni zâwk? Ka ngaihtuah ngai loh hlir ka inzâwt vêl a! Khâng ka kum hmanral zozai te kha eng atân nge ka lo hman țhin le?!!!

          Min siamtu Pathian, ka ngaihtuahna, rilrû leh ka engkim hrilh kher ngai lova min hriatpui kilh kelh tu, ka sam zai zât nên lama min hrechiangtu tân hian eng chiah nge maw ka nih le? A beisei ka phâk chiah em? Min siam hi a inchhir ang nge a lâwm ang? Ka țhatna lai ber leh ka sualna zawng zawng te min hriatpuitu hi ka kum hmanral tâk zawng zawngah te khân a lâwm ang em? Chhuan theih ka neih lohzia ka in hrechhuak uar uar mai! Ani chuan min hmangaih a, ka tân a nun a hlân a, malsâwmna chhiar sên loh min vûr zâwk si a!

          Ka ngaihtuah chian poh leh ka chunga rinawm tlat, min phatsan ngai lotu leh min chênchilh tlattu Pathian ka nei hi vânnei ka inti țhîn. Ani'n min hnaih a duh a, thil chi hrang hrang hmangin min kar a, keiin ka hlat lui zêl a, amah hlat thei ang bera awmsan ka duh apiangin amah ka mamawh zual zêl a lo ni!

                    HLAWNCHHING

HLAWNCHHING QUOTE - 42

HLAWNCHHING QUOTE - 42

KHAWHARNA ZIAKFUNG

                                       HC Lalramdina

Ziakmi ni lo mah ila

He hringnun zinkawng hian ziakfung min châwitir si a

Suangtuahna khawvêl chu zau hle mahse

Tah chuan ipik taka min chêntir in

Khawharna ziakfung min châwitir leh țhîn!

                    HLAWNCHHING

HLAWNCHHING ȚAH HLA - 29

HLAWNCHHING ȚAH HLA - 29

I KUTZÂLA TLA KA LO NI E

                                        HC Lalramdina

Duh tak, Eli...

Ka tân lêm vêl chiam che a rem si lo

Mahse, ka rilrû âwm ang tûr chu i hria e

I huatthu sawi ka hlau va

Ka ngaihtuahna erawh thunun a har si

Lêm vêl chiam dâwn che ila, ka dinhmun leh i dinhmun ka thlir a

A âwm in, a ang si lo

I zûn zâmah chhâwl angin ka uai zo va

Tha erawh ka tițhum ve ngawt thiang si lo

Beiseina kâwl êng tûr awm lo mahse

Bei erawh a dawng phal chuang si lo

A tâwp a tâwpah zawng, engkim hi

I kutzâla tla a lo nih tâk hi!!!

(Dedicated to - Elizabeth Lalthanpuii)

                    HLAWNCHHING

HLAWNCHHING ȚAH HLA - 28

HLAWNCHHING ȚAH HLA - 28

I HMANGAIHNA RUAH RAWN SÛRTÎR RAWH

                                        HC Lalramdina

Duh tak, Eli...

He thinlung, ramngaw țha tak ni țhîn kha

I vât a, i hâl bawk a

A kâng duai duai a ni ber e

Kâng țhelhtu an awm bawk si lo

I hmangaihna ruah rawn sûrtîr ta che?

(Dedicated to - Elizabeth Lalthanpuii)

                    HLAWNCHHING

HLAWNCHHING ȚAH HLA - 27

HLAWNCHHING ȚAH HLA - 27

KA VA NGAI DÂWN TAK CHE ÊM!

                                        HC Lalramdina

Duhtak Eli,

Fûr a liam ang a, favâng hun nuam tak chu kan thleng leh ang. Favâng Ni êng no nghulh hnuaiah kan thawnthu neih ve chhun tlêmtê te kha an lo inlâr thar leh ang a. Vânlaizâwla Chhawrthlapui mâwi theih tâwpa a lo ên hunah chuan kîr leh ngai tawh lo tûr kan nunhlui te kha ka chhuikîr ang a. Chutih hunah chuan, i hlimthla leh biahthu kûrpui chung zêlin i sakhming ka lam nawn leh țhîn ang a, ka va ngai dâwn tak che êm!

