Dt 27 March 2016 @ 11:12 pm khan ka thiannu (A hming leh veng chu sawilang lo mai ila a that zawk ka ring - HC) hnen atangin message ka dawng a. Ka han chhiar chuan ti hian a lo inziak a, "U Ramdin, ka dinhmun hi avan hreawm tak... Rilru hah reng rengin ka hun ka hmang chu a ni si a. Ka rilru hahna lah tumah hrilh ngam reng ka nei bawk silo. Ka dinhmun hi hrilh ta che ila min tanpui duh ang em? Mahse, tumah ka hrilh ngamlo hi ka harsatna lian ber a ni lawi si a, intihhlum tawp mai te ka duh..." tiin!!! Mahni lo maha rilru lo hah ruk ve bawk nen, chhan dan thiam har ka ti khawp mai. Ka thiam ang tawka hnemin, message te chu ka'n reply ve a, a harsatna tawh te pawh chu sawidun in kan inkawm a. Zan a rei tak deuh avangin a harsatna tawhte chu nidanga sawidun leh turin kan inmangtha ta a.
Mahse, chu ka message dawn 'lungchhiatthlak tak' avang chuan muhil thei lovin zan rei tak thleng ka meng a. Ka rilruah thil tam tak a lo lut a, ka ngaihtuahna a vak thui hle mai. A tuk lamah te pawh chu ka message dawn bak lo chu thil dang ka rilruah a leng mawlh lo. Ka theihna, thiamna leh hriatna a tlem bawk si a, rilru a hah angreng khawp mai.
Ni tam, zan tam ka ngaihtuahna a luah hnuah he thil tlemte hi ka ngaihtuah chhuak ta a. Thiam leh thiam lovin, ka hriatna zawng zawng sawm khawmin, ka han ziak chhuak ve dawn a ni. Nachhawkna (Damdawi) ang leka reilote chhung tal min chhawk beiseina nen ka han thlasik mau puah ve phawng mai dawn a ni.
Tunlai hian mahni intihhlum a hluar ta viau mai a. Tunlai fashion ang lekah kan ngai tawh emaw ni chu aw tih te pawh a awl ta rum rum mai. Chhan leh vang tha tak a awm te pawh a ni mahna. A chhan erawh a inang vek lo maithei. A tlangpuiin nun beidawn vang a ni ber mai awm mang e. Hei hi thil pawi tak a ni. He hri thalo tak hi engtia han tihbo chi nge ni ang aw? tih hi vawi tam tak ka lo ngaihtuah ve thin a. Tih theih ka nei tlem hle si. Hetiang harsatna sukiang tur hian keimahni theuh kan pawimawh a, chutih rual chuan midangte tanpuitu pawh kan ni thei bawk a ni. Hetiang harsatna tâwk mek te ka tanpui ve theihna awmchhun nia ka hriat, he thuziak mawl tê mai hi ka thiannu hnem nan leh nun beidawngte leh chutiang avanga harsatna tawk mek te tan ka hlan e.
MAHNI INTIHHLUM I LO TUM EM NI?
Mahni intihhlum hi i rilru tak takin i duh em??? Thutlukna i siam hmain vawikhat chauh, vawikhat chauhvin han inngaihtuah nawn leh hram teh.
Harsatna eng emaw avangin i rilru a hahin hreawm tiin i beidawng viau em ni? Hreawm tihna hi ngaihtuahna mai chauh a ni a sin. I ngaihtuahnate, hreawm i tihnate leh i beidawnnate chu inhneh tirin i tlu mai dawn em ni??? Intihhlum duhna khawp eng harsatna nge i neih? Chung i harsatnate chu intihhlumna tur khawpa chhan tha a ni rêng em? I nunna kha i ta a ni lova, a petu che Pathian ta a ni a sin. Isua Krista thisena lei i ni a. I nunna kha a hlu a sin.
Mahni lo intihlum ta la, i ruang hmu hmasa bertu tur chu i laina, i nupui/pasal, i nu/pa, i unaute emaw, i fapa/fanu te an ni ngei dawn a. An damchhungin hrui hrualte emaw, thisente chu an mitthlaah a cham reng tawh ang a, zan an mu dawn ang a, an mitthlaah a lang fo ang a, mittui nen an dam chhung hun an hmang tawh dawn a sin. I lainat lovem ni? An hmangaih lo che nia i hriatna chhan kha thil inhmuh fuh loh vang mai mai a ni thei a sin! Anni aia hmangaihtu che chu he khawvelah hian an awm lovang.
