LUNGLÊNNA (Article)
HC Lalramdina
"Lunglênna" han tih hian sawifiah hran ngai lovin a awmzia kan hre vek mai âwm e. Lunglênna hi mihring nun tifamkimtu pakhat a ni a. He khawvêl mihringte zîngah hian lungleng ngai miahlo kan awm âwm love. Kan lunglên dân erawh a inchen vek lovang a, kan lunglên chhan pawh a inang vek lovang. Eng pawh ni sela, lungleng theia kan awmte hi a vânneihthlâk hlein ka hria
Kan lunglên chhan hi chi hrang hrang a awm thei ang a. Hmangaihnaa lungleng te, ngaih neih vânga lungleng te, ram leh hnama lungleng te, nu leh pa, u leh naute leh țhen leh rualte ngaih avânga lungleng te, nunhlui ngaia lungleng te, lusûn avânga lungleng te, ngaih bîk pawh nei chuang lêm lova lungleng (Khawtlâng lunglên) te, Vânram ngaia lungleng te, khaw awm dân inthlâk (sik leh sa inthlâk) avânga lungleng te leh chhan dang dang avânga lunglên pawh a awm theih ang. Hêng kan sawi tâkte zîngah hian hmangaihna avânga lungleng hi kan tam berin ka ring a, hmangaihna hi zawng Lal Isua pawh khân a lo dah ropui êm a ni. Lunglênna leh hmangaihna hi a inkawp tlat a. Hmangaihna tel lovin a lunglên theih lova. Hmangaihna ngah apiang an lungleng mai a lo ni.
Lunglênna hian mihring nun hi a luah hneh hle mai a. Patling leh nutling meuh pawh velh lova tițap theitu a ni a. Nausen, naupang, țhalai leh tar chena mittui thlêmchhuaktu a ni. Rethei leh hausa thliar hauh lova chênchilh rengtu pawh a ni. Famngaite famngaihna leh famngaite hnêmtu a ni. Mi țha leh misual berte, hmeltha leh hmelchhia pawh thliar lo leh iai miah lova, amah lo kâwmtu apiang lo dawngsawng țhîntu a ni a. Misual ber, Tânin thim tak thlenga zui lûttu leh chênchilh țhîntu pawh lunglênna tho hi a ni.
Hla phuahtu leh thu ziak mite hmanraw țangkâi ber pawh lunglênna hi a ni a. Thu leh hla țha tak tak lo pian chhuahna a ni. Nula leh tlangval inlêmna hlate leh lunglênna hla lungrun tak tak te hian lênlai chên mêkte hi a kûr tir diam diam zêl a, a la kûr tir zêl dâwn a nih hmêl!! Lunglênna hian malsâwmna tam tak a keng tel țhîn a. Mi lunglengte lunglênna luangliam hi midangte tân pawha lo kûrpui tham a awm țhîn.
Lunglênna hian mihring nunah a țha zâwngin emaw, a chhe zâwngin emaw nghawng a nei thui thei hle mai a. Lunglênna hi țhenkhatte tân inpuanchhuahna ngaihnawm a nih laiin, țhenkhatte tân erawh pindan meuh pawh chhuahsan tir thei lova min siamtu a ni thei bawk. Lunglênna hi a dawngsawng thiam lo tân erawh chuan hringnun tichhetu a ni thei a. Lunglênna avânga mi ropui an awm laiin, lunglênna avânga Pathian chauhvin a pêk theih, nunna hlu tak, lo chhat ta maite pawh sawi tûr kan nei nual âwm e.
Eng pawh ni se, kan lunglênna hian a țha zâwngin kan nun kaihruai se, lunglêng avânga indawmkûn reng mai lovin, kan lunglênna te hian midangten malsâwmna an chhar theih nân thawnthu ropui, an lunglên hnêmtu atân thu leh hla țha tak tak kan hnutchhiah thei a ni.
HLAWNCHHING
No comments:
Post a Comment