CHHAWRTHLAPUI THANGVÂNZÂWL A KÂI CHÂNG TAL CHUAN

CHHAWRTHLAPUI THANGVÂNZÂWL A KÂI CHÂNG TAL CHUAN (Poetry)

                                                HC Lalramdina

Kha chen sûlang inzuia lêng hmun țhîn kha
Lung herin vâl dang tâwnah liam tawh mahse
Chhawrthlapui thangvânzâwl a kâi châng tal chuan
Chhîngmit chauh tal zawng a lêng hmun leh mahnâ

Ânnêm biahthu di kan hlan dun zawngte kha
Vânrial ianga ralin thâmral tawh mahse
Chhawrthlapui thangvânzâwl a kâi châng tal chuan
Suangtuahnain biahthu min hlân leh mahnâ

Duhten țangnêm bêla duh tin kan sâm lai
Puanang chulin khuarei an chang zo ta si
Chhawrthlapui thangvânzâwl a kâi châng tal chuan
Nunhlui dâwn kîrin țângah bei leh mahnâ

Lamkâwia dârang intawn châng nite hian
Suihlunglên biahthu hlân rem tawh lo mahse
Chhawrthlapui thangvânzâwl a kâi châng tal chuan
Chhîngmitthlain biahthu min hlân leh mahnâ

Kan țuanna vângkhuate chu hmun mah sela
Mualza tam iangin kan kar a hla tawh si
Chhawrthlapui thangvânzâwl a kâi châng tal chuan
Chhîngmit chauh tal zawng a lêng hmun leh mahnâ

                         HLAWNCHHING