HLAWNCHHING ȚAH HLA - 8

HLAWNCHHING ȚAH HLA - 8

KA HRINGNUN NGHAISATU 'HMANGAIHNA'

                                                HC Lalramdina

     

Ka nuna hlimna sâng ber min thlentu kha
          Ka tâna khawharna tâwp min thlentu a ni leh țhîn a
Ka lâwmna mittui hnârkâitu ber ni țhîn kha
          Ka lungngaih mittui ko chhuaktu a ni leh si țhîn

Khawvêl nuam ka tihna bulpui ber ni țhîn kha
          Khawvêl thlâkhlelhna rêng nei lova min siamtu a ni leh țhin a
Phûrna nêna duhthawh taka khawvêl min hmachhawntirtu ngei kha
          Khawvêl min hmachhawn hrehtirtu a ni leh si țhîn

Ka naktûk leh nimin tinuam êm êmtu kha
          Ka naktûk leh nimin hmêlma a ni leh țhîn a
Ka hringnun beiseina kâwl êng min thlirtirtu ni țhîn kha
          Ka hringnun beidawnna zân thim min hruai thlengtu a ni leh si țhîn

Ka hmangaihna hian mittui min sêntir a
          Amah chauh lo chu ka thinlung ka pe thei si lo

Âtthlâk khawpin, mahni pawh inhaw hial khawpin ka thinlung hian a hmangaih a
          Ka damchhûng zawngin, he hmangaihna hian ka hringnun hi a nghaisa dâwn a nih hi

                         HLAWNCHHING

ZUA NUNNÊM, KAN PHAL LO CHE

ZUA NUNNÊM, KAN PHAL LO CHE (Poetry)

                                                HC Lalramdina

Chûn leh zua țâng țhen mah tuar har an ti
Awmlai lunglian hrâng zawng tuar thiam awm maw?
Khua rêl, tlâng tin hrût awmlai hrâng vêl chuan
Belhlai zua rûn riang pawh kân bîk si lo

A fam ta maw? Kan belhlai zua nunnêm!
A lawi ta maw? Fam vângkhawpui siangah
I hrailêngte hrilh a hai lua êm mai
Kan tuara'n maw vânpui a lo chim e

Kan phal thei mawlh lo che i hrailêng ten
I ngai luaithli nûlin kan thâm vêl e
Țah zâi sa-in kan au ruai che a sin
Mahse, kîr hian i mawi tawh si lo maw?

I tel loh chuan zua nunnêm, kan rûn hi
An sawi, luah loh rûn iang a dai ruai e
Kan nuna i hmun ruak zauzia dâwnin
Zua ngaia țahkhua a sei dâwn mang e

Chûn țâng belh tûr awm tawh lo mah tuar har
Kan belh lai zua nunnêm, i tel loh chuan
Lei hringnun kalsiam kan rêl thiam nêm maw
Dâwnin lunglam kan vâi i hrailêng te

Min hmangaihtu Lalpa, ka Lal nunnêm
Fam zûn ngaih vânga riang hi min hnêm la
I ângchhûng nuama ka chawlh ve theih nân
Awmhar chhûn ni leh zân min chhiarpui rawh

(He poetry hi, kan țhiannu, ȚKP -a kan rawngbâwlpui, Manuni, vawiin, Dt 26 April 2018 -a a pain a boralsan tâk avânga ka tawrhpui zia lantîr nân ama tâna ka phuah a ni a, a tân ka hlân e)

                         HLAWNCHHING

ȚHUTTHLÊNG NUAM CHU

ȚHUTTHLÊNG NUAM CHU (HLAWNCHHING THU HLA)

                                                HC Lalramdina

Țhutthlêng nuam chu -

Tu siam nge tih lam a pawimawh lova
A siamtu themthiam leh themthiam loh a pawimawh hek lo

A dûp leh dûp lo lamah a innghat lova
A inhûnna hmuna zir pawh a ni hek lo

A design mawi leh mawi lovah a innghat lova
Hmanraw changkâng leh changkâng lovah innghat hek lo

Thing hmanga siam nge, plastic hmanga siam a pawimawh lova
A tûnlai leh tûnlai loh a pawimawh hek lo

A manto leh tlâwm lam pawh a ni chuang lova
Kan thil thlîr tûr lam a pawimawh hek lo

A pawimawh ber ta zâwk chu -

"Tu nge ka bulah țhu a, tu bulah nge ka țhut?"
Tih lam biahthu daih zâwk a lo ni!

