ȚANPUI VARTU HNAI RENG - PATHIAN

ȚANPUI VARTU HNAI RENG - PATHIAN (Article)

                                                HC Lalramdina

          He khawvêlah hian hlimna te, lâwmna te, thlamuanna te, nihlawhna te leh malsâwmna tam tak kan dawng a, Pathian hnên ațangin chutiang chu kan beisei țhîn. Mahse, he kan hringnun dam chhûng hian harsatna te, lungngaihna te, țahna te, vânduaina te pawh kan tawh tûr a ni a, chu chu ringtu kan nih avângin Pathianin kan tawrh a phal lo bîk lova, chûng zawng zawng kan tawrh lai pawha Amah hre reng tûra a din leh a siam kan ni.

          Mihring kan nih chhûngin a dam reng theih loh va, a lâwm reng theih hek loh. Hlimna tûr emaw kan tihte hi min tilungngaitu an ni thei a. Kan lâwmna tûr emaw kan tihte hi kan lungngaihna min thlentu a ni fo țhîn. Buaina leh harsatna tâwk ngai lo tunge awm? A châng phei chuan kan harsatna leh kan rilrû hreawmna te min hriatthiampui thei an awm lo niin ka hre hial thei a. Mahse, kan rilru veizâwng hre thiam thei, tu emaw chu a awm a ni - Pathian ngei chu.

          Kan mihringpuite chuan chhûngrila kan rilru veizâwng leh kan lungngaihna te chu min hriatthiampui vek kher lo thei a. Mahse, Pathian chuan kan thinlung a hria a, min ngaihsak hle a ni. Ṭawngṭaia a hnêna thinlung kan leih buakna chuan kan rit phurh a tizâng sawt thei a. Bible chuan, "Anin a ngaihsak țhîn che u avângin in manganna zawng zawng ama chungah nghat vek rawh u," (1 Petera 5:7) tiin min hrilh a ni.

          Tu emaw chu, thil eng emaw avângin a lungngai thei a, mi dang erawh chuan buaina dang daih an nei thei. Eng pawh lo ni ta se, Pathian ṭihtute tân an rit phurh chu mahni chauhva phurh a ngai lo. Ṭawngṭaina ngaithlatu chuan, amah chibai bûktute chu a huho mai ni lovin, a mi mal tak pawhin a ngaihtuah ang tih a rinawm êm êm a ni.

          Pathian hian mihringte dinhmun hi a hre hneh hle a. Kan harsatnate ching fel tûr hian Pathianin hma a lâk dâwn leh dâwn loh kan ngaihtuah ngai em? Keini misualte mahin kan hmangaihte ṭanpui duhna thinlung kan neih lai hian, Pathian phei chuan a thil siam, mihringte chu ṭanpui a duh ngei dâwn lâwm ni?

          Vânduaina vâwrtâwp lo thlengin, beidawnna zân thimin min hual vêl mahse, nui ri luahlân thei țap thâwmin min hnungkhirhin, chauh châng ni te awm țhin mah sela, chauvin zâm mai lo la, i phurrit chhâwktu i nei tih hriain Pathian hnaih țhîn ang che. Kan Pa vâna mi thlamuan theih loh khawpa nasa harsatna a awm si lo va.

          Manganna thla khâwng ri a nat luat châng te, mahni inkhawngaiha kan kûn tlawk tlawk châng te, khawharnain thlipui ang maia min nuai châng te leh lungngaihna, hreawmna leh harsatna vâwrtâwp kan tawh lai pawhin, Amah chu kan hnaih reng tûr a ni a, Ani chu min țanpui tûrin englai pawhin a inpeih reng a ni. Pathian chu kan inhumhimna leh kan chakna, mangan laia țanpui vartu hnai reng a ni si a.

                         HLAWNCHHING