KA NU, KA HMANGAIH CHE

Ka Birthday pualin - Ka Nu hnêna ka lawmthu sawi nan

          Vawiin ka Birthday (6 July 2016) a lo thlen hian, a hmasa berin Pathian hnenah lawmthu ka sawi a. Tin, ka nu, i hnenah pawh lawmthu ka sawi a, 'MHIP Day' chibai ka bûk a che. He Ni hi hlim taka hmang turin ka duhsakna sâng ber ka hlân bawk a che. Ka nu, i tan hian tih theih ka va nei tlêm em! Min hmangaih zia hrechiang hle mahila, hmangaih lêt dan che ka thiam si lo. He ka thuziak mâwltê hi ka hmangaih zia che lantir nan i tan ka hlân e.

          He khawvelah hian nu tam tak an lo awm tawh a, an awm mêk a, an la awm zel bawk ang. Mahse, ka nu hi chu vawikhat chiah a awm dawn si a. Ani chuan tunah hian min la dampui mêk a, nitin hian a hmangaihna ka la dawng mêk zel a ni. Ka nu hi mi Nute anga fing, lehkhathiam leh zir sâng ni lêmlo mahse, ka nitin nun min chhiarpui a, ka hma hun turte min chhût sak ve fo thin. Ka pian atanga vawiin thleng hian min hmangaihna a la danglam ngai lova, kei min hnualsuatin midang fa a awt ngai lo.

KA NU,
             Ka tâna i thiltihte leh i tâna ka thiltih beitham takte hi inhen lo hle thin mahse, nang chu ka lakah lungawina khawp hmu thei tura dawhtheihnaa thuam i nih avangin ka lakah hian vuivâina rêng i nei ngai lova. Humsual ka dai châng pawhin beidawng mai lovin, ka insiamthat hun nghâkin dawhthei takin min tawngtai sak thin a nih kha. Ka thinrim chângin ka vin che a, ka tihtauh khum che a, mahse, nang chuan min thungrûl ngai silo. Hmangaih thinlungin min tawngtai sak zawk thin a nih kha. Inthlahdah nun ka neih lai pawha khawngaihna dahthaa, hmangaihna thinlung khauh tak leh zilhhauna thlum si hmanga min kaiharh thintu ka Nu, ka tan hian "NU THA BER" i lo ni e. I phû tâwk hlimna pêk theih che hi ka va duh thin tak êm! Nikhua ka hriat ve hma pawh khân, ka tân hian thil tam tak i lo ti fo thin. Ka lum theih nan khawvawt i tuar a, ka puar theih nan riltâm i tuar thin. Tui taka ka mut theih nan i tlaivâr fo va, ka damloh in min enkawl a, ka tan i theihna zawng zawng i hlân thin. Ka bawrhsâwm laia duat taka i kutin min chûlna tluka 'Damdawi thlum' hi a awm thei ang em ka hre lo. Mi Nute anga lehkhathiam, duh duh nei thei khawpa hausa, hrisel leh vun nung sâr khawpa inenkawl thei ni ve lo mahla, i kut leh ke te pawh i hnathawhna avangin lo thapin lo hriam mahse, i vunte pawh nisa leh khawlum i tawrh nasat avangin lo thim ta deuh pawh nise, Sâp tawngte pawh lo lam sual nawk nawk thin mahla, Nu dang ka duh chuang lo. Piang nawn leh dawn pawh ni ila, nangmah tho hi ka Nu ni la ka la ti fan e. Khawvel dangah te hian lo piang nawn leh dawn pawh ni ta ila, nangma chhûl chhuak tho nih hi ka la duh cheu vang. Harsatna tam tak ka hriat ve loh pawh i paltlang ngei ang, Pathian i tih tlatna avang hian ka zah che a, ka nu i ni a, ka entawn tlâka i nung hi ka chhuang tak zet che a ni.

          Vawiin thlenga min la dampui avang hian ka lawm a, ka mamawh chânga "Ka Nu" tia koh tur i la awm leh ka hlimni leh lawmnia min lawmpui tur leh, ka lungngaih, mangan nia min hnêm tura i la awm hi ka vannei hle a ni.

               Ka Nu, ka hmangaih che.

                    HLAWNCHHING