ZÂN LUNGNGAIHTHLÂK (Good Friday Eve Pual)
HC Lalramdina
Khatia mantîra a awm dâwn zân khân, Lal Isuan a zirtîrte a kokhâwm a, "Zanriah hnuhnung" a kîlpui a. A taksa leh a thisen, an tân leh mihringte tâna hlâna a awm tûr entîrna a nih thu han sawi mahse, an man fiah thiam si lo.
Mihring famkim a nih laiin Pathian a nihna a bo chuang lova, a tawrh tûr leh a tawrh hun tûrte nên lam, engtiang fakaua rapthlâk nge a tawrh dâwn tih te a hre vek si a. A zirtîrte a han hrilh a, an hriatthiampui si lo. Amah mantu tûrte an inpuahchah mêk a, amah man tûrin an lo kal thuai dâwn a ni tih hriain, kha zân lungngaihthlâk tak maiah khân, Gethsemane huanah lungngai tâwpkhâwkin a tawngtai a. Vênpuitu zawng ruai khawpin a mangang a, a lungngaih êm avângin a thlan thisen ang hialin a far a nih kha! Lungngaih vânga thlan thisen ang meuha han luangchhuak mai chu eng ang taka lungngaihna nasa ni ang maw? A zirtîrte kha amah thlamuan tûr leh hnêm tûrin a duhin a beisei hle a. "Ka rilrû a lungngai êm êm a, thihna khawp hial a ni, hetah hian awm ula, mi vênpui rawh u," tiin, a lungngaihna vênpui tûrin a zirtîrte a ngen hial a ni. Zân lungngaihthlâk tak chu a va ni dâwn êm! A khawharna leh manganna nasa tak hnêm tûr leh chhâwk tûrin thian a mamawh êm êm a. Mahse, a thiante zîngah leh mihring zîngah tumah tanpuitu a hmu si lo. Lungngai taka a tawngtai zawhin an hnênah a va kal a, anni an lo muhil thiap mai si. "Nangnin dârkâr khat pawh mi vênpui thei lo a ni maw? Thlarau zawngin a peih a, tisa erawh a chaklo a ni," a ti thlâwt mai a ni. A van lainatawm tehlul êm!
Min tlanna hlen chhuak tûra tawrhna vâwrtâwp, thihna a tawrh dâwn avângin lungngaihna vâwrtâwpin a tlâkbuak a. Hmuhsit, sawisak leh deusawhna tinrêng tuara Kross lêra thi tûra khaikân a'n ni mai tûr chu, mihring a nih miau avângin a huphurh hle a. Theih ni se, kha zân lungngaihthlâk tak kha pumpelh a duh hle a, vawi thum ngawt a tawngtai a nih kha. Amah hmangaih êm êm tu, a pa Pathian hnênah pawh, "Ka pa, he no hian min pêl lul rawh se," tiin a ngên mawlh mawlh a nih kha. Pa Pathianin a fapa mal neihchhun, "Hei hi ka fapa duh tak, ka lawm êm êm chu a ni," a tih khân, heti taka lungngaihna leh manganna vâwrtâwp, thih thlenga a han tuar tûr kha, lâksawn sak tûra a ngen mawlh mawlh lai khân, pa Pathian rilrû kha eng tiang takin na ang maw? Chu a lungngaihna authâwm chuan Vân khawpui khi thangkhâwk vêl mahse, mihring sualna tlêngfai tûrin tumah tling tâwk rêng an awm si lo; A fapa mal neihchhun, Isua Krista chauh lo chu.
A fapa mal neihchhun, lungngaihna leh manganna vâwrtâwp tuara a thihna ai chuan, "Nang leh kei damna" hi, pa Pathian rilrûah chuan a lian zâwk si a, a fapa mal neihchhun, a duh tak leh a lawm êm êm ngenna (He no hian min pêl lul rawh se) pawh ngaipawimawh zo lovin, thih thlenga tuar tûrin a nawr liam ta!
Nang leh kei hi, Lal Isuan a lungngaihna vênpui tûrin min sâwm a, kan muthilhsan ve mai dâwn em ni?
No comments:
Post a Comment