Tunlaia thumal lar tak mai chu 'CHANGE' tih hi a ni. Mi te ber atanga a lian ber thlengin tawng kauchhehah kan hmang nasa hle mai a. Political platform atanga Pulpit tlâng thlenga sawi hlawh tak thumal a ni. He thumal, 'Change (Thlâk thleng/Danglamna)' tih hian kan nun a tha zâwnga hmasâwnna hi kan tinzâwn ber dawn a ni.
Danglamna duhin miten ngaihtuahna nasa tak sêngin thil an lo ti a, chân an huam a, hlêp an ngam avangin danglamna rah an hmu a, an têl thin a ni. Kalphung ngai tha ti tlat chi kan awm a. Khawtlâng roreltûte zîngah leh Kohhrana thuneitûte zîngah kan tam zual niin a lang. Mahse, danglamna siam ngam khawpa dawih ngam leh huai ngam erawh kan tlêm leh viau lawi si. Chutihrual chuan, danglamna chuan kalphung ngai tha nia kan hriatte erawh hlamchhiah lo sela. Mi thenkhat chuan, mi hmai êng kan zah lutuk avângin danglamna kan siam ngam lo a ni thei. Mi hmai sa kan tâwn ngam loh avangin danglamna kan siam ngam lote pawh a ni thei bawk a, then leh rual kan ngah avângin danglamna kan hlen ngam lo a ni thei a, mi hmuha mawi loh hlauh luat avângin emaw, khawi pawl leh kohhrana kan tlâktlum loh hlauh luatah danglamna ngawih bopui kan awm teuh pawh a ni thei. Hei erawh theihnghilh lo ila, kan zavaia that tlânna tur a nih dawn phawt chuan huaisen taka hma la ngam tur leh danglam ngam tûra kan inbuatsaih erawh a tûl hle a ni. Chutih rual chuan, a chhe ber atanga a tha ber thleng kan ngaihtuah thiam pawh a tûl tho mai.
Eng nge danglamna chu ni a, engvangin nge kan danglam ang a, khawiah hian nge danglam a ngaih a, danglamna hi tu siam tur nge ni ta ang le?
Ngaihdân leh pawmdân hrang hrang nei mihringte hi hmasâwnna lam pan zêl chungin kan nung a, mihring khawsak changkâng zêl hian nunphungah danglamna nasa tak a thlen chho mêk zêl bawk a. Hmâna mite tihdân kan chînzui ngai lêmloh tam tak a awm tawh a. Hnualsuata duh loh vâng lam ai mahin, a tûl lem tawh lohna avâng zâwkin thil tha nia kan lo ngaih thin tam tak kan kalsan tawh a. Chutiang bawkin, tunlai khawvêl changkâng zêl hian thil thar, tha leh awlsam zâwk a rawn her chhuahpui ve mêk bawk a. Tunlai khawvêl changkânna leh hmasâwn chak tak kara chêng mêk mihringte hian he hmasâwnna mîla a ruala ke pên kan thiam pawh a hun ve tawh hle a ni. Mihringte hian mize hrang hrang kan pianpui a, kan khawsakna leh kan thil tawn danglam ang zêlin kan nunphung hi a inthlâk danglam ve thin a ni.
Kan khawtlâng nun chhe mêk leh sakhuana dal mêkte han thlir hian, siam that tûr leh tihdanglam tûr thil tam tak a awm hian ka hre ve thin. Mimalin a tan loh avângin chhûngkuain zawmna châng a hre lova, khawtlângah a kângkai a, ram leh hnam thlengin a nghawng ta thin a ni. Zirtirna tha taka chawm len nia kan hriatten ram leh sakhua min hruai mêk chung pawh hian hmasâwnna hmuh tûr a tam lo hlein ka hre ve thin. Eng pawh nise, a pawimawh ber chu kan rilru hi a ni. A taka kan chêt chhuahtir chu kan rilru ina a ngaihtuah rah a ni fo thin. Kan ram a hausa lova, kan nunphung pawh a la sang lo viau pawh a ni mai thei. Ram changkângte awm dan chu hmu vek mah ila kan la phâk rih lo pawh a ni thei e. Amaherawhchu, kan phâk ang tâwk leh kan theitâwpa hmalam pan tûr chuan kan rilru hi a inbuatsaih phawt a tûl a ni. Kan ram hruaitute leh mipuite pawh hian kan ram hian hmasâwnna ngelnghet tak neih kan duh takzet chuan rilru leh tih tak zetin kan phâk tâwk theuhah kan thiam ang tâwkin hma i la ang u. Mizoramin hma kan sâwn theih nan chuan moral reformation kan neih a tûl a. Chumi tûr chuan zirtirna kan inpêk tam a tûl bawk. Kan mihring mizia thalo lai paiha, kan ngaihdân nawlpui zâwi zâwia kan thlâk pawh a hun tawh a ni. Kan rilru nghetlo lutuk leh tih tak takna kan neilo lutuk hian kan hmasâwnna tûr min dal thin a ni. Sorkar, zirna, politics, kohhran leh khawtlâng kan inrelbâwl danah te hian a tha lai chhawm a, a thalo lai kan paih ngam a tûl tawh hle. Ram mipui nawlpui ngaihdan hian ram hmasâwn leh changkân kawngah thui takin kawngro a su thei a. Kan ngaihhlut zâwng leh ngaihpawimawh zâwngte hian kan society kal zêl dan a hril thui hle a ni.
Danglamna thlen tûr chuan keimahni theuh atangin bul kan tan a ngai a. Keimahni kan danglam hmasak ngam a ngai. Miten mak an tih tur ang hiala awm a ngaih châng a awm thin. Tunlaina erawh a chhe zâwng ni lovin a hman tangkâi dan kan ngaihtuah thiam a tûl hle. Hun inher danglamtir aiin hun a lo thlena kan danglam ngam a hun tawh. Danglam a tûl hunah chuan tlawm ngam ila, hmasâwnna ke pên ngam khawpa kan intih paukhauh a hun tawh a ni. Nangmahah tan la, in chhûngkuaah thlen la, khawtlâng leh kohhran hi nghawr rawh se. Tichuan, ram nuam, khawtlâng nuam leh nun nuam kan nei ngei ang.
HLAWNCHHING
No comments:
Post a Comment