KA U DUH TAK, MANGTHA LE

                      NGUNBIKA
          I pian leh murna, i nu leh pa, i chhungte leh i hringnun hmasa thui tak ka hre lem lo. Hriat tumna em em pawh ka nei lo kha a pawi ka ti. Hei erawh ka hria; mi tha tak, chhungkaw tha tak atanga seilian, Kristian chhungkaw mumal tak atanga lo chawrchhuak i ni tih hi.

          Thisena inzawmna reng neilo, tun hma pawha la inhre ngailo kha chhungkhat kan lo ni ta kha a ni a. Ka nu leh pa, ka u leh nau te chu i nu leh pa, i u leh nau te ni ve tawh turin leh kan chhungkaw member ni ve tawh tura kan chhungkuaa ilo lawi luh ni te kha mitthla ah hian ala cham reng mai. Kha tih hun laia kan chhungkua kan hlim zia leh kan lawm zia te kha. Ka nu leh pate'n, "Fapa thar kan nei ta!" tia an hlim zia te kha. Kan unauza ho pawhin mi bulah pawh, "Unau 12 kan ni" tiin, kan unau zinga upa ber nihna kan pe che a nih kha. Chu tih laia nu leh pa nih an tlin loh zia leh, i u leh nau te pawn kan tlin loh zia kan hriatchian em avanga inthiam lohna hlira kan khah si zia te kha. A ni tak a, kan chhungkaw khawsak harsat zia leh rual kan pawl loh zia te kan inhria a, chuti chunga kan chhungkua min ngainat der avanga belh tlak loh min bel duh kha kan va lawm em! Chhungkaw dang, khawsak pawh ziaawm deuh leh nu leh pa nih tling tak tak an tam vei nen... Khang chhungkaw dangte kha lo bel zawk ta la chuan i nunna pawh tun ai hian ala sei deuh tur hi a ni a. Amaherawhchu, kan chhungkua kher min bel duh hi chu keini chuan Pathian malsawmna ah kan ngai lo thei lo a ni. Ka nu leh pate, nangmah hringtu nu leh pate ang tak taka i en thei te leh keini pawh i unaute tak tak anga min en thei te hi a va makin a va lawmawm em! I nu leh pa tak tak te, i pianpui unau tak tak te kan tluk awm loh vei nen!

          Chhungkua inhmangaih taka kan khawsak ho lai te kha ka ngai thin. Nangmah avangin chhungkaw thar kan din thei kha a ni si a.  Nangmah avangin ka nu leh pate'n 'mo' fel tak an nei a, keini i naute tan 'u' fel tak! Nupui fanau te neia in hrang i chan lai te khan, i tan kan va thawhhlawk lo tak em! I chhungte hian engmah pek tur che kan neih loh avanga hreawm kan tih zia te kha. Hei erawh kan hria, thinlung takin kan hmangaih che a, i tan chu chu kan pek theih san ber a ni tih hi. Chuti chung pawh chuan i beisei kan phak lovang tih chu kan ring a, theih chu ni se chu aia nasa pawh chu pek che kan chak a sin. Ka nu leh pate'n an tu te (in fate) hmel an hmuh a an hlim theih zia kha. Amaherawhchu, pi leh pu nih an tlin loh avanga pawi an tih thu mawlh an sawi leh thin. Kan tih tur kan tih loh avang leh tih awm loh tak thil kan lo tih avanga in rilru kan tihnat na tam tak a awm ngei ang. Nang chuan, mi tha tak i nih avangin i rilru natna pawh i tilang lo a ni maithei e. I beisei kan phak lohna te a awm a nih chuan khawngaihtakin min ngaidam ang che aw.

          Amaherawhchu, chhungkua kan din tawh chuan ei leh in tur ngaihtuahin eizawnna kawng dap a ngai thin a. Dam lai ngei pawh hian inthen a tul leh thin si a. Chutiangin, keini pawh eizawnna a awlsam deuh beiseiin khawdangah kan insawn kha a ni a. Khatih lai pawh khan min zui i duh hle naa nupui fanau neilai i nih avanga min zui rem ta silo, i lungleng mittui tla zawih zawih chunga ka pa hnena, "Ka pa, mangtha aw, nakin ah min hruai ve ula, in bula khawsak loh chu ka ngaingam lo" tia min thlah lai te kha ka ngaihtuah let chang chuan, hetiang em em hian a ni maw min lo ngainat? ka ti thin. Kan bula chen leh i thlakhlelh tehreng nen, kan hruai hman ta lo che hi pawi kan ti tawp hleithei lo a sin. I nun a tawi lua a ni. Kan va ngai tak che em!

          Heti maia min kalsan hi kan ring ngai lo a sin. I nupui fanau te i khawngaih lo em ni ? I nupui hmeithai chan chang mai tur leh i fate fahrah ni mai tur hi i ngaihtuah lo em ni ? I nu leh pa leh i u leh nau te kan hrilhhai tur zia hi i dawn lo em ni? Kan la ngai in kan la thlahlel che a sin. I faten 'pa' neih an la duh a sin. I fate enkawl turin tlinglo kan va in ti tak em. I Pathian kohna chang a min kalsan ni khan i nupui fanaute hmalam hun tur kan ngaihtuah a, rorel dan leh remruat dan pawh thiam har kan ti a, ngaihtuahna mumal pawh kan nei thei lo a sin. Amaherawhchu, a rawng i bawl sak thin, i Lalpa hnenah hlim takin i chawl a ni tih kan hriat avang erawh chuan kan thla a muang a ni. I nupui fanaute pawh lo ngaihtuah lo la, Pathianin min tanpui ang a, theihtawp chhuahin kan lo buaipui ang a, puitling takin an lo seilian ang tih hi kan beisei tlat a ni.

          Khang hun reilote, chhungkua hlim taka kan chen ho lai khan thil thar kan va chharchhuak nasa tak em. Thil tha min hnutchhiah tak zawng zawngte kha tihlawhtling turin theihtawp chhuah kan lo tum dawn nia. Kan chhungkua in chhiat that kan la tawk ang, chutih hunah a tangkai ber i hmel kan hmu tawhlo tur hi kan ngaihtuah in kan khua a har lawk a ni. Kan chhungkua tihlim thin tu khan kan chhungkua min ti lungngai leh si hi hriatthiam har kan ti. Mahse kan thatna tura Pathian remruat a ni ang e. I hmel hmuh tur awm tawh lo mahse, kan rilru ngaihtuahna leh kan mitthla chuan i cham reng tawh ang. Kan khua a va har dawn tak em!

          Kan chunga i thatna zawng zawng avang khan kan lawm a, i rilru kan tih natna zawng zawng ah i ngaihdamna kan dil nawn leh e. Keini pawh engtikni ah emaw chuan he kan khualzin kawng hi kan zawh tawp hun a lo la thleng ang; chutih hunah chuan Pa angchhung ah hlim taka kan lo thlen ve theih nan Pathian hnenah min ngen sak dawn nia. He lei hringnun hi a ral hunah, Pa hnen kan lo kal hunah i chhungte hi van kawtthler ah hlim takin min lo hmuak ang che aw.

          Hring lam hawi tawh lo mahla,
          Sakhmel tawn ni awm tawh lo
          mahse
          Chatuan khua a var hunah
          chuan
          Kan intawng leh ngei ang then
          ni her tawh lo tur in.

          Mangtha! Ka u duh tak, mangtha le.

          (Kan hmangaih, kan u duh tak, Ngunbika, kum 54, Dt 31.11.2015 a min boral san tak puala amah hriatreng nana ka ziah a ni. HC)