Hmangaih ber te nên chuan mahni leng tâwk chiahah
Inchherchhuan ngai khawp hiala țhut tûr pawh nise

Duh ber țhutpui tûr nei lova, mahni chauhva țhutthlêng mawi taka țhut ai chuan
Kan tâwt poh leh a nuam zâwk hial lâw'ng maw???

                         HLAWNCHHING

ZÂN KHAWHARTHLÂK

ZÂN KHAWHARTHLÂK (Article)

                                                HC Lalramdina

          He zân khawharthlâk takah hian, lunglênna thinlung no a lo chhuak a, khawharnain min chênchilh a. I tel ve tawh lohna ka khawvêlah hi chuan, engkim mai hi a reh in a khawharthlâk ngawih ngawih țhîn.

          Zân a rei tial tial a, thâwm riva hriat tûr pawh a tlêm tial tial a. Ri lêng vâk a zâwi tial tial a, zan reha hrâm chi rannung țhenkhat rawn hrâm ri leh zauh țhîn thâwm tih chauh lo chu thâwm dang hriat tûr a awm tawh meuh lo. Perhpâwng, Khuangchiri, Khauchher leh rannung țhenkhatten ten an âw an chhuah țhinna hun, zân tlâi tawh tak, thâwm riva zawng zawng deuhthaw an reh țhinna hunah hian, i reh rî chuan ka ngaihtuahna thinlungah hian thâwm ring tak a rawn chhuah leh țhîn a. Thinlai mu hnu lunglên a kaitho leh țhîn!

          Chu i reh ri, thâwm nei si lo, ring taka ri țhîn chuan ka beng leh ka ngaihtuahna thinlung zawng zawng hi rawn fan chhuakin, ka suangtuahna leh mitthla thlengin a rawn fanchhuak țhîn a. Muhîl thei lovin khumah ka let ka let fo țhîn. Chu zân khawharthlâk tak maiah chuan, ngaihtuahna bâk kawm tûr ka nei lova, ngaihtuah loh atâna țha zâwk thil tam tak ka ngaihtuahnaah a rawn lût țuam țuam a. Ngaihtuahnain ngaihtuah tûr dang a ngaihtuah chhuak zo bawk si lo. Nangmah bawk hi ka ngaihtuahnaah i lian ber fo țhîn. Mite tâna chawlh hahdamna hun ngei kha, ka tân chuan zân khawharthlâk a ni fo țhîn.

          Tui taka i muthilh lai khân maw, kei erawh chu, i reh ri, benga hriat tûr awm si lo chu, ka thinlungah hian ring taka rawn au vin, chu thâwm chuan zânmu mi chhîn tîr thei lo fo țhîn. Chu thâwm chuan kan nunhlui liam ta zawng zawngte kha hmaih awm hauh lovin min hrilh nawn leh a, kan nunhlui leh kan sûlhnu te kha min fanpui leh țhîn. Chu zân khawharthlâk tak maiah chuan, ka zân hun hlu tak khawhral nân thu tin ngaihtuahin ka suangtuahna a vâk kual a, hun rei lotê chhûng kan hlim hun kha min chhuikîr tîr leh țhîn. Khâng kan nunhlui liamta te kha min hriat nawn tîr a, min fan nawn pui leh a, chu pawh chu duhtâwk mai lovin, ka ta i nih lohzia min hriat nawn tîr awn awn a. Ka thinlung hi hliampui tuar ang maiin a na thar leh vawng vawng țhîn. Chu zân zet chu ka tân chuan zân tawrhhlelhawm tak zawng a va ni chiang țhîn êm!

          Ka hmangaihna che engmah lo maia thâmral ta chu mi min hriat nawn tir a, thisen chhuak si lovin hliam azawnga tuam dam har ber ka thinlung hi hliampui mi tawrh tîr a, chu thâwm ri chhuak si lova thinlunga ring taka ri țhîn chuan ka hliamte chu rawn tina thar lehin mi țah nawn tîr leh fo țhîn. Zîng lama mi chak ber pawh hi zan lamah chuan mittui nên ka inâwi mu fo țhîn!