Police an lo thleng ang a, i chhungkhat laina leh thenrual tha nangmah hmangaihtute chu zawhna an zawt ang a, rinhlelh tur a awm em tia i lenrual duh te an han thlithlai tur chu i lainat lovem ni? Mi te chu an lo pungkhawm ang a, eng thil nge thleng tih hriat an tum ang a, i chhungte hrilhhai hmel tur chu han dawn ve teh??? I awmna hmun chu an tan damchhunga an rilru natna thlentuah a chang tawh dawn a sin. I sulhnu an han chhui ang a, in an han tifel ang a, lainata hmangaih em em tu che rilru nat dan tur te han ngaihtuah ve chhin phawt teh...
I mimal nun zahawmna chi hrang hrang, i bag, i phone leh i thawmhnawte chu an han hai ang a, rinhlelh tur a awm em tiin an zawng ang a, chutih laia i chhungte leh i thiante mittui nena an han awm tur chu. An chaw ei a tuilo vang a, an muhil thei hek lovang. Chungte chu han ngaihtuah hmasa leh phawt teh, i ngaingam dawn em ni???
I taksa, duh taka i lo bual fai thinte chu dimna reng nei lovin, Doctor kut chuan a sawngbawl che ang a, ina hlim taka mu thin kha concrete chhuat daiah i zal ang a, i chhungten mittui nen an nghak dawn che a sin! I hna, i relationship, i hriselna lam dinhmunte chu zawhna tlanglawn a ni ang a, i kal san tur chhungkhat ten hrilhhai taka zawhna an chhang tur chu i lainatin i khawngaih lovem ni???
I chanchin an sawi apiangin a tawpah, "Mahni intihlum" tih ri a lo ri tel zel tawh tur te hi a pawi dawn em mai. I fel zia te, i nunnem zia te, i thilphal thin zia te kha han ngaihtuah teh. Heti maia tawpsan i tum hi engti zia nge ni ta ngai??? I chhungte hian an lainat che a, an hmangaih che a, eng harsatna pawh tawk la, nang hnêm tur che hian an in pe em em a sin. I harsatnate chu sawi chhuak phawng mai la, i beisei aia hlimna nasain alo hmuak ngei ang che.
A rûka tawrh atan chuan i lunngaihna hi a sang ve em pawh a ni maithei e. Mahse, damchhan nei tawh lo nia i inhriatna te kha han ngaihtuah nawn leh la dam chhan i neih zia hi i hre tan dawn chauh a ni tih i hrethiam ngei ang.
I nun beidawng avanga thih mai i duh khan, hreawmna zawng zawng bo vek turah i lo ngai palh ang e. Bo ahnekin chatuan atan i hun a intan dawn chauh a ni zawk si a. Kan damchhung rei zawng leh chatuan rei tur zia chu tehkhin phak lovin a inthlau a, pianthar loh phei chuan mahni intihlum ta tam tak te pawh an thlarauvin an taksa a chhuahsan rual ruala inchhir tak tak an tam hian ka ring thin. Chuvangin, kei engmah nilo, nagmah anga beidawnna tam tak lo nei ve tawh thin, thih chak ve em em thin hian ka ngen a che; Sualin i rilru a dawi ât che avangin intihhlum tir che a tum kha awih suh. Khawvela i damchhung reilote atan chuan Lalpan i koh hun a nghak reng che a sin.
I chunga harsatna lo thleng kha nangmah tichhe tura lo thleng a ni lo. Engtiang taka chak nge i lo nih i hriat nana puitu che a ni zawk.
Hmanah khan i nui thin a, nimin thleng khan, vawiinah pawh i nui a, naktukah pawh nui leh rawh. Vui leh indawmkuna lungngaih nan chuan he nun hi a tawi lua deuh a ni.
Mittui nen i hringnun i chhiar anih pawhin lungngai suh, mit hian hruk hul zawh loh khawpin a tui a chhuah ngaihleinem.
Vawiin hi i upat ber ni a ni a, vawiin anga naupan ni hi i nei leh tawh ngai hek lovang. Vawiin hi i tan a va hlu tak em! Vawiinah ngei hian, i hringnun in enfiah teh le.
Hun harsa tak i tawn lai leh buaina hlirin a hmuak che nia i ngaih lai te, kal ngaihna reng a awm tawhlo nia i ngaih thleng pawhin beidawng mai lo la. Chu hun ngei chu buaina chhum kian hun chu tur chu a ni si a.