Hun te a liam zêl ang a, thlasik anga khêl lova thleng țhîn thlasik khaw vâwt vîn tak mai pawh kan thleng leh ang. Vân sâng tak maiah khian thlasik zinkawng a inzam paw leh chiai ang a, chutih hunah chuan, suangtuahnain in rûn min hruai thleng ang a, mahse, duhthusâm beisei bo mai a ni tawh dâwn si. Tlângsâm leh Zapanhlo ten dai an cheimâwi leh ang a, chutih hunah chuan, dai mal far leh ka suihlunglên mittui an far za leh dâwn a ni. Chutih hunah chuan, ka va ngai dâwn tak che êm!

Hun inher zêl hian thlasik hun herliampui in nipui hun pawh a rawn herchhuahpui leh ang. Khawvêl hi a reh ngui ruai ang a, i zûn ngaih lunglên a rawn thar leh ang. Romei te pawh a zâm paw leh chi chiai ang a. Râl lehlama tlâng te chu romei chuan a bâwm leh chi chiai ang. Fârțuah leh Vaube an pâr vul leh ang a, sûlhnu kan hnutchhiahna tlâng leh mualah te chuan lunglênna Leltê a kiu leh awn awn țhîn ang. Chutih hunah chuan, mittui nên i hlimthla ka thlir țhîn ang a, hrilh a hai in ka va ngai dâwn tak che êm!

Nipui hun duhawm a liam ang a, fûrpui hun a lo herchhuak leh ang. Fûr khaw thiang êng no ri riai a lo herchhuak ang a, thangvân sângah fûr khaw thiang Chhawrthlapui êng mâwi tak mai a lo êng leh ang. Aw... Lunglênna leh thinlung natna ten fûr ruahtui ang maia he taksa dawldâng tak mai hi zahngaihna nei lêk lova a nan huh zawr hnêp hunah chuan, i țâng nêm ngaiin fûr ruahtui leh ka lunglên mittui an far za ang a, ka va ngai dâwn tak che êm!

(Dedicated to - Elizabeth Lalthanpuii)

                    HLAWNCHHING

HLAWNCHHING ȚAH HLA - 26

HLAWNCHHING ȚAH HLA - 26

HMANGAIHNA HLAWHCHHAM

                                        HC Lalramdina

Hringnun duhâmnaa khatah hian

Ka duh ber ni tûrin a lo piang a

A thinlung ram luah tumin ka hmanhlel a

Hmêlma dârfêng rual ianga dan chah ka ni si

Laifei chengrâng châwia luah theih ram ni se

Dârfêng vâl rual sâng tam ka ruai ngei ang

Sawi tam avânga ka luah theih ni se

Vawi tam tak sawi tûrin ka kâ ka âng ang a

Sawi nawn fo ka ning dâwn si lo

"Ka hmangaih che" tih hi

Mahse, a tâwp a tâwpah chuan a tâwp ta nge nge si a

Hei chu a tak, a lem atâna ka awh êm êm a ni ta!

                    HLAWNCHHING

HLAWNCHHING ȚAH HLA - 25

HLAWNCHHING ȚAH HLA - 25

          HRIATRENGNA PANGPAR

                                        HC Lalramdina

Eng tik niah emaw chuan...

Ka hringnun kawng chhuk chho hi ka zawh tâwp hun a lo la thleng ang

Mi ten, "Mihring," tia an sawi țhin kha

"Mitthi," tia sawi ka ni tawh ang

Lei vaivuta siam kha

Lei vaivutah bawk ka kîr leh tawh ang

Ka lei taksa ka thlah liam hunah

Hringnun piah ram ka kai hun chuan...