          Lunglênna thâwm a nat luat châng te, mahni inkhawngaiha ka kun tlawk tlawk châng te, khawharnain thlipui ang maia mi chhêm châng te hian, he hmangaihna mawlh hi chhun ên vânglai ang maiin ka thinlungah a rawn inlâr leh țhîn a. Hriat nawn fo duh lo mah ila, hriat nawn fo tûrin thâwm a rawn chhuah bâng chuang si lo. He zân khawharthlâk tak maiah hian, vêngtuten khawvâr an thlîr aia nasain khawvâr lo thlen hun tûr ka nghâkhlel a. Mahse, khua chu a lo vâr ta ngei a, kâwla Ni lo chhuak chuan, nang ngaih lunglênna bâk a rawn herchhuahpui leh chuang si lo.

          Kan hlim hun reilotê chhûnga he khawvêl țawp tawh tak hi mawi ka tih zia leh ka thlâkhlelh si zia te, i kianga ka awm laia chhûn leh zân tâwi ka tih țhin zia te, hun i nawr kal thei emaw tih mai tûra a liam chak ka tih țhin zia te, i zâra nun ka thlâkhlelh zia te kha. Khâng hun zawng zawngte kha, hun nunrâwng tak chuan herliampui zo vin, zân khawharthlâk tak chauh min hnutchhiah si a.

"Zîng lama mi chak ber pawh hi, zan lamah chuan mittui nên ka inâwi mu fo țhîn!"

                    HLAWNCHHING

HLAWNCHHING ȚAH HLA - 7

HLAWNCHHING ȚAH HLA - 7

                    KA NATNA KHAWVÊL

                                                HC Lalramdina

     

Ka neih rosumte hi chên ve dâwn ila
          Tûkțhuan khat daih pawh a ni si lova

Ka sakhmêl leh kimtlângte lah chu
          Midangte tân mitthla ngam ngaihna a awm si lo

Ka chanchin tlâng thang vete lah chu
          Hriat reng tlâk tur engmah a awm bawk si lo

Ka natna khawvêla damte hringnun hi ka thîk a
          An nui hmêla hlimnate chu ka dampui si lo

Thih leh dam inkâr khawvêlah chêngin
          Beisei nei tûra ka inhnêmna hian țah lai min rûn a

Hringnun rauthla a vaihna piallei hi ka țahpui leh țhîn

                         HLAWNCHHING

THLAHNA THUCHAH

THLAHNA THUCHAH (Poetry)

                                                HC Lalramdina

A hun a thleng ta!
I liam dâwn ta si maw?
Au ding tûr khawp che hian, Aw lungkuai leh mawi ka fah zo lo che em ni?
Tûnah chuan, rem lo chunga ka vawn tlat che hi ka thlah a ngai ta!

Ka chelh tawh che a
Ka chelh lui tawh lovang che
Hlim takin liam ang che aw?
I liam tâk avâng hian ka tân i hlutna a bo phah dâwn chuang si lo

Kan hun liam ta te ka dâwn kîr a
Hmangaihna zinkawng kan zawh dunte kha ka chhui lêt a
Ka lung a va lêng tak êm!
Ka ngai țhîn ngawt ang che!

Lungngaihna hlimkawr ruam kan zawh dun lai te khân
I lakah khân ka vuivai fo țhîn
Ka vuivaina leh harsatna ka thlen sak țhinna che ah khân
Min ngaidam ang che aw?

Duhsakna tinrêng min hlante kha ka tân a hlu a
Duhsakna min hlân lêt tam tak malsâwmna dawng zêl ang che
Dam la, hlim reng tûrin duhsakna sâng ber ka hlân a che
Min han hre ve reng țhîn ang che aw?

                         HLAWNCHHING

RAM HMASÂWNNA BUL - HRISÊLNA

RAM HMASÂWNNA BUL - HRISÊLNA

(2018 World Health Day) (Article)

                                                HC Lalramdina

          Mihring nupa, chhûngkua, unau, țhenawm khawvêng leh țhenrual te inrem tirtu țha ber chu inngaihsak tawnna hi a ni ti ila a sual âwm love. Nupa, Nula/Tlangval inhmangaih takte pawh hian kan kawppuite laka kan beisei ber chu inngaihsak tawnna hi a ni.

