KÂNGMEI LAKA FIMKHURNA HAPTA

KÂNGMEI LAKA FIMKHURNA HAPTA (Article)

                                                HC Lalramdina

          Kum 2018, February thla kan chuangkai chauh va, khua a rovin a țhâl leh ta hle mai a, kângmei chhuak (In kâng) hriat tûr a awm leh ta zauh zauh mai. Mi tinte eng tiang kawngin nge fimkhur kan ngaih tih chu hai rual a ni lo. Khawtlâng hruaitute an tlangau dum dum a, tin, chanchin buah pawh In kâng chhiar tûr a awm leh ta nual mai a, mi tinte hi kâng mei lakah kan fimkhur a țûl takzet a ni.

          Țhâl lai hian ruah tui kan hmuh loh rei tawh avângin khua a ro êm êm a, kângmei chhuah awlsam lai tak a ni țhîn. Chuvâng chuan, hetih hun lai hian kângmei chhuak thei tûr lakah mi tinte kan fimkhur tlân a țûl hle a ni. Kângmei hi engtik lai pawha chhuak thei chu ni bawk mahse, tûn ang hun lai hian khua a ro êm avâng hian fimkhur zual a ngaih hun lai tak a ni tih hriaa mi tinte kângmei chhuak mai thei tûr lakah hian kan invên ngun hle a țûl a ni. Khua a ro hle a, ruah han sur ve te lah a tialh duhtu lek a ni mai a, meisiin thil a khawih pawi theih zia hre rengin mi tinte i fimkhur teh ang u.

          Kan ramngaw, thing leh mau leh nungcha tinrêngte suattu ber kan rama kângmei chhuak țhîn tihtâwp hi siamtu Pathian laka kan bat a ni tih kan hriat tlân țheuh hi a pawimawh hle mai.Thing leh maute hi kan nunna hnar, boruak țha te, tui tlan tûrte leh nitina kan khawsakna kawnga kan mamawh tinrêngte min petu an ni a, kan ramngawte tikâng lo tûra theihtâwp chhuaha hma la theuh turin kan inngên a ni.

          Ram kâng laka kan lo fihlîm zâwk nân Mizoram Sâwrkârin Lo leh Huan hâl hun tûr ruahmanna a siam țhîn a. He thupêk hi Lo leh Huan hâl tûr neite chuan zâwm țheuh ila, mei kawng pawh țha takin sial țheuh thei ila a duhawm hle mai. Ramngaw kan humhalha kan tikâng lo a nih chuan keimahni tân mai bâkah kan tu leh fate tân ram kan humhalh tihna a ni a. Ram tikângtu chuan hnam a timualphoin, ram hmêl a tibâl a, chuvâng chuan mi tinte i fimkhur tlâng ang u.

          Kângmei avânga mihring nunna hial chân tate, in leh lo, bungrua zawng zawng pawh chuh hman miah lova chân tate an awm țhîn, a pawi hle mai. Tam tak hi chu vânduaina tâwk ve hrim hrimte pawh an awm laiin, țhenkhat erawh hi chu fimkhur loh vângte pawh a tih theih ve âwm e. Chuvângin, mi tin kan fimkhur tlân hi kan himna pakhat a ni tih kan hriat a țha âwm e. Fimkhurah fimkhur luat a awm love.

"Lungngaihna i pumpelh theih nân - Kângmei lakah fimkhur ang che"

                         HLAWNCHHING