Sik leh sa inthlâk dânah thal hun kan lo thleng chho leh tan mêk a, Mizoramah chuan boruak nawm hun lai ber tia sawi theih ni mahse, kângmei avânga vânduaina thlen tam hun lai a ni ve thung. Chuvângin, kângmei lakah kan invên fîmkhur a tûl leh dâwn ta. Mi tinten kângmei laka invên fîmkhur nachâng kan hriat loh chuan thil pawi tak a thleng thei a ni. Sawrkar pawhin kângmei laka fîmkhur a tûlzia a sawi mawlh mawlh bawk a ni.
Awmze nei lova kângmei chhuak hian thil pawi tam tak a khawih thei a, thihna hial pawh a thlen thei a ni tih kan hriat theuh a tha âwm e.
Kângmei chhuak hian kan chênna boruak hi nasa takin a tichhe thei a, chu chuan mihring hriselna nasa takin a khawih pawi thei a, kan dam chen tûra Pathianin min ruat kan dam thlen loh phah thei a ni. Zan khat thilthûa kan huan thlai leh in leh lo, kan nunna hial pawh khawih pawi mai thei a ni. Kan fîmkhur tâwk loh avângin mahni leh thenawmte kângmeiin meivâpah min chantîr vek thei a ni. Tin, kan ram hi a kan fo chuan lei atanga boruak tha kan hmuh tûr ang hi kan hmuh loh phah a, a pawi êm êm bawk a ni.
Mizote hi lo neia eizawng hnam kan ni a, lo tûr ni lêmlo a kan fo hian ram a tichhia a, chu chuan kan eizawnna thlengin a khawih pawi thei a ni. Lo kan hâl leh tan dâwn ta a, awmze neia lo hâl hi kan tih tûr a ni tih i hre thar leh teh ang u. Huan lo ram hâl tûr neite pawhin kângmei tichhuak lo tûra meikawng sial that leh vên uluk hi kan tih tûr a ni tih kan hriat a tha. In lamah a ni emaw, ram lamah a ni emaw kan meizial zûk bung paih hian kângmei a tichhuak thei tih hre nawn ila, tihlum chianglo chuan i paih mai mai lovang u. Ram kâng tam tak pawh hi a chhan lian tak pakhat chu kan fîmkhur tâwk loh vâng a ni châwk. Lo/huan kan hâlin uluk takin meikawng sial ni se, ramvâk thinte pawhin fîmkhur taka ram tikâng lo tûra mei kan chhêm thin a pawimawh. Mei bung leh ram tikâng theite pawh kan paih mai mai tûr a ni lova, kan meichhêm te pawh tihmit zêl thin tûr a ni.
In kan sakin uluk taka mi thiamte rawn ngeia 'wiring' kan tih that a pawimawh a, kan 'connected load' zawh tâwk chauh power hman thin a pawimawh bawk. 'Connected load' aia tam hman a nih hian vânduaina leh buaina lian zâwk a thleng thei a ni. Chhûngkaw tam takin Ar vulh kan intihhmuh a, mi ram anga hmun danga vulh lovin kan chenna in bul vêlah te kan vulh thin a. Electric êng chhitsak an ngaih thin avângin, hemi kawngah pawh kan fîmkhur thar leh a pawimawh a, mahni tâna tha tûr nia kan hriatte hi kan lungngaihna min thlentu mai a ni thei tih kan hriatreng a pawimawh bawk.
Kângmei chungchângah hian media hrang hrang kaltlangin inzirtîrna neih a ni kumtin a, heti chung hian thal hun a lo intan leh meuh hi chuan a hmaa sawi bawk kha sawi nawn a lo ngai leh thin. Hei hi kan inenfiah a ngaihzia tichiangtu a ni. Kângmei lo intan theih chhan hrang hrang hêng - Zial bung paih fîmkhur loh, electric kalsual, meisi in a mankai palh leh a dang tam takte chu kan hre hlei hlui a. Khuarêl chhiatna thleng palhte chu sawi tûr awm bawk thin mahse, vânduaina lo thlen chhan tak erawh hi chu kan fimkhur tâwk loh vâng a ni tlângpui thin.
Kângmei chungchângah mipui kan inzirtir lawm lawm lai hian sorkar lam, a bîkin kângthelhtu lam department te pawh thal hun chhûng hian hun dang aia inrâlrin lehzual a tûl hle bawk. Vânduaina a lo thlen palh châng hian dem tûr tam tak zawn a ni thin a, chutiang hunah chuan kângthelh pawl kal har tih thâwmte pawh hriat tûr a awm fo. Hêng sawisêlna hrang hrangte hi thawktute pawhin thahnemngaihna a ni tih hria sela, anmahni ah tan lâk tîrtu atân hmang thei ta se, hmasâwnna ropui tak thlen ngei ka ring a ni.
Ram a lo kâng palh a nih pawhin khua leh tui tha chuan kan thelh zêl tûr a ni a, hei hi kan duty a ni tih kan hriat a pawimawh a. Thufing chuan, "Tihdam aiin invên a tha zâwk," a ti a. Chuvâng chuan thil pawi a thlen hmaa lo invên hi hi mi tinte tan lâkna tûr pawimawh ber chu a ni. Sorkar leh tlâwmngai pawlte pawhin tûn aia uar zâwka kângmei chungchâng inzirtir a tûl a, kângmei râpthlâkzia te, pawi a khawih nasat theihzia te, a kalsan râpthlâkzia te kan hriat thar fo a tûl a, thil pawi zâwk a thlen hmaa fimkhur taka chêt hi kângmei laka invênna tha ber chu a ni. Kan in leh lo te pawh kângmei laka kan vên fîmkhur a tûl takzet a ni tih hriain khua lo ro chho zêlah hian kângmei laka kan invên fîmkhur hi kan tihmâkmawh leh kan ngaihpawimawh tûr a ni tih i hre thar leh theuh ang u.
Kângmei avânga chhiatna hi a râpthlak bîk êm êm thin a, chuvâng chuan, kângmei laka invênna kawngah a theih ang anga kan tan tlân a ngai a, mahni chauhva tawrh theih a nih rualin, midang tân pawh tawrhna a thlen theih avângin kan fîmkhur tlân hle a ngai a ni.
"Mi dang tân i fîmkhur peihlo a nih pawhin, nangma tân tal fîmkhur ang che. Kângmei lo chhuahna bulpui ber pakhat chu, mi tlêmtê inthlahdah vâng a ni châwk thin"
HLAWNCHHING