          Mipuite pawh hian hruaitute laka kan beisei leh kan lungâwina ber țhin pawh inngaihsakna hi a ni fo mai. Chutiang bawkin, kan Zoram pawh hian ngaihsaktu hi a mamawh reng a, kawng hrang hrang hêng - Ram hruaitu ten ram an hruai dânah te, sum lâkluh leh hman dânah te, ei leh bâra intodelh kawngah te, hnam dang ten min chîm ral lohna tûr thuah te leh mipui rilru sûkthlêk dân leh hmasâwnna thuah te hian ngaihsak reng a mamawh a ni.

          Tûnlai hian natna tam tak, hlauhawm tak takte hian min tuam vêl reng a. Thihnate lah hi a tamin thih dân pangngai lo deuha thih te lah a tam ta hle mai. Chu lovah, tarte ai maha țhalaite an thi tam zâwk emaw tih mai tûrte hi ngaihtuah ngun ngai tak chu a ni phawt mai. Chuvâng chuan, kan ram hian eng kawngah ber hian nge ngaihsak a ngaih tâk tih hi kan thlir thiam a ngai hle a ni.

          Tûnlai khawvêla kan ram dinhmun leh kan ram kal zêl dân han thlir hian mipuiin kan mamawh êm êm mai nia lo lang ta chu "Hrisêlna" hi a ni âwm e. Hrisêlna chungchâng hi Doctor-te leh hrisêlna lama thawktute sawi kher tûr pawh a ni lova, hrisêlna hlutzia hretute leh ram ngaihsaktute sawi tûr a ni mah zâwk âwm e. Tirhkoh Paula'n, "Hmangaihna ka neih si loh chuan... engmah lo," a tih ang khân; Ram siam țhat tumin intodelh tum mah ila, hausak duhin tha leh zung eng ang pawh sên inhuam mah ila, ram nuam leh entawntlâk nihte pawh tum țhîn mah ila, "Hrisêlna kan neih si loh chuan eng ruai mah kan ni chuang lovang". Chuvâng chuan, kan ram siam țhat nân leh hmasâwn nân mihring kan hrisêl phawt tûr a ni tih hi a lang chiang hle âwm e.

          Hrisêlna kan mamawh zia leh a țûl zia kan sawi dâwn chuan kan hrisêl lohna hrang hrangte leh natna kan buaipui dân te hi sawi tel a țûl fo țhîn. Natna avânga Damdâwi In hla zâwk kal nân te, hrisêlna kawnga hma kan sâwn theih nâna sawrkarin kawng hrang hranga hma a lâknaa sum leh pai, tha leh zung a sên tam țhin dân te, chhûngkaw tam tak khawsak a tihbuaizia te, damlo tha sên bâka a enkawltute hna țhulh tam dân leh an hun khawhral hlutzia te, damdâwi man bâka intuituahna hautakzia te hi ngaihtuah tham tak a tling a ni.

          Hêng kan hrisêl lohna te leh, kan hrisêl loh avânga kan thihnate hian nun a tihreawm a, chhûngkua leh khawtlâng min nghawng a, kan ram hi economics lamah nasa takin min pawthniam a ni. Ram leh khawtlâng tân leh mahni chhûngkaw hmasâwnna tûr kawngah kan thawh tûr ang min thawhtir theih loh phah a. Kan nat miau chuan kan damna tûrin sum leh pai tam tak kan sên a ngai a, hna tam tak kan țhulh a ngai rêng a ni. Chuvâng chuan, kan ram hian hrisêlna kawngah hian ngaihsak a mamawh hle a ni.

          Thufingin, Tihdam aiin invên a țha zâwk," a lo tih hi hre thawkhat tawh viau mah ila, a taka hman țangkai nachâng kan la hre tâwk lo hle niin a la lang. Miten min tihnat ai mahin mahnia natna kan insiam hi a tam zâwk a, thihna tam tak hi chu mi min tihnat vâng ai mahin, mahni thiltih ațanga lo thleng hi a ni fo.

          Hrisêlna chungchâng thu han sawi hi chuan dam reina tih thu hi sawi tel ve ngei a țûl bawk țhîn. Pathian malsâwmna ropui tak kan dawn theih chu dam reina hi a ni a. Khawvêl ram hrang hranga mihring dam chen an chawhrual zât te, India ram leh keini state bîk dam rei dân han en te hian dam rei hnam kan ni hranpa lo. Dam rei hi eng vâng nge ti ila, a chhânna âwm ber chu hrisêl vâng a ni e, tih loh rual a ni lovang.

