BAWNG RIH ZÂWNG FORMULA (Hriat zau nân)
HC Lalramdina
Bawng pum rih lam formula chu :- l × k ÷ = kg vêl a ni.
l - A thlukvûm leh a meibul inkâr (cm a tehin)
k - A âwm len lam teh kual (cm a tehin)
Bawng thlukvûm leh a meibul inkâr centimetre in kan teh ang a, tin, a âwm len lam kan teh leh ang a, chu chu kan puntir ang a, chu chu 50 in kan sem leh ang. A chhuak chu Bawng rih lam kg a ni ang.
HLAWNCHHING
DUHTHUSÂM RIANGVÂI
HC Lalramdina
Ngaihtuahna hian kawng thar dap ve bawk țhîn mahse
Hmasâwn erawh a va har si êm!
Ka thiam tâwka ka ngaihtuahna hian min tichau va
Ka tlin tâwka ka thiltih lah chu a tling zo si lo
Mahse, ka thlah phal lo, a nuam ka ti
Suangtuahnaa nang kawm reng che leh
Ngaihtuahnaa nang hruai zêl che hi
Ka mal lo, eng lai pawhin ka suangtuahnaah hian nang i awm si a
Vawikhat tal chu i khawhar laia i mamawh ber han ni ve ila aw...
I suangtuahnate an hlimna hmunah chuan hruai thlen che ka tum ngei ang.
HLAWNCHHING
CHAW EINA HMUNA AWMDÂN MAWI
HC Lalramdina
Blog tihchangtlun zêl nan tûn țumah hian chaw ei lai leh chaw eina hmuna awmdân mawi, point tlêmtê ka rawn chhawp chhuak dâwn a ni. Hun remchâng hmasa berah mi ina chaw kan ei huna awmdân mawi leh mi, chaw ei kan sâwm huna kan tih tûr leh tih loh tûrte post rawn siam leh ka tum dâwn nia.
1. Chaw eina hmun hi fel fai taka incheina hmun a ni. Ruak kêng kûng te, towel bât te leh sam thlah hnuang te hi a mawi lo a ni. Mahni inah pawh midang chawei titui thei tûrin fai taka inchei țhin a țha.
2. Chawhmeh bel ațanga chawhmeh kan suah chhuahin a suahna tûr fian chu kut veilama vuanin, mahni thlêngah emaw no ah emaw suah chhuah țhin tûr a ni. A theih hrâm chuan chawhmeh tui fiana hâwp tawn ang hi chîn loh a țha.
3. Chawhmeh insuah sak vak vak te hi induhsakna chu ni tho mahse, chîn tam loh a țha. Kan chawei puite mit kan tikham thei a ni. Mahni eitûr chawhmeh suak ngam lo khawpa zakzum kan awm a rinawm loh. Tin, mahni chawhmeh duhzâwng kan suak ve duh thei. Induhsak ah induhsak luat a awm thei a ni.
4. Napkin kan hmanin kan kut leh hmui hrûk nân te kan hmang lêm tûr a ni lo.
5. Buh mal thlauh hi chîn țhanah neih a awl hle. Ruai țhehna a ni emaw, mahni in a ni emaw buh mal thlauh loh hi changkânna a ni.
6. Chaw ei laia țawng vak vak te, titi vawrh chiam chiamte hi chîn lêm loh tûr a ni.
7. Chaw ei tûr ham bawrh bawrh te, thlênga kut sil mai te hi chîn loh a țha hle.
8. Chaw eina hmanrua khawn rîk bawl bawlte pawh hi chîn loh tûr a ni.
9. Chawhmeh tui hâwp rîk hruih hruihte hi a mawi lo.
10. Chaw eina hmuna irh uak uak leh kamțhuahna hmuna khâk vak vak te hi, chaw ei ve midangte tân a tenawmin chaw ei a tui loh phah thei a, chîn miah loh tûr a ni.
11. Chaw eina hmunah chemtê hi lek vu vu loh tûr a ni a, thil ei nân pawh hman miah loh bawk tûr a ni.
12. Thil lem leh ei zâwnga ri siam leh tep chuap chuap te hi a mawi lova, kan țawng dâwnin kan thil hmuam lai chu kan kamsirah kan dah țhîn tur a ni.
13. Mi chaw bâr lai leh chawhmeh suah laite en vung vung loh tûr a ni. Chhûngkuaah pawh a zakzum deuh mi kan awm thei a, zalên takin an ei ngam lo thei a ni.
HLAWNCHHING
RANGVA INCHUNG FORMULA (Hriat zau nân)
HC Lalramdina
Mi tam tak tan hriatsa ni mahse, la hre ve lo kan awm tâkin, hriatna tizautu atan "Rangva inchung Formula" ka rawn chhawp chhuak dâwn a ni.
