Mal taka ka awm hlau em em thin tu khan tunah chuan keimah chauha awm turin min hnutchhiah a, natna ka tawrh phal ngailo tu khan tunah chuan natna tuar turin min kalsan ta. Hlim taka min siam thin tu khan a duh ngai reng reng loh lungngaihna min siam a, ka hlim theihna anih dawn phawt chuan ka tana inpumpek vek duh tu ngei khan tunah chuan he ka hringnun khawvel hmu ngai tawh lo turin ka lak atangin a hla thei ang berah min kalsan ta si.
I nun khawhar tak luahkhatna zawnga ka hnen ilo pan hun kha a ni leh thla, a kum te nen lam hian he ka hringnunin thilmak a tawnte zinga ka chhiar tel ve ngei theihna turin, Ni leh Thla ah te khian i hming chuang mawlh rawh se. Khang hun te kha kohkir leh theih chu nise, kokir in ka lunglenna leh khawharna te hi i bulah sawiin, nang chuan min hnem thei leh em em awm si a. Ni e, nang leh kei hi Khuanu hian intawng turin min ruat ngei alawm, mahse hun reilote chhung atan chauh a ni. He Khawvel hian khang hun te kha a her liampui chak lutuk a ni ti raw? Kan pahnih inkara thil thleng ang hi chu mihring chhuan lo la awm zel tur te hi chuan tawng ve lo se ka duhsak hial a sin; a chhan chu kei ang bawka natna tuar theilo an nih chuan kei ang bawk hian an tan dam hi hremna chikhat a ni ve dawn si a. An biang atanga lunglenna mittui far in a bual chhuah hunah chuan an hringnun chu kei ang mai hian ngui leh khawhar takin an hmang ang a. Fur ruahtui tlak cherh cherh lai te, vanlaizawla Chhawrthlapui in mawi theihtawpa a en lai te chuan kir leh ngai tawh lo tur nunhlui chu an chhuikir ve awm si a.
Engah kher nge ka lo tawn che? Rinawm min tiam a ni lawm ni? Egtiklai pawha itana rinawm reng thin he ka THINLUNG hian tun thleng hian ala nghak che a sin. Kir leh zai reng i rel mawlh silo. Thihna hi nang tawn nana kawng awlsam ber a nih a, nunna hnar ber hi chaw a nih si chuan, "ka thinlung hrehawmna min belhchhah sak thin tu leh ka nunna min pawhsei sak tu "chaw" hi ka tan hmelma ni rawh se", tiin he ka thinlung hi a rúm thin asin. I taksa chu ka hmuh theih in awm tawh lo mahse i hlimthla leh i duhawmna chu he ka thinlung hian a thanhnan tlat tawh a. Sik leh sa boruak inthlak lai mawlh maite hi a tawrh hrehawm lai ber a ni thin. Hunpui alo herchhuah changa i tel lova hlim taka ka nuih chang te hian ka thinlung hian min vaw na teh thin a sin. Kan sulhnu chhui kir a suangtuahna nena laikhum ka zal chang te hian lunglen vanga bianga mittui lo luang thla raih raih chuan nang ngaih min tizual thin. Kan vanduaina tawh te ka chhui kir a dem tur awmlo pui ka dem a, a mawhphur tur ber thiam zawka in dah in nang ka dem che a, mahse ka ngaihtuah chian poh leh dem tur i awmloh zia a lang chiang leh thung si. He khawvela hmu leh ngai tawhlo tura ka suangtuah chang che hian, "enge khawvela ka pianchhan ber hi ni ang le?" tiin ka inzawt fo thin. Thil thleng engkim hi a tak taka dah theih loh chang ka nei fo va, nang nena inthen hi thil theih loh tlukah ka ngai thin. Mahse thil theih loh tura ka ngaih thin chu thlak danglamin alo awm ta si a. Engkim hi thil thleng thei a nih si chuan nang nena intawng leh tur hian kum maktaduai engzata tam hi nge a ral ngai ang le??? Nang tawn leh nan hian engtiang chiaha rei hi nge hringnun piahlamah pawh hian ka nghah ngai ang che aw???
Engtikah mah a hmel ka hmuh ngai loh tur, engtikah mah a tang ka belh ngailoh tur zun ngaiin chhunni leh zankhua ka hmang ral mek chu ani sia. Ka hmangaihna hrethiam lo mahse amah hmangaih thei tura Khuanu'n min duang ve ringawt pawh hi ka lawm tawk a tling. Amah vanga ka chawtui ber lo ni ta lunglenna leh ka thiantha ber lo ni ta khawharna te tuar thei tura chakna min petu a sakhming mawi tak hi ka hmui phun tawp thlengin ka lam zel ang. Kan kar a hlain ka damchhung a sei leh ka ngaih chhung a rei dawn tih hre mah ila amah hre tura ka lo piang ve hi ka vannei takzet. Min hnuchhawn mahse ka suangtuahna vakvai tak chuan a zui zel ang a, ka duhthusam puitling thei dawnlo mahse sam sual ka inti phal heklo. A hmel vawikhat chauh tal tawng leh ila lungmuang takin pialral lamtluang ka zawh ngei ang. Mahse a aw ri hre turin chanvo ka nei tawh lova. A hmel hmu tur phei chuan eng hlutna mah ka pai silo. Aw, vante u ka hmangaih kha hualhim zel ula ka hmangaihna hi hrilhfiah hram teh u, "nang ngaiin a tlei zolo" tiin.
Ka mittui farte chu i hmu thei ang a, ka chhungril natna erawh min hmuh pui silo. Lang lo hliam vangin chhungril thuk tak tahna ka veiin ka chau leh thin. Ka hmangaihna che hi engmah lo maiah chantirin na tak tuarin min liamsan si maw? Engtik niah emaw chuan ka ngen ang che hian tu emaw chu ila ngen ve ngei ang. Chutih hunah chuan ka natna min tawmpui turin duh lo chung chungin ka kawng zawh lai hi ila rawn zawh ve ngei ang. Mahse kei anga mal leh khawhar ni lovin i hmaah ka kal zel a ni tih i hre reng dawn nia.
Aw, i hmangaih nih kha alo va hlimawm thin em!
I duat nih kha alo va nuam thin em!
Aw, ka va ngai che em! Aw, ka ngai vawng vawng thin che
Len dun leh zai rel dan a awm lawm ni?
Aw, ka hmangaih, i kiangah chuan ka hlim ve thin kha
A riang te hi lung min rualpui leh rawh.
No comments:
Post a Comment