A dai hlen ta emaw ka lo tih, hmâna ka hmangaihna che kha thinlaiah Ai ang a thar leh thin; Kum sûl sawm pawh liam tawh mahse. Lunglai hal vanga inthente pawh hian inrem châng chu an nei thin a sin. Theihnghilh ka duh êm êm thil ni mahse, ka hriat reng tawh tur ni si chu. Khâng hunte kha ka tan chuan hun hian a liampui ve theilo a nih hi maw. Tar kûn, khûpbih, ngalfîma kan la dam ve anih ngai chuan, kan nunhlui kan chhuikîr châng apianga thlasik anga khêl lova lo thar tur a ni tih erawh i suangtuah ve tho hian ka ring thin. Tunah chuan kan pahniha ka ta kan in tihtawnna awm thin "Neitu" nihna kha a bo zo ta si. Ka hun leh nunte chu mahnia hman a lo tûl ta si a. Rinawmna kan lo tiam dun tawhte kha sût leh mai tur chuan kei zawngin ka thei ve lo a ni.
Khuarei hian min hnêm an lo ti thin a, mahse, hun tam, kum tam a vei hnu pawh hian ka va dam si lo êm!!! Kan nun hlui, hlui thei silo te kha ka chhuikîr a. Buaina ten min chîm hma leh enghelh nei hauh lova kan hlim lai hunte kha... Mahse, tunah chuan kan kâr a hlain mual tam takin min kar dan tawh si... He nun khawhar tak hian vawi tam tak ka hmangaihna thu hrilh nawn leh che ka duh thin. Mahse, min chhâng tur i awm tawh silo. Nang chu i tha ang tiraw? A ngai tein keimah bawk ka lo inngaihtuah leh thin. Min kalsan hmaa i nundan ang khân i la nung reng nge, nun thar neiin khawvel thar i din tawh zawk.???
Hlim reng la, khawvela thil tha zawng zawng hi nei vek thei la ka van ti tak êm!!! Hlimna hi suma lei theih chu ni se, ka nunna hial pawh ka dahkham mai tur. I hlimna anih dawn phawt chuan i hriatreng tlâk loh kei hi chu min theihnghilh tawh zâwk mai rawh. Keipawhin khâng kan nunhluite kha tahpui fovin, rilru nâin awm fo dâwn mahila, i hlimna tur anih dâwn phawt chuan, hmangaihna avâng zâwk chein he ka hriatrengna hi i tân hnawksak lo turin thunun ka lo tum tawh zâwk ang e. I hmangaih ni thei tawhlo mahila, hlimna leh nuihna tam tak min pêk avang leh, hriatreng tur thil tam tak min huntchhiah avang hian ka lawm e. I tel lova dam khawchhuah chu a va har dâwn em! Harsâ ka tih thin êm êm chu, i hmel mawi tak ka hmuha i sulhnû hlui thei silo ka thinlunga thar reng si hi a ni.
Kan hun tawnin a zir miau loh chuan duh reng chunga in kalsan hun a lo her chhuak a, hmangaih reng chunga in liamsan a lo ngai a, ngai tak chunga in thlah a ngai a, hre reng turin in theihnghilh luih a lo tûl si thin a nih hi.
I tân khuanu malsâwmna dîl chung zêlin, harsa tak chungin 'Mangtha' tih a ngai ta si! Nakin hun ngaihtuaha tu emaw No 1. ni tûra han thlah liam mai che zawng rilru chhungril hian ava thîk si êm!!! Mahse, thîkna ringawtin khuarêl a dang zo thei mawlh silo. Tunhmâa, "I tello chuan," tia insi riala hringnun hmang thin kha khuareiah, "I dam maw?,'' tih chauh sawi a rem tawh dawn a ni tih ka ngaihtuah châng phei chuan, hringnun hi a fair mawlh lo tih a awl thin mang e. Chumi hunah chuan, hmâna pumkhat emaw inti kha mikhual ang maiin kan ti zo tawh ang a. Hmâna a kip a kâwia biahthu sawi dûn thin kha, a rûl tâwk leh a tûl chauh sawia inchhâwn a ngai tawh ang a. Lamkâwiah sakhmel intawn chângin thinlaiah, NUNHLUI a rawn thar leh ang a, i kut vuana CHIBAI ringawt pawn thu ava sawi tam dâwn teh lul êm!!! I kal liam hma loh zawng râl atanga en vawng vawng che i hlawh dâwn si a. Sawi duh leh hrilh duh tam tak nei mahila, a zawng zawng sawi erawh a rem tawh lovang a. I chanchin hre châk si, hriat erawh hreawm ti chung siin hun ka hmang liam tawh ang. I sakhming hriatchhuah châng apiangin hmâna ka HMANGAIH kha thinlaiah i rawn thar leh thin ang a. Kan nun dan thin, nunhlui leh sûlhnû zawngte chuaiin ral tawh mahse, he ka hringnunah erawh chuaiin a ral ve ngai dâwn si lova, "Di HLUI" tia hriat reng i ni tawh ang.
Khatih lai khân ka hmangaihna min dîl a, keichuan, hmangaihna bâkah ngaihsakna nen lam ka pê che a, mahse, i hnên atang chuan natna bâk ka hmu si lo.
Theih ni se lengdûn leh thei ila, khâng hunte kha kum tam takin liampui tawh mahse, ka hriatrengna te chu a liam ve tawh ngai lovang.
Kan suangtuahna leh duhthusâm zawng zawngte kha suangtuahna mai mai, engtik lai maha thleng ngai lo tur maw a lo nih le? I tel lova ka awm theih loh pawh ka lo hre lova, mahse, i tel lova ka awm theih loh zia chu min kalsan ni khân ka hria a ni. Chhûngrila a nat zia ka lo hrethiam phâk lo a ni. Mahse, tunah chuan ka hre ta. I kianga awm ve theih ka van châk tehlul êm! Min ngai a ni tih min hrilh leh la, keipawn ka ngaih zia che hi ka hrilh nawn mawlh mawlh ang che. Mahse, chu chu engtik lai mahin a thleng tawh dâwn si lo; He lei hrehawma ka awm chhûng hi chuan. He khawvel nuam ka lo tih thinna zawng zawng kha nang i lo awm vâng mai a lo ni; I awm lova he ka chênnaah hian min tihlim zo rêng an awm tawh lo a ni. Ko kir leh thei che ila ka van ti tehlul êm! Ka ngai thei lutuk che a sin! Ka ngai lutuk che.
HLAWNCHHING
