KA NGAI BER CHE (Article)
HC Lalramdina
Kum hnih a vei ta reng mai... Tlante, ka ngai țhîn lutuk che a sin! Ka la hre reng mai, vawiin hi kan intawnna ni champha kum hnihna (18.2.2016) a ni. Kum hnih lai liam tawh mahse, ka ngaihtuahnaah i châm reng țhîn. I hmêl hmuh a, i aw hriat leh ka châk țhîn lutuk a sin. Khawiah nge i awm tâk daih le? I țha ang chu maw? I chanchin ka hriat lohna a va rei ta êm! Min ngai ve țhîn ang che maw? Kei chuan ka ngai țhîn lutuk che a sin! Ka ngai vawng vawng che.
Hun reilotê chhûng atân chauh (Kâr khat chhûng atân chauh) kan intawng a. Kâr khat chhûng chauh mai ni lovin, kumkhuain awmdûn thei ila tia duhthu kan sâmte kha 'Hun nunrâwng' tak chuan min pawt țhen ta si a. Tunah chuan nun hlui mai an chang zo ta. Kohkîr theih a ni tawh silo. Ka ngai che, ka ngai lutuk che a sin.
Zân a lo thlenin nang ngai a zual a, zân rei tak thlengin ka ngaihtuah che a. Chhûn a lo nihin engtin nge hun i hman ve ang aw... tih ngaihtuahin, nilêngin ka rilrûin ka suangtuah țhîn che a sin. Kan nun hlui, ka thinlunga hlui ve thei silo te ka chhuikîr a, kan intawn tirha ka hlim zia te, reilotê kan awmdun chhûnga enghelh nei hauh lova kan hlim lai hunte kha... Kan hlim hun reilotê chhûnga he khawvêl țawp tawh tak hi mawi ka tih zia leh ka thlâkhlelh si zia te, i kianga ka awm laia chhûn leh zân tâwi ka tih țhin zia te, hun i nawr kal thei emaw tih mai tûra a liam chak ka tih țhin zia te, i zâra nun ka thlâkhlelh zia te kha. He khawvêl hian khâng kan hlim lai hunte kha a her liampui chak lutuk a ni ti raw?
Hlim takin kan intawng a, hun reilotêah kan ințhen a lo ngai ta si a. Mittui tla zawih zawih chunga kan invai liam a lo ngai ta kha ka nuna ka thil tawnte zîngah chuan hreawm ka la tih ber țum a nih hial ka ring. Khua hmuna lêng lo nafam chu ințhen a țûl țhîn si a. Nitin, zantin phone call leh sms hmanga inbiain chanchin kan inhrilh dûn țhîn kha a ni a. Hlim taka i awm thu ka hriatte khân ka lo lawm ve êm êm ringawt a. I chanchin ka hriat loh apiangin ka thaw a ipik a. I hah apiangin ka thâwk a lo rang ve zêl a, i chauh thu ka hriat apiangin ka hringnun hi a chau ve zêl țhîn kha a ni a. Khatia tlai lam dâr 5/6 vêl a lo rîka, nilênga kan hun hman dânte inhrilh tûra kan inbiak țhin lai te kha ka va ngai thar țhîn tak êm! Tunah erawh chuan ka phone rêng rêng hi a ri ngai ta lova, "Ka ngai che a sin," i tih thâwm hriat tûr a awm tawh si lo. "Ka number hi ka thlâk miah lovang, chhan țha tak avânga ka lo thlâk ta a nih pawhin ka hrilh dâwn che nia," min tih kha, i number pawh a pahhnihin ka la nei a, mahse, biak tlang theih i ni ta si lo. Eng vâng nge? I chungah eng thil nge thleng ta le? Chanchin engkim min hrilh țhîntu khân, chhan leh vâng engmah min hrilh lovin min ngawihbosan ta mai si a. Min va tihrilhhai ve le? Ka chan tûr hi min dâwnpui miah lo em ni?
Tunah chuan kan kâr a hlain mual tam takin min kar dan tawh si a. He nun khawhar tak hian vawi tam tak ka ngaihzia che hrilh nawn leh che ka duh țhîn. Mahse, min chhâng tûr i awm tawh silo. Nang chu i țha ang tiraw? A ngaitêin keimah bawk ka lo inngaihtuah leh țhîn. Kan ințhen hmaa (Kan awmdun lai) i nundân ang khân i la nung reng nge, nun thar neiin khawvêl thar i din tawh zâwk???
Engkim mai hian nang min ngaihtir a. Râl khat hla deuhva tlâng lo lang ruih te, țhâl romei zâm riai te, chhûn Ni sa vawl vawl te, ramngaw hmun hring dup mai te hian ka lung an tilêng êm êm țhîn a. Zâna Thla êng ruih mai te, Arsi chhiarsên loh êng tuar mai te, chhûm kal delh delh te, thlasik kawng lang uarh mai te hian ka lung an tilêng êm êm thin. Chûngte chu emaw ka lung tilêngtu ka lo ti thin; A lo ni lo! Ka lunglênna hi nang ngaih vâng zâwk a lo ni!
He thil, nang ngaih vânga lunglênna, min kiansan khat êm êm mai hi engtia han tih tûr nge ni ang le? Ka dam chhûng zawng hian mi zui zêl dâwn em ni? He hringnun ka hman chhûng zawng hian min tirethei reng ringawt dâwn em ni le? Aw... vawikhat tal i aw hre leh thei ila, ka lunglênna leh khawharnate hi hrilh che ila, nang chuan min hnêm thei leh êm êm âwm si a. I kianga awm leh theih ka van châk tehlul êm! Min ngai a ni tih min hrilh leh la, keipawn ka ngaih zia che hi ka hrilh nawn mawlh mawlh ang che. Mahse, chu ka duhthusâmte chu he lei hreawma ka awm chhûng hi chuan, engtik lai mah hian a thleng tawh dâwn lo em ni ang le? Ka ngai thei lutuk che a sin! Ka ngai lutuk che.
I taksa chu ka hmuh theihin awm tawh lo mahse, i hlimthlâ leh i duhawmna chu he ka thinlung, mitthla leh suangtuahnaah hian a châm reng a ni. Kan nunhlui chhuikîra suangtuahna nêna lâikhum ka zâl chângte hian lunglên vânga bianga mittui lo luang thla raih raih chuan nang ngaih min tizual țhîn. He khawvêla hmu leh ngai tawhlo tûra ka suangtuah châng che hian, ka thinlung hi rûmin a țap fo țhîn. Thil thleng engkim hi a tak taka dah theih loh châng ka nei fo va, thil theih loh tûra ka ngaih țhinte pawh hi thlâk danglamin a awm fo bawk a. Engkim hi thil thleng thei a nih si chuan nang nêna intawng leh tûr hian kum maktaduai engzâta tam hi nge a ral ngai ang le??? Nang tawn leh nân hian engtiang chiaha rei hi nge hringnun piahlamah pawh hian ka nghah ngai ang che aw??? Vawikhat chauh tal intawng leh ila lungmuang takin pialrâl lamtluang ka zawh thei tûr a.
Ka ngaihtuahna zawng zawngte hi i hnênah a awm a, ka ngai che a, ka ngai ber fo vang che.
HLAWNCHHING