Lungngaia indawm kun reng hi a tuartu tan chuan thil hreawm tak a ni thin. Nui reng chungin kan tap a, hun liam tawh avangin kan nâ a, min hmuak mek tu hun ngei pawh hian min la vel tap fo dawn a ni. Turnipui kawlah a chhuak a, a liam leh thin ang hian hlimna chu tahna in a liampui leh si thin. Mahse, lungngaia indawm kun reng tum bik lo la, kan nun hi hlim reng thei anih loh zia theihnghilh mai lovin, hmalam nun thlira ke pen zawk tur kan ni a sin. I lungngaihna silhfente chu hlip thla la, hlimna silhfen inbel ve thei ngei turin a hmuak mek tu che hun hi huaisen taka hmachhawn turin inbuatsaih zawk ta che.
Han in ngaihtuah nawn leh teh??? Isuan, "Ka hnenah hlimna a awm a, i harsatnate chu tawngtaina nen thlarau lama i mi rin ber hrilh la, ka lo tanpui em em ang che" tiin i mihringpuite hmangin tanpui che a inhuam reng a sin. I kiangah pawh khan nangmah bia a, kawm hlima, nuihpui tur chein mi inpe Lalpan a dah teuh a sin. A rûka i tawrh avang khan i lungngaihna an hre lo mai mai a ni. He khawvel hi lunngaihna ram a ni a, i ram ila thleng lo a sin! I ram tur chu Isuan a buatsaih mêk a ni. Tuna i hreawmnate kha a hre vek a sin! Hreawm kan tawrh hi LALPAN a phal, mahse amah kan hmuh nan a ni fo. Chhan nei lovin mihring chungah engmah a thleng ngai lo. Tuna i lungngaihna pawh nakina mite hnêmtua i tan theih nan Lalpan a ti che a ni mai lo maw??? Lunngaihnate awm tawh lohna hmun tur chu he lei hi a ni si lo. Tuar hram hram la, midangte tan malsawmna i la ni ngei ngei ang.
Keipawh nangmah ang hian vawi tam tak nun beidawng takin hun ka lo hmang ve tawh thin a sin. Tun thleng mai pawh hian hun harsa takin min nangching ve mek a sin. Nun chau tak leh chhungril ruak takin ka hringnun kawng chhuk chho tak chu zawhin, ka hun tawn mek chu ka zawh a. Kal ngaihna reng hriat loh chang tam tak pawh ka nei thin. "Ka hun tawn mek te leh ka chunga harsatna thleng mek te chu ka tuar chhuak zo awmlo mange a", tih changte pawh ka ngah ve thin lutuk. Hmel pawh hmuh hreawm khawpa hmel ngui leh vuiliam mai tur hmel pu thinin, chau ngawih ngawihin thil tam tak ka suangtuah thin a. Zan ka mu a suangtuahna a kal ding mup mup reng a, he leia ka hmangaihten min phatsan chang alo awm a, " Nunkhua a har chuang mange" tiin ka hnual leh rawih thin. Thlamuang tak pawha muhil thei lovin, vengtu ten khawvar an thlir aia nasain, chu khawvar hun chu lo nghakin, "Hlim ni a lo her chhuak ve mahna" tiin nghakhlel takin ka thlir thin a. Mahse, beiseina tlemtê ka la neih hi than len tir ka ngai a ni tih bak, chu khawvar êng chuan min hriattir ngai silo. Mahse, he thu kamkhat chauh, thu khirh tak leh zawm harsa tak pawh nilo, ka rilrua rawn ri nawn leh thin chu, "I awm ang khan a ngaidam duh che, i nihna ang khan a nghak reng che. Aw ring mai la, pan mai rawh; Lal Isuan a hnar lo che" tih thu te mai hi.
Hun tha i neih lai hian vawikhat chauh han inngaihtuah nawn leh teh. I awm ang angin, i nihna ang angin Lal Isuan a la pawm duh che a sin. Insiamthat nan khua a la tlai love. Lal Isua pan phawt mai la, hahdamna i hmu ngei ang. I nunin Pathian chawimawi la, anin a chawisang ang che a, i thlarau tan chawlh hahdamna i hmu ngei ang.