          Kan ram hruaitute leh mi țhahnemngaite hnên ațanga kan thu hriat lâr ber pakhat chu, "Ei leh bâra kan intodelh tlat chuan mahni kea ding tûrin chakna kan nei tihna a ni," tih hi a ni. Hetiang chiah hian hrisêlna kawngah hian mahni țheuh hi kan intodelh a pawimawh a, hrisêlna kawnga intodelh hi chuti tehchiamin a har lo kan ti thei ang - Kan thih leh dam chu min siamtu Pathian thu thu a nih rualin, mahni chhia leh țha hriatna hmang thei chin (Naupang chhia ni lo) chuan hrisêlna kawnga mahni țheuh intodelh tûrin tih theih kan ngah êm êm a ni. Kan hrisêlna tûr kawng hrang hrang damdâwi lam thiamte zirtirna kan dawn țhîn te hi kan zawm phawt chuan awlsam têin kan intodelh mai dâwn a ni.

          Hrisêlna kawnga hma kan sâwn zêl theih nân kan in leh a vêl te tifaiin enkawl țha ila. Mahni invawng faiin, ei leh inah insûm ila, kan châk zâwng leh tui tihzâwng aiin kan taksa mamawh leh ngeihzâwng te ei țhîn ila. Zu leh Drug ngawl veite enkawltu infaksiak ai chuan chîng lo tûra beitute hi fak tam zâwk ila. Tin, kan lo hrisêl theih zâwk nana sum sên tûr tam zâwk ngaihtuah te, damdawi in lian zâwk din tih lampang hisâp vak ai chuan kan lo hrisel zâwka, damlo enkawlna leh thil chîn țhalo chîng te chhanchhuahna buaipui tûr an lo tlêm zâwkna lam ngaihtuah chhuah thiam hi kan ram hmasâwnna tûr, a bul ber zâwk a lo ni.

                         HLAWNCHHING

KA TAWN LEH NI MEUH CHUAN

KA TAWN LEH NI MEUH CHUAN (Based On True Story)

                                                HC Lalramdina

          Kum sarih (7) liam taa lam kâwia ka tawn lânu tuaitîrtê kha, hmuhnawm ti taka ka lo thlîr vawng vawng, ka thlîr reng a ni tih a inhriat avânga a zak, hrilhhai hmaifang sen țâwn țâwn chunga ngam leh ngam lova, min kal pelh paha min melhtu tê ngei kha, "Eng tikah nge ka tawn leh ang aw?," tia ka rilrû leh ka chhîngmitin a zawn rûk reng țhin, lânu tuaitîri ngei kha. "Vawikhat tal tawng leh ila aw," tiin, rilrûin duhthu ka sâm vawng vawng țhîn!

          A mit meng fiah kâk mai ina min melh zeuh chhûng kha reilo hle mah se, ka thinlung ngaihtuahna a fan chhuak chiang ngei mai. Eng rilrû puin nge min melh tih chu hre lo mah ila, a laka ka rilrû puthmang erawh ka inhrechiang hle thung si. Intawng leh tawh ngailo tûrin a kal liam mêk a ni tih rêng ka hre si lo.

          Chu lam tluang ka zawh ni apiang chuan kan intawnna, chu lam kâwiah ngei chuan tawn leh mial beiseiin, chhîngmit lên ruai chungin dîmtêin ka kal fo țhîn. Mahse, tawn leh ni a awm thei si lo. Vawikhat hmuh naa heti taka ka lairil min fantu kha hmuh nawn leh ka duh tak zet a ni. Chu kan intawnna lam tluang ka zawh ni apiang chuan, amah chu ka hrechhuak nawn fo țhîn a. "Khawi hmunah nge a khawsak ve ang a, eng tin nge chhûn leh zân hun hi a hman ral ve țhin ang le?," tiin ka ngaihtuah noh noh țhîn.

          Hun leh nite an liam zêl a, kumpuisûl pawh a her liam zêl a, hun tam a ral ve ta reng mai. Mahse, kha lânu tuaitîri kha eng vângin nge ka hriat reng țhin le? Kan theihnghilh theih ngai loh tûr mihring hi Khuanu hian a lo duang ve rêng em ni zâwk le? Min hrechhuak ve țhîn ang em le? Eng tin nge min ngaih ve ang aw? tiin, keimah leh keimah ka inzâwt ru fo țhîn.