Hmangaihna mita thlîr țhîn tu che mit hi a chhîng hlen tawh ang a

Nang ngaia ka mittui luang hi a hul tawh ang

Duh taka i hming ka lam țhinna ka aw hriat tûr a awm tawh lovang a

Ka hmangaih thu ka hrilh țhinna che ka kâ hi a chîp hlen tawh ang

Duh taka ka kuah țhinna che ka bân hi a kuangkuah hlen tawh ang a

Him taka i hnên min hruai thleng țhîn tu ka ke pawh hi a châwl hlen tawh ang

I aw mâwi tak, duh taka lo ngaithla țhîn tu ka beng hian i aw a hre thei tawh lovang a

Lung chim taka ka fawh țhinna che ka hmui pawh hian lumna a nei tawh hek lovang

Chutih hunah chuan...

Nang ngaia zânmu chhîng lo

I kianga tlâini lên châka 'Mahna' tia beiseina nghâktu

A hmangaihna leh a thinlung hlântu che hi...

A tân hriatrengna Pangpar pakhat tal rawn hlân ve la

Thlamuang taka châwl tûrin duhsakna rawn hlân ve ang che aw?

                    HLAWNCHHING

HLAWNCHHING ȚAH HLA - 24

HLAWNCHHING ȚAH HLA - 24

        HRINGNUN BEIDAWNTHLÂK

                                        HC Lalramdina

Lang theia lemchanna, chhûngrila țahna

Hmuh theiha pang dam, chhûngrila dam lohna

Kal hmasate'n an paltlang nun khawhar chu

An chauhna kâwlrâwnah ngei an hniak chu chhuiin

Hma lam pan tûrin chakna rêng ka nei si lo

Naktûkin beiseina vûng a chhuah lo va

Kum tamna pawh lungngaihna mai a ni!

Ka pian ni chhûl hi reh pin ni se la aw...

Chhûla a keu ni a her chhuak lo tûr!

                    HLAWNCHHING

HLAWNCHHING ȚAH HLA - 23

HLAWNCHHING ȚAH HLA - 23

                    HAIDER TU

                                        HC Lalramdina

Mi pakhat a awm a

Mi sâng tam tak aia ka hlut chu

Ka engkim ni se tia ka suangtuahna luahtu chu

Mahse, haider tu tluka hrilh hriat har an awm si lo

                    HLAWNCHHING

HLAWNCHHING QUOTE - 41

HLAWNCHHING QUOTE - 41

          2021 KUM THAR QUOTE

                                        HC Lalramdina

He kum thar ah hian...

I hringnun thawnthu i ziak leh dâwn a

I ziakfung Isua hûmtîr la

Nawhreh ngai lova chhiar tlâk hringnun thawnthu a ziahpui ngei ang che

                    HLAWNCHHING

MANGȚHA, MARADONA

MANGȚHA, MARADONA

(Diego Armando Maradona (30 Oct 1960 - 25 Nov 2020) thlah nân/A pualin)

                                       HC Lalramdina

          October 30, 1960 khân Argentina khawpui Buenos Aires khaw daia  Lanús-ah naupang danglam bîk a piang a, a pa hming chu Diego Maradona a ni a. An fapa hmingah Diego Armando Maradona an sa a, he naupang hian kum 60 a tling ta. Khawvêl a awm chhûng leh Football an pêt chhûng chu hming ropui ber zînga mi a ni kumkhua tawh ang.

          Mirethei chhungkua ațanga seilian ni mahse, Football thiamna lama a hausakna erawh khawvêla a ber a ni.