Awle, chhiartu duh tak, hei hi lo hre ve la ka duh a ni. Nang chu rilru thlamuang takin hun i hmang mek pawh a ni thei e. Midangte harsatna tawh mek hi thlir liam mai lo la, an nunnain a tawrh hma ngei hian an harsatna lak ata chhanchhuakin midangte tan malsawmna i ni ve thei a sin. Chutiang tur chuan inbuatsaih rawh le. Tin, nangmah ngei pawh kha hetiang harsatna khurah hian i tlu lut thei. Harsatna chinfel hleihtheih loh khawpa lianin a rûn hunah che chuan mangangin tanpuitu i zawng ve ruai thei a sin. Chutiang harsatnate chu i lo tâwk palh hlauh anih chuan hei hi lo hre ve la ka duh a ni.
Gen 1:2 ah chuan Pathianin mihring a siam thu kan hmu a. Chu a mihring siam chu - Taksa, Rilru leh Thlarau neiin a siam a. Pawimawh bik a awm chuang lova, an intluk tlang vek a ni. WHO in hriselna chu - "Taksaa natna leh piansualna awmlo mai pawh ni lovin, Taksa, Rilru leh Thlarau damna kim hi a ni" tiin a hrilhfiah a ni.
Mitin mai hi Pathianin a bik (special) taka a siam te theuh kan ni a. A lehkhabuah kan taksa pengte zawng zawng hi a chhinchhiah vek a ni. (Sam 139:13-16). Kan taksa khawl ropui zia lanna pakhat chu, Sawrkar leh Mifingte pawhin Thisen (Blood) far khat pawh an la siamchhuak theilo hi a ni. Heti taka ropui hian min din a, he taksa Pathian anpuia siam hi a enkawl hna chu kan kutah a awm a, hrisel taka enkawl hi kan mawhphurhna a ni. Mahni ta kan ni lova, thisena tlante kan ni. He kan nunna hi mahni duhthua titawp mai turin thuneihna pakhat mah kan nei lo. Kan nunna hi a hlu si a.
Rilru lama harsatna tam tak hian kan rama thalai tam takte pawh min run ve mek a. Kan nuna pressure chi hrang hrang - Zirna, eizawnna leh materialism lama rualawhna te leh ngaihzawng lama buaina leh chhungkaw lama harsatna chi hrang hrang avangte hian mi tam tak depression ah a hruailut mek a. Harsatna an tawhin an indawmkun a, a êng lam zawnga thil ngaihtuah harsa an ti a. An thil tawn mek chuan a nilo zawngin nasa takin an rilru a hruaikawi a, an intihlum fo thin. Hei hi a pawi hle. Mihring kan nih chhungin harsatna chi hrang hrangte chu kan nei ang; Keimahni ngei pawhin harsatna chi hrang hrang kan lo tawk a ni thei e, rilru thlamuantu, Lal Isua Krista pan nachang i hria ang u. Kan nunna hi a hlu si a.
Thlarau nun chaute tan Pathian kan hnaiha kan ngaihsak a pawimawh khawp mai. (I Tim 4:8) ah chuan, taksa insawizawi a that ang bawkin Pathian ngaihsakna hian nunna, tuna awm sa leh la awm leh tur pek tiamna a neih avangin kawng tinrengah a sawt thu kan hmu a ni. Chuvangin nitin Bible chhiar leh tawngtaia Pathian kan pawl thin hi a tul hle a ni. Kan thlarau damna hi a hlu si a.
Lal Isua rawngbawlna reng rengah khan taksa, rilru leh thlarau damna a awm thin a. Damna kim hi a ngaipawimawh hle a ni. Chuvang chuan kan nunna hi i hlut ang u. Thalaite hi kan chak lai, kan vanglai leh kan kan hrisel ber lai anih avangin Lalpan a hmantlak, a rawngbawl tura min hman nasat ber hun lai a ni tih hriain, Lalpa hnenah i inhlan thar theuh ang u. Kan nunna leh kan thlarau damna hi a hlu si a.
"Nangmahni chhandam tura in hmelmate beihsak tur che ua in hnena awm zel chu LALPA in Pathian a ni si a" (Deut 20:4)
Khawvelah hian hreawmin in awm thin; nimahsela, thlamuang takin awm rawh u, keiin khawvel ka ngam ta" (John 16:33)
"Nangni thawkrim leh phurrit phur zawng zawngte u, ka hnenah lo kal ula, keiman ka chawlhtir ang che u. Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi; tichuan, in thlarau tan chawlhna in hmu ang. Ka nghawngkawl chu a nuam a, ka phur pawh a zang a ni" (Mat 11: 28-30).
" I nunna kha a hlu a sin !!! "
HLAWNCHHING
No comments:
Post a Comment