NULA SENIOR
1. Nangmah hnaiha beiseitu che apiangin an fiam mai mai che emaw i tiha i nuih liampui mai mai hunah leh, uluk taka rawn kawmtu che apiang 'thianpa' ena i en zel anih chuan.... I senior tan tihna a ni.
2. I unaute fa zingah duat bik riau i neiha khawi lo i chhuah nikhua pawha i pheikhawk sang tur aia naupang lawm i zawn hmasak tawh chinah ngat phei chuan nula senior stage -2 i chuangkai tawh tihna a ni.
3. I intifing tan a, i ngaihdan reng reng sawh sawn harsa i ti a, chhungkaw pawisa lut leh chhuak turah i hriatpuina tel lova thutlukna siam ngamlo khawpa i chhungkuate'n an zah che anih ngat phei chuan, kum 40 i hlat tawh lo hle tihna a ni thei.
4. I zung hîng hle a, tlem te tein i zung a, i phunchiar tanin, midangte na deuh taka khak fak fak i ching tawh anih phei chuan, kum 40 i pel tan dawn tihna a ni thei.
5. Zan lamah in veng chhunga i len duhna hmun apiangah kalpui nei lova i chhuah ngama zing lamah i duh chen chen i mut pawha sawiseltu che an awm loha mipa tleirawl lam deuh hlir * i neih chinah ngat chuan, nula chal tak, intifing deuh, mahni thu duh si, fel si, kawm hahthlak si ilo ni ang a, 'ka thiante' i tih apiang khan an û en vek tawh ang che a, PHE tuisem atanga Bazar sa sat thlengin, i awm mai mai pawh kha an zah riau tawh ang che.
6. Hetiang stage i thlen chinah ngat hi chuan Thla eng tih vel mai mai hi chu, i thengthawngah a thawk pha tawh dawn lo. Men rei i tum zan berah zantir atanga tui deuha mut chang i nei ang a, mut hma i tum zanah i muhil hleithei lo fo bawk ang. He dinhmun hi i dai mek anih chuan, ilo chal ve hle tawh tih inhria ang che.
NULA SENIOR CHU
1. An duhnaah chuan an fel lutuk.
2. An huat zawngah mi hmaizah an nei lo.
3. An senior-puite nen tleirawl rel an hrât.
4. Mi inngaizawng an hre thei.
5. Kohhran leh NGO velah an inhmang duh.
6. Hmai hnawih eng ilo chhuak thar an hre thei.
7. Zing an tho har thei.
8. An mote an mil lo tlangpui.
9. Nutate fa an duat duh.
10. Puanthui an thiam tlangpui.
11. In chhungah an phunchiar a. Khawlaiah an nui peih.
12. Khawhar inah mutthluk an hrât.
Mi mo thian atan siam nuam an ti.
13. Rihdil leh Silchar an kal tawh tlangpui.
A tlangpui in NULA SENIOR an khirh tulh tulh.
NULA SENIOR HLA
A dam chhûng a rei;
A nulat hun a sei.
Hmânah duhtu a tawng;
Tunah duhtu a zawng.
A sakhmel a buar;
A vun pawh a chuar.
Hmânah Vala'n a chhai;
Tunah Vala'n a chhaih.
Nihliap dum a hâwl;
Chhungkaw sum a kawl.
Hmânah an rûn an bêl;
Tunah an rûn an pêl.
A kimtlâng mawi a chuai;
A nunkhua pawh a nguai.
Hmânah a tawng fo sih dêt;
Tunah a mamawh fo sih dêt.
Hmânah a tawng hêltu;
Tuna a tawn chu sêltu.
NULA SENIOR NIH HREAWMNATE
1. A engamah hmain "Pasal nei tawh rawh" min ti thlazen ringawt a(h).
2. Nuta kan neih phei chuan mo neih a, duat kan chak ruk em em lai leh nuta te nupui tur kan melhruk sak laiin a bialnute lamin min rawn huphurh nghal ringawt a(h). Kan lo duat dawn tehreng nen.
3. Nu leh pa tar tawh lam neih phei chuan eizawnna, sum vawnfel kan kutah a innghat a, nu leh paten min lo ringtawk tawh a, kan kutah engkim an dah ngam a. A engamah hmain, "A thu si, a Lal si" tiin min han huphurh nghal ringawt a. Kan thu ang chu, in leh lo enkawltu, nu leh pate pawn an rin zawh, mawhphurhna an nghah ngamna kan ni tlat alawm.
4. Pasal te pawh han ngaihtuah dawn ila, mahni in lamin min pawt na tung si, chuta karah a mipa lam chhungten min lo huphurh sa nghal run phei chuan... Fa lu hloh a ni tawh mai.
NULA SENIOR AWMNA AH NGAT MO RU
1. Nu leh pa aia pawha an thu zawk phei chuan i vannei dawn lutuk.
2. I fate zawng zawng a duatsak vek mai ang che.
3. An mamawh engkim a ngaihtuahsak vek mai ang.
4. Nu leh pa enkawltu, chhungkaw enkawltu an ni miau a, nu leh pa an kalsan hreh avanga senior te pawh an lo ni thei a...