          Kum riat mi a nihin Football coach pakhat, Francisco Cornejo chuan a hmu fuh a, a chanchin ti hian a sawi zui, "Thilmak ka hmu. 1969 khân Inrinniah ruahsûr hnuaiah kum riat mi inkhêl ka hmu a, khatiang kha ka damchhûngin ka la hmu ngai lo... Naupang taksa ni mah se, puitling ang maiin a inkhêl a, kum riat mi lek a ni tih kan hriat chian hnu kha chuan amahah khân kan insâwrbing ta ngar ngar a ni," a ti. He pa hi Maradona thiamzia hmutu mi vânnei hmasa a ni a, khawvêl mipui dang zawng hi mi vânnei hnuhnung kan ni e.

          Mahni puala 'Kohhran' nei thei ngat, kum 2000-a 'FIFA Player of the Century' atâna Pele nêna an thlan kawp hi Footballer piang tawha ropui ber a nih leh nih loh hi statistics-in a hrilhfiah zo dâwn lo va, a goal thun zât leh a game khelh zât ațanga teh theih a ni hek lo. A hunlai mîla teh a ngaih dâwn avângin inhnialna tâwp thei lo erawh a ni ang. Chutih rual erawh chuan, kei chuan, Maradona aia thiam tih Footballer hi ka nei bîk miah lo!

          Kum 16 a pumhlûm hmain Argentinos Juniors tan professional football-ah bul a țan a. A club hmasa ber Argentinos Juniors hian Maradona hi an chhuang khawp a, an stadium hmingah 'Estadio Diego Armando Maradona' tih an vuah a, stadium luh dâwnah, "Khawvêla Footballer piang tawh zînga thiam ber chuan October 20, 1976 khân he Stadium-ah hian a Football hun bul a țan," tih an ziak!

          Khawvêla Footballer man to ber ni tûra Barcelona-in an lei khân 22 mi lek a la ni a, 1983-a El Clasico-a goal a thun hnua Real Madrid fans-in kut bênga an lawm khân, Barca player zînga Real fans-in kut bênga an lawm hmasak ber a ni.

          Khawvêla player man to ber ni tûra Barca a zawm hnuah Khawvêla Footballer man to ber ni tûr thovin Italy-a 'Club tenau' Napoli-in an lei. Maradona hi Argentine mah ni se, Naples khaw chhuak anga ngaih a ni mai lo va, Naples-ah amah aia ropui leh hmingthang hi an la awm lova, an awm leh tawh lo vang.

          Napoli club a zawm ațang hian Napoli inkhêl entu an pung a, an result a țha chho zêl a, 1986-87 ah a vawi khatna atân Napoli chu Serie A champion an ni ta hial mai. Italy-ah hian Football-a champion hi an lâwm tawh țhin a, World Cup-a an champion hial pawh an lâwm a; nimahsela, Serie A-a Napoli champion Naples khaw mipuiin an lawm anga ropui hi a la awm ngai lo, thla khat chuang an lâwm an ti!

          Italy-in 1990 World Cup an thlen ṭum țum khân Naples khuaah ngei mai hian Italy leh Argentina chu semi final-ah an inhmachhawn a, 'Naples khuain țan zâwk tûr a hre lo' an ti hial a, Naples khaw mi tam tak chuan Maradona vângin Argentina chak kha an lâwm tho an ti!

          Napoli a chhuahsan hnu hian Spain ah bawk kal lehin Sevilla a zawm a, a hun tâwp lamah Argentina-ah kir leh in, Boca Junios-ah a club football hun hnuhnung a hmang ta a ni.

          Diego Maradona hian Argentina tân vawi 91 khelh ah goal 34 thunin Football inelna dawhsân a ngaihhlut ber World Cup vawi 4 ah a inlan hman a, kum 1986 khan Captain ni chungin final ah khatih hunlaia Football Power House Germany hneha Champion Trophy châwiin 'Golden Ball' leh 'Best Player' atân thlan a ni.

          Kum 1986 World Cup quarter final ah England 2 - 1 a an hneh țumin goal 2 thunin, he goal 2 hi khawvêl awm chhûng chuan thaibo a nih a rinawm tawh lo. 

