VÂNAH KAN ROTE I KHÂWL KHÂWM ZÂWK ANG U (Article/Sermon)
HC Lalramdina
Bible-ah, Pathianin leia vaivutin mihring a siam thu kan hmu a (Gen 2:7). Chungnungbera thiltihtheihna kut chhuak, a duh ang taka ama anpuia a din leh a siam niin, a nunna thaw avâng chuan mihring chu minung a lo ni ta!
Tin, heti hi a ni a, tuifinriata sangha chungah te, chunglêng sava chungah te, ran chungah te, lei chung zawng zawngah te, rannung leia bawkvâka kal zawng zawng chungah te thu nei tûra a siam (Gen 1:26) mihring, vaivut ațanga dinchhuah ve mai chuan, a siamtu thupêk (Tin, LALPA Pathian chuan mihring hnênah chuan, "Huana thing tinrêng rahte hi i duh duhin i ei thei e;
A chhia leh a țha hriatna thing rah erawh hi chu i ei tûr a ni lo: i ei chuan i ei nî la lain i thi ngei tûr a ni," - Gen 2:16 - 17) tih thupêk chu engmahlo maia ngaiin a lo bawhchhe ta a, Pathian laka ta tihhranin a lo awm ta! (Leia i kîr leh hma loh chuan i hmaia thlantui luang zawih zawihin chaw i ei tawh ang; lei ațanga lâk chhuah i ni si a: vaivut i ni a, vaivutah i kîr leh tûr a ni," - Gen 3:19) tih ânchhia (Hreawm tinrêng leh thihna) chu ama duhthu ngeiin a lo rochung ta!
(Hmeichhe hrin mihring tawh phawt chu rei lo tê dam, buainaa khat a ni - Joba 14:1) Mahse, kan mihring taksa, vaivuta din, vaivuta chang leh mai tûr atân hian kan va thawkrim țhîn si êm! (Mi zawng zawng hlobet ang an ni a, An ropuina zawng zawng pawh Hlobet par ang a ni - I Petera 1:24) tih thute hi a taka hmuh fiah a har țhîn a ni ange.
Nausên kan nihlai ațangin he khawvêla kan kan lo dam khawchhuah ve theih nân kan nu leh paten sum leh pai, tha leh zung tam tak an sêng a. (Naupang chu a kalna âwm kawngah chuan zirtir ula, a upat hun pawhin a thlah lo vang - Thufingte 22:6) tih thute hi he, kan lei taksa tân mai hian min zirtir ni ber hian a lang.
(Ngai teh, fanaute hi LALPA laka kan rochan an ni a: Rila rah hi a lawmman mi pêk a ni - Sam 127:3) Khawvâr hlutna hre hman lo khawpa buai țhîn, zân hun hahchawlhna hun pawh hahchawlhpui hman lo khawpa buai țhîn, neih thil tam tak hlutzia aia la neih bâk thil neih belh tuma ûma buai țhîn, vaivuta din, vaivuta kir leh mai tûr hian, Lalpan rochan min pêk fanaute ngaihthahin he khawvêl ro, chatuan daih lo chu thlahlelin kan va thawkrim țhîn si êm!
(Ngaizâwngtu hmuh theihna tûrin i awm dân i va uluk ve! - Jeremia 2:33) Vânglai hunin min rawn nang ching a, nulain khawvêl hmachhawn tûra a incheimâwina nâna a sên ral zawng zawng te, mipain a nihna aia ropui zâwk a duhna avânga a insênsona zawng zawng te hi a va hautak tehlul êm! (Nimahsela ka hrilh a che u, Solomona meuh pawh a ropuina zawng zawnga a inthuam khân, hêng Tûktinpar pakhat tluk pawh hian cheiin a awm lo - Matthaia 6:29) Tûktinpar pawh tluk zo lote hian damchhûng ropuina thlahlelin kan va thawkrim țhîn si êm!
Chhûngkua dinin damchhûng nite chu thlantui nêna han chhiar meuh chuan (Zîng takah in tho va, tlai takah in châwl a, Thawhrimna chaw in ei țhin hi, in tân a thlâwn mai a ni - Sam 127:2) tih chu nunin a taka a lo dai hnu meuh chuan a lo tlai zo tawh țhîn.