NULA FING TAWH THUKHAWCHANG
Kan tleirawl laiin val û ten min chhai a;
Kan len rei hnuah tleirawlin min chhai thung!
Pasal neih kan châk laiin chhungte leh Khawtlangin hun an la ti lova;
Kan peih tawh loh lamah min nawr liam phet an tum leh si!
Kan ât laiin mo atan min it sup sup a;
Kan fin tawh hnuah erawh min huphurh leh si!
Kan zahzum laiin tlangvalin min um a;
Kan zah loh hnuah min tlanchhiatsan leh si!
Khawlai kan thlakhlelh lai khan chhungten in-ah min khungbet a;
Inchhung kan thlakhlelh hnuah min chhuahtir phet an tum leh si!
Chhung ten kan inlengte mut san se kan tih em em lai khan tullo puiah an meng ve tlat a;
Tunah inlengte mut san ila, kawm zawk se kan duh hunah min mut san phet an tum leh lawi si!
VAL SENIOR CHU
1. Khawmpui neuh neuh kal an peih hle.
2. Lukhum hmathlâwk khum an uar; an chalfilh thup nan.
3. Tawng sual changin kan tlangval lai chuan tih an hrat.
4. An phone ah zanlai thlifim a tam duh phian.
5 "Ka pu" tih an lawm viau lova, "Tlangval" tih an lawm chiah lo bawk.
6. Committee peng hrang hrangah a thu lo pawl, inti pawimawh pawl an ni duh.
7. Sunday School an kai kim duh phian.
8. Sawrkar hnathawk nula an hmelhriat thei.
9. Rulling Party Unit hruaitu nih an khel duh.
10. VDP ah khawtlang tan tiin an inhmang nasa a. Tleirawl te huat an hlawh.
11. Kuhva leh Cigarette mi dil an hrat a. Lighter eng thei an lawm.
12. Sumdawnna lamah enge maw ti chhung an lo kal ve tawh bawk.
13. Mi pian kum ah an buai em em.
14. Farnu te fa an duat duh a. Farnu te pawisa dil an hrat.
15. Puipunna eng ilo velah fatu nih nuam an ti.
A tlangpuiin TLANGVAL SENIOR an ho tulh tulh.
NUTHLAWI CHU
1. Kekawr tight lam pang hak an uar.
2. Sam tihkir leh mithmul pawh an uar.
3. Thingpui dawrah an thawk duh.
4. Sumo Driver Phone no an nei thei.
5. Kuhva hring zawrh an uar hle.
6. Tu emaw bulah an kum an zêp thin.
7. Harhna an chanin mi aiin an tul nasa thei bik.
8. Nuta te nupui rel an hrat.
9. Biakin ah hla hril an chuh tlat duh bik.
10. Contract an hmu thei phian.
11. A ruka in ve zeuh zeuh an hrat.
NUTHLAWI ROPUI BIKNA TE
1. Beidawn hnua par vul leh an ni a.
2. Tahna mittui hru hula nui leh an ni a.
3. Aganwadi principal trainning thlap an ni a.
4. Sumo day & night service hrep tawh an ni a.
5. Paihte leilet bawng anga hrual fip tawh an ni a.
6. Antam lak hnu chawr leh an ni a.
7. Hmangaihna kawngah pawh sapui hliam anga kawlh, thuro khawi lai ang maia nunnem an ni.
PATHLAWI CHU
1. Leather Jacket an ngaina em em.
2. Vaihlo tui zawrhna an hre thei.
3. Thimhlim dawrkawn titi an thiam.
4. An lu a buk a. Luphut an ngah hmel.
5. Mi inkhawm kal lai lam hawia Ha nawh an ching.
6. Mi zu ruk sak an hrat.
7. Mi lirthei khalh hawh sak an ching.
8. An in la mistiri em em.
9. Thiante nupui tlan ko ah an tha.
10. Radio News an ngaipawimawh em em.
11. Ruihin unaupa te nupui rel an ching.
12. Thawh fuh thut tûka zin thei reng an ni.
PATHLAWI FAKNA
1. Nupuite an duat em em a, tlangvalte angin nupuite kutthlak an ching ve lo.
2. Nupuite tan an inpe zo em em a, an duh zawng apiang an tihsak thin.
3. Eirawngbawl leh insuk an hreh lova, a tul chuan chhuat an nawt mai thin.
4. Hmeichhe hlutna an hre em em a, an hmusit ve ngai lo.
5. An zei em em a, engkimah nachang an hre em em mai a ni.
6. Nupuite tihmangan leh lungngaih hreawm taka siam hi an thil hreh ber a ni.
7. An nupuiten thil tisual palh pawh nise, hau mai lovin an zirtir zawk thin.
8. An nupuite duh zawng apiang chu, harsa deuh pawh nise an tihsak hram hram thin.
9. Hmeichhiate duhthusam chu PATHLAWI -ah hian a kim vek e.
(Thu tak khûka khûk pui chi a ni lem lo).
HLAWNCHHING
No comments:
Post a Comment