          A goal hmasa zâwk hi tûnlai technology changkang la awmlo in a kut hmang mahse, he goal hi 'HAND OF GOD' tih hial a vuah niin a thiamna phhochhuak tûrin a goal 2 na thun tûr hian yard 66 ( ft 60 ) zet ball a tlânpui hnuah a thun leh a ni. He goal hi kum 2002 khân "Goal of the Century" ah FIFA.com chuan Voters kaltlanga thlan a ni nghe nghe a ni.

          Football khawvêla mi lian, a hunlai khawvêlah na na na chuan a damrualpui mihringte a zûna uai tir deuh vek thei khawpa Football khêl thiam kha a ni a. A bîkin keini mizote ngat phei hi chu Football ngainatna ruama min hnûk lût a, World Cup ngaihsânna tlâng chhîpa min chuan chhuah tirtu a ni a tih theih hial âwm e.

          Feet 5 leh inches 5 chauha sâng a ni a, heti chung hian palian feet 6 chuang te pawhin lu hmanga ball vawrh pawh an tauh khalh thei chuang lo, pumrua lian lo ni mahse a țuan a rang a, a ball ken a nghet țha hle a, mi bum a thiam a, a khelhpuite 'foul' pêk a thiam a, a team tân a țhat zâwk dâwn chuan a tlu der thiam hle a, tlûk a țhat loh hunah erawh chuan tihtlûk hleih theih a ni lo thung.

          He footballer hmingthang leh thiam bîk hi mihring ve bawk a ni a. Argentina rama mirethei fapa, zirna lama thiam sâng bîk lo kha Khawvêla Footballer manto ber niin social media leh smart phone chhuah hma daih tawh khân lâr namên lovin a lâr a, tûnlai angin inenkawlna leh enkawltu țha an la nei bîk lo nên, 'Lâr a zo lo' ti pawhin a sawi theih hial ang. Cocaine ruih a chîng ta tlat mai a. Barcelona-a a awmlai khân a chîng țan niin an sawi. Drug test paltlang zo lo Maradona chu mualpho takin an man chhuak ta a, 1991 khân thla 15 zet inkhêl thei loa hrem a ni.

          Zu bâwihah a tâng chhunzawm a, ei luat tuar loin a hrisêlna a tlahniam a, a rilrû lam a nghawng chho a, a tâlbuai hle a ni. Maradona meuh pawh a pualin 'Kohhran' hial NEI mah se,, mihring mai a ni tih a chiang a, chak lohna langsâr tak a nei tih khawvêlin a hriatpui.

          Tunah chuan kum 60 a lo tling ta. Mihring pangngai tân pawh 'Pension kum' a lo ni ve ta reng mai. Hmânni lawk khân a piancham, kum 60 a tlinna an lawm nghe nghe kha.

          Footballer Maradona hi a mihring mihrinna lamah chuan entawn tûr nungchang a nei lêm lo va, a tlangvâl lai pawha 'Kohhrana inhmang' a ni lêm lo va, a mimal nunah ngaihsân chiamna tûr a awm lo a ni mai thei e. A Football nunah erawh chuan 'Hei aia thiam hi an piang leh thei ang em?' tih hi khawvêlin an zawh kumkhua tûr a ni tawh ang.

          Khawvêl media lian zawng zawng tih theihin November 25, 2020, India ram sanaa zân dâr 10:00pm bâwr vêla Argentina leh khawvêl Footballer ropui Diego Maradona thih thu an puang a. Benavidez Veng Buenes Aires khawpui hmâr lamah a inluahah lungphu châwlin a thi a ni. Maradona hi a thluaka thisen khang chu tûn thla November 3 khân zai a ni a, a dam chho viau  tawh a, niminin lam khân lungphu châwl (heart attack) in a awm phut a, a nunna an chhan zo ta lo a ni.