Aw, ka hun hi a tâwi tûrzia hrereng la:
Mihring fate zawng zawng hi i va siam engmah lo êm!
Eng mi nge thih ni hmêl hmu lova nunga,
Seol kut ațanga a nunna chhanhim tûr chu?(Sam 89:47-48) Piancham lawmnaah kan kal țhîn a, inneih lawmpui tûrin kan kal țhîn bawk a, a hlimawm țhin tehlul nên... A tâwpah chuan lusûnna hmunah kan titâwp zêl țhîn zawng a nih hi! A rei leh rei loh lam chu thuhran lo ni ta se, he kawng bâk hi chu zawh tûr dang kan la nei lova, "Vaivut i ni a, vaivutah i kîr leh tûr a ni," tih thu thlen dikna bâk hi chu thufing dang kan la nei si lo. He thu hian kan mihring nun derdêp zia min zirtir a. Amaherawhchu, kan nunna atâna hlu zâwk kan zawn chhuah thiam theih nâna zirlai hlu tak a lo ni zawk.
Lal Isuan, "Ei tûr aiin nunna a thupui zâwk lo vem ni?," (Matthaia 6:25) tiin min hrilh a. Thil inzawm tlat, țhen hran theih loh mah ni se, a hlutna erawh kan țhen hran thiam a țûl âwm e. Kan taksa hi a hlu lo a ni lova; Kan taksa hi kan 'Nunna' ai hian a hlu lo a ni zâwk. Mahse, a hlu lo zâwk Taksa tân hian a hlu zâwk Nunna hi thâpin, kan nunna hi kan taksa duhzâwng leh mamawh phuhrûk nân kan nawm kan mâka kan hmang țhîn hi chu a pawi țhîn ngawt mai.
Zirtirtu ropui ber, Lal Isua zirtirna, "Leiah sûlrûl leh tuiêkin a ei chhiatnaah, rûkrûten an reh pawha an rûknaah hian, in tân rote khâwl khâwm suh u;
Vânah, sûlrûl leh tuiêkin a ei chhiat lohnaah, rûkrûten an reh pawha an rûk hek lohnaah chuan, in tân rote khâwl khâwm zâwk rawh u" (Matthaia 6:19-20) tih thu te chu a taka nunpui ngam har țhîn mahse, Amah, Lal Isua zilhna, "Amaherawhchu, fîmkhur rawh u, chutilo chuan ei puar lutuk nên, zu ruih nên, dam chhûng khawsak ngaihtuah nên, in rilrû a khat lutuk hlauh ang a, chu mi ni chuan thang âwk angin thâwklehkhatan in chungah a lo thleng phut ang.
Chutiang tak chuan lei chung zawng zawnga awmte chungah chuan a thleng țheuh dâwn a ni" (Luka 21:34-35) tih hmangaihna âwka tal hi i zir nawn leh teh ang u. Chu chuan he kan lei taksa, vaivuta din leh vaivuta kir leh mai tûr atân hian eng ang takin nge kan inchhêk dâwn tih hi kan ngaihtuah fo atan leh kan nun kaihruaitu atân hman i tum ang u.
A tâwp berah chuan, vaivuta din mai mah ni ila, keini Krista ringtute hi chuan Amah Krista avâng chuan beisei tûr kan nei a ni. (Kan awmna leia in hi țhiat mah sela, vânah, in kuta sak loh, chatuana awm tûr, Pathian hnêna ta in nghet chu kan nei tih kan hre si a - II Korinth 5:1) Chumi beisei tûr nei kan ni hi kan va nihlawh êm!
Chuti chuan, hawh u, kan lei taksa (Vaivut maia din) tân ni lovin, kan vân taksa (Thlarau) chatuan ami tûr tan; kan lei In (Ropuina lem) tân ni lovin, kuta sak loh In (Vân khawpui) tân hian i inkhâwl khâwm zâwk ang u. "Leiah sûlrûl leh tuiêkin a ei chhiatnaah ni lovin, Vânah, sûlrûl leh tuiêkin a ei chhiat lohnaah, kan tân rote i khâwl khâwm zâwk ang u".
HLAWNCHHING
No comments:
Post a Comment