          Ngaihtuahna kâwm hmana ka awm apiangin ka ngaihtuahnaah a lang a, ka mut apiangin ka mitthlaah a lang a, kal kawnga ka kal laite hian tâwk mai tûra inrinna lian tak ka nei fo țhîn. Khawi khua/vêng nge, tunge a hming tih te tal hria ila a țha tûr. Heti taka ka lairil fantu hi zawn chhuaha a laka ka rilrû puthmang hi zêp awm miah lovin ka hrilh mai tûr hi a nia. Kan inhmuh hun chhûng kha a reilo êm a, engmah ka sawi hman si lo.

          Kum sarih (7) lai a liam ta reng mai. Chhîngkhual changa zîng ka zin ni chuan, vawikhat tal hmuh nawn leh ka châk êm êm, rilrûa ka lo zawn rûk reng țhin, chhîngkhual ka channa vângkhaw mâwitu lo ni ta, kha tuaitîr hmelțhai ngei mai kha, rin loh leh beisei loh takin, ka vawihnih tawnna ni tûrin ka tawng leh ta mial mai.

          A mit meng fiak kâk mai chuan min melh leh ralh mai a, min nuih sêih bawk a, a va han duhawm tak êm! Ka lairil a fan chhuak leh ta! A bahsam lêng siau mai kâra a biang lang no chêk mai te kha, a tuaitîr hmêl te kha paih deuh tawh mah se a va la nalh êm! A sakruang inkhaithli zaih mai te chuan mit a titlai kher mai!

          Ka tawn hmasak zâwk lai ang tho khân ka thlîr ngawih ngawih mai a. Biak ngei tuma ka kâ ka ân zuau lai chuan, kan piah lawk ațang chuan a pasal tih hriat tak mai chuan, a fanu rawn kâi phei pahin a neitu tih hriat tak âw ngei chuan, naupang chhe țawngin, "Â-mâ, kal tawh ila?," a rawn tih ri ka hriat chuan ka kâ chu a tichîp chiang hle mai.

          Kha lam kâwia ka lo tawn tawh, tawn leh châka, a chhûn a zâna ka ngaihtuah fo țhin, "Ka tawn leh ni meuh chuan" hrailêng châwiin mi nuthai a lo chang ta si! Engkim a dang zo ta! Hrilh a hai mang e! Tawn leh ka châk êm êm ka tawn leh ni meuh chu ka tân chuan, ka hrilhhaina ni leh ka beisei bona ni mai a ni ta si! A pawi mang e, tinrêngin a pawi mang e.

          Kei zawng, țhalêng tuaitîr dang ka tawn fuh ve leh hlauh beiseiin chungin, vâllai chên leh rih mai tâ'ng e.

                         HLAWNCHHING

HLAWNCHHING QUOTE - 7

HLAWNCHHING QUOTE - 7

                    MI ȚHA NIHLAWHNA

                                                HC Lalramdina

Țhat luihna chuan rei a daih ngai lova;
          Mi țha erawh chu a kal liam hnuah pawh miten an hre reng țhîn

Hmêlțhatnain a cheimâwi nun sual neitu chu 'Tûr ngilnei' a ni a;
          Hmêlchhe nun fel chu țhatna khuh bo ang a ni. Hailana belhchianin a duhawm hle țhîn

                         HLAWNCHHING

THIHNA HNEHIN ISUA KRISTA A THO LEH TA!

THIHNA HNEHIN ISUA KRISTA A THO LEH TA!

(2018 Easter Sunday Quote)

                                                HC Lalramdina

     

Thlânah zalh ni mah se, thihna hnehin Isua Krista chu a tho leh ta!

Thihnain a tihtâwp theih nunna chu nunna tak a tling lova
Chhandamtu atân a tling bawk hek lo

Isua Krista, khawvêl Chhandamtu erawh chu kraws thihna leh thlânin a nun an titâwp thei lova, thihnain a chelh hlen zo lo a ni.
Isua Krista hi chhandamtu atân a tling tâwk a ni

Isua Krista chu a thi hlen lo va, ka tân a tho leh a, a thlarau thianghlim chu chatuan atân ka hnênah a awm reng tawh ang

                         HLAWNCHHING