A KIN TA (Good Friday pual)
HC Lalramdina
Gethsemane huana Lal Isua lungngaihna authâwm chuan Vân khawpui khi thangkhâwk vêl mahse, mihring sualna tlêngfai tûrin tumah tling tâwk rêng an awm si lo; A fapa mal neihchhun, Isua Krista chauh lo chu.
A fapa mal neihchhun, lungngaihna leh manganna vâwrtâwp tuara a thihna ai chuan, "Nang leh kei damna" hi, pa Pathian rilrûah chuan a lian zâwk si a, a fapa mal neihchhun, a duh tak leh a lawm êm êm ngenna (He no hian min pêl lul rawh se) pawh ngaipawimawh zo lovin, thih thlenga tuar tûrin a nawr liam ta!
Isua chu misualah chhiarin an man ta. Zankhuaa an sawisaka, an tihduhdah hnuin, a chungchâng thûa thutâwp rêl tûrin Pilata hmaah, khawvêl chhandamtu Nazareth Isua chu an hruai ta. Rorêltu Pilata hmaa a din lai khân, thiamthu rêng a sawi lova, phat marna tûr a zawng hek lo. Thihna tûr khawpa a sualna an zawng hmulo chung pawh chuan thiam loh chantîrin, Kraws-a khêngbet tûrin a chungthu an rêl ta. Kei misual Barabba hian, Lal Isua dinhmun ka luah theih nân, Lal Isuan kei (Barabba) dinhmun hi a luah a ngai tlat si.
"Jerusalem kulh pâwn lamah chuan zâwlnei thih dân a ni lo," an ti. Mahse, ani chuan mahni tâna Kraws puin "Lu ruh hmun" an tih, Hebrai tawnga Golgotha an tih chu, chu mi hmunah chuan an hruai ta. A thihna tûr hmun Golgotha kawng kha, kawng râltî a tling takzet a ni. Mipui sâng tam takin an zui a, mahse, chhantu rêng an awm si lo.
Misual dum ber angin, mualpho takin (Saruak ngal ngatin) Kraws lêrah an khêngbet ta. A ding lama misual an khâi kân ve khân, "Isu, i ram i thlen hunah min hre reng ang che," tiin a ngên a, Lal Isuan, Paradise-ah, ama hnêna chêng ve tûrin a senglût nghâl a ni. Tisa pua he khawvêla a len lai khân mite a tidam a, a thih mêk lai pawhin a tidam a ni.
Chatuana boral tûr ten nunna kan neih nâna Lal Isua tuarna zozai kha a namai lo hle a. Hreawm tâwpkhâwk a tling a ni. A na êm a, "Ka Pa, engah nge min kalsan?" tiin a au chhuak hial a ni! Tichuan, Isuan uain thûr a in zawh chuan, "A kin ta," a ti a. A lu a kûn a, a thlarau a thlah ta a. "Mihringte chhandamna tûra ka tih tûr chu ka ti zo ta, khawvêl chhandamna tûra ka hna chu ka hlen ta," tiin. Lal Isua chu a hmelmaten, "Kan hneh a, kan ngam a, kan ti hlum ta," an tihna hmun ngeiah chuan khawvêl chhandamna thu a puang chhuak ta!
Lal Isua tuarna leh inpêkna avângin chhandamna chu chawp leh chilhin a thleng a. Misual khenbeh tûr Barabba chu a aiah Isua khenbeh a nih avângin chhuah a ni a, misual thi tlâk ngei chu thiam chantîrin, a taksa ngeiin chhandamna a chang phah a ni. Misual thi mêk an khenbeh, Isua dinglama mi khan Isua chhandamna hnathawh, "A kin ta," tih chu a takin a chang a, thlarau damna neiin a châwl ta!
Nang leh kei pawh hian Lal Isua Krista chhandamna hi, tunah ngei hian kan chang nghâl thei a sin. Hetiang taka min tuarsaktu tuarna hi a thlâwnin a thisen i far tîr lovang u. Taksa, thlarau leh rilrû damna, damna kim Isua-ah i tlu lût ang u. Chhandamna min siam zawhsak tawh hi a tak ngeiin i hmang ang u. Kan mihring hlui thlarau nun vaw chau thintu chu, "A kin ta," "Hnehin a awm ta," tiin au chhuak ve thei ila, a va ropui dâwn êm!
Lal Isua tuarna leh inpêkna avâng hian nang leh kei hian, sual thihsanna, piantharna dik tak kan lo chang thei dâwn ta a ni.
HLAWNCHHING