In kan sakin a chungah Rangva bandh engzât nge ngai tih kan hisâp țhîn a. Hetiangah hian Rangva bandh kan hman zât tûr awlsam têa chhût chhuah mai theihna formula a awm a. Chu formula chu - l×b bandhs a ni.
l - Kan In sak dung lam (Feet - a tehin)
b - Kan In sak vang lam (Feet - a tehin)
Tichuan, kan In sak dung lam leh vang lam kan puntir ang a, 100 in kan sem ang a, Rangva bandh zât a chhuak ang. Kan In sak chu a dung feet 30, a vang feet 20 a nih chuan, Rangva bandh 30×20÷100 = bandh 6 kan hmang dâwn tihna a ni. (Ex - 30×20 = 600. 600÷100 = 6)
Rangva bandh khat hi a sei lam zawm khâwmin Feet - 72 anga ngaih a ni. Feet 6 chinah bandh khatah phêk - 12
Feet 7 chinah bandh khatah phêk - 10
Feet 8 chinah bandh khatah phêk - 9
Feet 9 chinah bandh khatah phêk - 8
Feet 10 chinah bandh khatah phêk - 7 a awm deuh ber.
HLAWNCHHING
LUNGLÊNNA (Article)
HC Lalramdina
"Lunglênna" han tih hian sawifiah hran ngai lovin a awmzia kan hre vek mai âwm e. Lunglênna hi mihring nun tifamkimtu pakhat a ni a. He khawvêl mihringte zîngah hian lungleng ngai miahlo kan awm âwm love. Kan lunglên dân erawh a inchen vek lovang a, kan lunglên chhan pawh a inang vek lovang. Eng pawh ni sela, lungleng theia kan awmte hi a vânneihthlâk hlein ka hria
Kan lunglên chhan hi chi hrang hrang a awm thei ang a. Hmangaihnaa lungleng te, ngaih neih vânga lungleng te, ram leh hnama lungleng te, nu leh pa, u leh naute leh țhen leh rualte ngaih avânga lungleng te, nunhlui ngaia lungleng te, lusûn avânga lungleng te, ngaih bîk pawh nei chuang lêm lova lungleng (Khawtlâng lunglên) te, Vânram ngaia lungleng te, khaw awm dân inthlâk (sik leh sa inthlâk) avânga lungleng te leh chhan dang dang avânga lunglên pawh a awm theih ang. Hêng kan sawi tâkte zîngah hian hmangaihna avânga lungleng hi kan tam berin ka ring a, hmangaihna hi zawng Lal Isua pawh khân a lo dah ropui êm a ni. Lunglênna leh hmangaihna hi a inkawp tlat a. Hmangaihna tel lovin a lunglên theih lova. Hmangaihna ngah apiang an lungleng mai a lo ni.
Lunglênna hian mihring nun hi a luah hneh hle mai a. Patling leh nutling meuh pawh velh lova tițap theitu a ni a. Nausen, naupang, țhalai leh tar chena mittui thlêmchhuaktu a ni. Rethei leh hausa thliar hauh lova chênchilh rengtu pawh a ni. Famngaite famngaihna leh famngaite hnêmtu a ni. Mi țha leh misual berte, hmeltha leh hmelchhia pawh thliar lo leh iai miah lova, amah lo kâwmtu apiang lo dawngsawng țhîntu a ni a. Misual ber, Tânin thim tak thlenga zui lûttu leh chênchilh țhîntu pawh lunglênna tho hi a ni.
Hla phuahtu leh thu ziak mite hmanraw țangkâi ber pawh lunglênna hi a ni a. Thu leh hla țha tak tak lo pian chhuahna a ni. Nula leh tlangval inlêmna hlate leh lunglênna hla lungrun tak tak te hian lênlai chên mêkte hi a kûr tir diam diam zêl a, a la kûr tir zêl dâwn a nih hmêl!! Lunglênna hian malsâwmna tam tak a keng tel țhîn a. Mi lunglengte lunglênna luangliam hi midangte tân pawha lo kûrpui tham a awm țhîn.
Lunglênna hian mihring nunah a țha zâwngin emaw, a chhe zâwngin emaw nghawng a nei thui thei hle mai a. Lunglênna hi țhenkhatte tân inpuanchhuahna ngaihnawm a nih laiin, țhenkhatte tân erawh pindan meuh pawh chhuahsan tir thei lova min siamtu a ni thei bawk. Lunglênna hi a dawngsawng thiam lo tân erawh chuan hringnun tichhetu a ni thei a. Lunglênna avânga mi ropui an awm laiin, lunglênna avânga Pathian chauhvin a pêk theih, nunna hlu tak, lo chhat ta maite pawh sawi tûr kan nei nual âwm e.
Eng pawh ni se, kan lunglênna hian a țha zâwngin kan nun kaihruai se, lunglêng avânga indawmkûn reng mai lovin, kan lunglênna te hian midangten malsâwmna an chhar theih nân thawnthu ropui, an lunglên hnêmtu atân thu leh hla țha tak tak kan hnutchhiah thei a ni.
HLAWNCHHING
V. ROTLÂWMLOVA (16.8.1985 - 12.10.2016)
Țhianpa, i thih cham vawikhatna a lo herchhuak ta reng mai. Ka va ngai thar che ve le. Ka thinlungah hian i châm reng a, theihnghilh i har mang e. Ka ngai lutuk che a sin. Hlim châng te, lâwm châng te tawng ve țhîn mah ila, ka thinlung chhûngril hi a ruak huai hian ka hre țhîn.
He leiah ințhen mah ila, vânah kan intâwk leh dâwn a ni tih ka hriat vâng erawh chuan, ka thla phâng mahse, ka thla a muang e. Lungngaihna rama kan rûmna zawng hi, kan Lalpa hmaah lâwmna hla a la chang ngei ang.
HLAWNCHHING