          Maradona hian fanu pahnih neiin, a nupui nên hian an ințhen tawh a. An chhûngkua hi thlahtute ațanga Kristian niin, Roman Catholic kohhrana lâwi an ni.

          Maradona thih thu, thu lungchhiatthlâk tak hi Argentina TV thu puangtute chuan puan harsa an tiin, hnuk ulh țeuh leh mittui tla pûr chungin an puang a. Argentina ram chuan ni thum chhûng an sûn tûr thu an puang a ni. 

          Argentina president Alberto Ferńandez chuan, an ram national TV ah, "Vawiin hi ni duhawm lo tak a ni, Argentina mi zawng zawng tân lungngaihna ni a ni, Maradona ang midang hi kan hmuh leh pawh ka ring tawh lo," a ti hial!

          Vawiin hian thi mahse Football khawvêla a sûlhnu hnutchhiah erawh hi chu khawvêl awm chhûngin sawi a ni tawh ang.

          Gracius par haber existido, Diego. Te vamos a extrañor toda la vida.

          Thlamuang takin châwl ang che.

          MANGȚHA, MARADONA

                    HLAWNCHHING

HLAWNCHHING QUOTE - 40

HLAWNCHHING QUOTE - 40

               KA HRETHIAM LO

                                        HC Lalramdina

Ka hrethiam lo, a hlut êm êm emaw

Ka nitin hi a tân ka serh fo si!

                    HLAWNCHHING

HLAWNCHHING QUOTE - 39

HLAWNCHHING QUOTE - 39

          HRINGNUN HAHTHLÂK

                                        HC Lalramdina

Hringnun hi chu a hahthlâk ngawt mai...

A harsa lai leh a khirhkhân lai zawng zawng kan paltlang hnuah pawh kan la thi dâwn tho si a...

                    HLAWNCHHING

HLAWNCHHING QUOTE - 38

HLAWNCHHING QUOTE - 38

               HRILH TI HAI

                                        HC Lalramdina

"I tân Siar lâk ka huam," i tih lai khân

I Camera i phawrh ang tih ngaihna rêng rêng ka lo hre lo va!....

                    HLAWNCHHING

VÂNRAM KAWTCHHUAHAH

VÂNRAM KAWTCHHUAHAH (Ka țhianpa Tlawmlova hriatreng nân)

                                         HC Lalramdina

I hlimthla thlirin

Kan nun ka dâwnkîr a

Kan duhaisâm zawng te'n

Mual min liamsan mahsela

A aia nuam zâwk chu hmunah chuan

Kan intâwk leh dâwn nia

Kei pawh ka hringchan ni a tâwp hun chuan

Lalpa buatsaih ram chu ka rawn pan ang

Vânram kawtchhuahah min lo hmuak la

Hlim taka kan inhmuh leh hun chuan

"Țhianpa, i dam maw?" tiin

Ka kuah vawng vawng ang che

                    HLAWNCHHING

HLAWNCHHING QUOTE - 37

HLAWNCHHING QUOTE - 37

               LOCKDOWN QUOTE

           (Corona Virus/Covid-19)

                                                 HC Lalramdina

(Pic - Village Level Task Force : Ramthar, Taitesena Section, Falkawn Duty)

Khuavêl hringmite cho rual loh hripui

A sakhming ah an sawi Corona Virus

Khuavêl kil tin kil tang hrût chhuakin

A lêng vêl e tlâng tin mual tin hrût vêl e

Rûn ram iangin vângkhua a ngui

Mual tin mâwitu zalêng an țîn

Sûl ang an haw rûn hliapah

Engtik ah tak kian zai rêl ang maw?

Hmuh theih changin tawn theih ni se dorâl ang hian

Lungngaih, mangan, buaina, thihna thlentu Covid-19 hi

Chengrâng châwia dâr ngênmu hlan ka nuam mang e

Hnehna Hlado chhama laitual kan lên theih nân

                         HLAWNCHHING