HMANG CHANG

THAWMHNAWA THIL KAI THENKHAT TIHREH DAN

          Hmang tangkaitu tur kan awm tâk in. Tu leh fa harh tak tak leh ninhlei tak tak nei ho tan phei chuan a tangkai phian ka ring! Chutih rualin nula leh tlangval thenkhat kawr mawi leh kekawr mawi man to tak tak neia inbel thin, mahse eng emaw thil kai tihreh harsa tak alo kai palh avanga mahni thawmhnaw man to tak leh duh tak hluihlawn tum mekte tan pawh a tangkaina leh a pawimawhna hi kawmthlang pitarte tana a nep loh tluk zet in a nep chuang bik hauh lo a nia.

PENTUI KAI :- I kawr leh kekawr, i puan leh thawmhnaw dang hrim hrimah Pentui alo kai palh anih chuan, Bawnghnute chhuangso la, chumi hnuah sahbawn emaw surf powder emaw nen i thawmhnaw chu i nuai ang a, a tawp nan tuia fai takin tleuh leh rawh.Chutianga i tih hnu chuan i thawmhnaw duh taka Pentui kai kha a reh tawh mai ang.

CHAWHMEH KANNA ENG KAI :- I chawhmeh kanna eng kha i puanah leh i thawmhnaw hak laiah i lo tikai palh a nih chuan, i thawmhnaw kha tui tlemin han ti huh hmasa phawt la, thil eng a kaina lai takah khan eng ang Sahbawn pawh han hnawih phawt mai teh le. Chumi hnuah chuan ni saah pho ang che. Nisaa i pho hnuaah chuan, Aieng rawng chu a lo sen tawh ang. Chumi hnuah tui vawt nena suk fai tawh mai tur a ni. Khawnvartui leh Spirit hman pawn a reh thei tho tih chu kei aiin i hriat ka ring. Mahse kawr rawng a tichhe thei a ni tih erawh i hrelo maithei a...

SA MAWM LEH TEL MAWM KAI :- I kawrah leh i kekawr, i puanfenah leh i kawrchung mawi takah tel mawm leh sa mawm a kai palh anih chuan, i thawhnaw chu khawnvartuia sil hmasak tur a ni. Chumi hnuah insuk sahbawn in su ang che. I sûk zawh hnuah Nisa ah pho ang che. Anih loh pawn tel mawm leh sa mawm kaina laiah khan Powder hnawih la, ni thum/ni li hnu velah thlep la, chumi hnu ah su rawh. I duh zawk zawk method i hmang thei.

KUHVA EINA SEN :- I kuhva eina sen kha i thawmhnaw hak laiah khan i ti kai palh anih chuan, i thawmhnaw chu chinai emaw bawnghnute chhia emaw serthur hmanga tui nen chawhpawlha suk fai mai tur a ni. I thawmhnaw suk chu sawr fu aiin sawr fu loh khan pho ang che. A chhan chu thawmhnaw a tih tlo zawk vang a ni.

KAWR NGHAWNG BÂL :- Kamis nghawng bal chhah tawh tak hi chu suk fai mai a harsa tawh thin. Mahse awlsam deuha tihfai dan tha deuh mai chu, I shampoo hman lai tha zet kha tuiah han ti phuan berh berh la, chu Shampoo chuan darkar chanve vel i kamis nghawng bal chu han chiah vang vang la, chumi hnuah chuan awlsam zetin i su fai mai dawn a ni. Nghawng mawm chi i nih chuan kawr nghawng nei i hâk hma khan i nghawng ah emaw i kawr nghawng ah khan powder tat keuh thin la, i kawr nghawng bal nghet tur kha a veng ngei ang. Kawng leh lam zawng tak phei chuan i rimtui phah sawt dawn a ni.

THIR TUIÊK KAI :- I kawrah emaw i kekawrah emaw i thawmhnaw hrim hrimah thir tuiêk a kai palh anih chuan i thawmhnaw chu tuiso ah han chiah hmasa phawt mai la, i chiah zawhah chinai tlang han hnawih leh tê tê la nisa ah pho ang che. Chumi hnuah chuan tui sa takin su fai leh ang che. Anih loh pawn Sertui ah chiah a, a hnuah nisaah phova sukin a reh ve thei tho.

HMANG CHANG THENKHATTE

1. Cotton var hi Soda nena tuiso-a chhum hian a tivar zual.

2. Puan i suk a, ruah a sur si a phona remchang a awm loh chuan chhuatah lehkha phah la, chumi chungah chuan thawmhnaw huh chu pharh la, Fan chhemtir mai rawh.

3. Thawmhnawa thisen kai chu chi tuiah engemaw chen chiaha sukfai theih a ni.

4. Aieng leh mawm thawmhnawa kai hi Toothpaste hnawih la, suk hmain darkar hnih vel chiah rawh.

5. Thir tuiek thawmhnawa kai chu ser tui emaw, dawi hnawih a, nisaah rei tak phoin tui sain a sukfai theih.

6. Puan i nawhin, i tih huhna tur tui kha tui vawt aiin tui lum hmang zawk ang che.

7. Thing furniture-a mawm a kai chuan spirit in a hruk fai theih.

8. Thing furniture ah rawng a kai palh chuan Vinegar leh tuilum a nawh fai theih a ni. Pentui kai chu chi leh sertui-in hru ang che.

9. Glazed tile bal tihfai i duh chuan ser tuiin zut chhuak vek la, minute 15 vel hnuah puannem in i hrufai dawn nia.

10. Thirbelah chawhmeh i kan dawnin tel telh hmain minute khat vel chhuang sa ang che, chawhmeh bet tur a veng ang.

11. Alu i vel hmain tui lumah chiah hmasa la, vel a awlsam phah ang. Alu chips i siam dawnin, i kanna tur telah soda tlem thlak la, alu chips chu a tiram ang.

12. Thlai hnah sil naah Vinegar tlem far la, rannung awlsam takin an tla mai ang.

13. Buhfai tuilo chu-tel (oil) tel lovin kang hmui hret ila, tuia rei vak lo chiah leh hnua chhum hian a tui phah deuh thei.

14. Sa i siam reng rengin a hmin hma chuan chi al lo la, chi telh hma hian a ti sak duh. Sa i kang ro emaw roast anih pawhin chi telh mai suh. Chi telh hma hian a sa hanna a sawr chhuak duh thin.

15. Bawnghnute a chhiat i hlauh chuan, i chhuanso hmain chini tlem telh ang che. Bawnghnute belah stainless steel no dah la, a so liam lo mai ang.

16. I irhfiak tihreh i duh chuan tuiah aieng tlem telh la, chu chu in la, a reh mai ang.

17. Battery hman hmaa, fridge a dah hian a hman chhung a rei bik.

18. Lehkhaah hriak i tih far palh chuan a phek lehlam ve veah powder phul vat ang che. Powder chuan hriak chu a hip mai ang.

19. Bungraw bawmah te, perek bawmah te, chalk dah tel la, a tuiek tur a veng ve thei.

20. Mombati hi i hman hmain fridge ah dah la, chhit a tlo duh bik.

              

               HLAWNCHHING