YMA DAY CHIBAI
HC Lalramdina
YMA member zawng zawngte, "Young Mizo Association (YMA) Day 2017" chibai ka bûk a che u. Vawiin hi Mizo mipuite tân hun pawimawh tak mai a ni a, YMA hi Mizo Hnam tân Rohlu a ni tak meuh meuh a ni.
YMA member zawng zawngte'n Inkaihruaina tha tak hnuaiah kan awmna hmun theuhah, Mizo hnam tân tha leh zung, ngaihtuahna leh kan hun hlu takte sênga hna thawk chhunzawm zêl tûrin i inbuatsaih thar theuh ang u. YMA kan nei hi Mizote tân chuan vânneihna ropui tak a ni.
Ruihlo, hlemhlêtna leh hnam hmêlmate lakah Mizo hnam venghim zêl tûrin tun aia nasa zâwk hian pên chhuak ila, tanpui ngaite tanpui kawngah pawh i inthlah dul lovang u. Thangthar lo la awm zêl tûrte tân entawn tûr hnutchhiahin Mizo hnam ropuina khawvêlah pho chhuak thei tûrin tan i la zual sauh ang u. Kan thalai puite tân eizawnna kawng kawh hmuhtu leh kawng dika hruaitu nih i tum theuh ang u.
Tlawmngaihna chhawm nun te, aia upate zah thiam, tanpui ngaite tanpui, lusûn khawharte thlamuan, YMA hnatlâng leh thlânmual enkawl te hi YMA memberte tih tûr a ni tih hriaa kan mawhphurhnate hlenchhuak tûrin i inbuatsaih thar theuh ang u.
YMA vul reng rawh se.
