DAWN TISEI

1. MIHRING MIZIA

1. A mize dik tak i hre duh anih chuan midangin a chanchin an sawi atang ni lovin, amahin midang chanchin a sawi duh dan atangin i hre fuh zawk ang.

2. Mi fing chuan a rilru a thlak thin a, mi â chuan a thlak ngailo.

3. Chapona hi thatchhiat bul intanna a ni.

4. Hmelma hlui leh thian thar chu ring ngai suh.

5. Mifingte chuan midang tihsual atangin an zir a, mi â te erawh chuan anmahni tihsual atangin.

6. Thinrimna tam zawk hi mahni dik lohna pawm duh loh vanga lo awm a ni.

7. Hmelma neilo mi chu thian tlemte neitu a ni.

8. I thiamna nilovin, i thil thlir dan kha i hlawhtlinna hriltu ber chu a ni.

9. Kutdawh chu pawisa-ah a tlachhe ngailo.

10. Khawvela thil tha ber chu mawl(simple) hi ani a, a dawttu chu inngaihtlawmna hi a ni.

11. Inrintawnna awm lovin, inbiakremna a siam theih loh.

12. Mahni hlawkna tur chauhva thil ti thintu chuan thil tha egmah a ti lo a ni.

13. Bank Account a sum tam tam neih aiin, mi thinlung a kan theih tawk thatnaa account hawn hian hlimna min thlen tam zawk.

14. Midang chunga rilru thalo put tlatna hi kan nun chhungril ti bankrupt  tu ber a ni.

15. Duhamna ringawt thinlung a neih hi lungngaihna  leh tahna min thlen tu ber a ni fo.

16. Mahni tih theih tawk pawh tih tum lo leh midang tanpui tum ngai lo mi chuan mi thinlung ah account  a nei ngai lo.

17. Thian ten an hrechiang tulh tulh che a, an hlau tulh tulh che anih chuan chu aia loan lak hlauhawm a awm lo.

2. BER

1. Ni tha ber chu vawiin hi a ni.

2. Thilpek tha ber chu ngaihdamna hi a ni.

3. Ngaihtuahna tenawm ber chu itsikna hi a ni.

4. Buaina siam nasa tu ber chu tawng tam lutuk na hi a ni.

5. Thil awlsam ber leh atthlak ber chu mi dik lohna sawi chhuah a ni.

6. Mi pakhat ah tha tinreng zawng suh. I hmu ngai lovang.

7. I dam lai leh i thih hnu piahlam thlenga i tana pawimawh ber chu Isua Krista a ni.

3. MIHRING VS PATHIAN

1. Mihring chuan a kalsan fo ang che;
          Pathian chuan alo nghak reng ang che.

2. Mihring chuan i rin a pha ngai lovang;
          Pathian chuan i rin phak bak a tih sak fo vang che.

3. Mihring chuan a tina fo vang che;
          Pathian chuan a tidam leh ang che.

4. Mihring chuan a sawisel fo vang che;
          Pathian chuan a siam tha leh ang che.

5. Mihring chu rinhlelhawm ber a ni a;
          Pathian chu rinawm ber a ni.

6. Mihring chu i nat phah fo vang;
          Pathian chu i dampui fo vang.

7. Mihring chu a danglam fo vang;
          Isua Krista chu niminah nen, vawiinah nen, kumkhua pawhin a pangngaiin a awm fo vang. (Heb 13:8).

4. NUN

1. Nun hi Boxing nen a inang hle mai;
          I tluk avang ngawtin hnehin i awm lova. I tluk hnua i thawh leh loh avang zawkin hnehin i awm thin a ni.

2. Nunah hian a nilo zawkin zirlai dik min zirtir fo;
          Chu chu Nun Tawnhriat a ni.

3. Thil reng reng hian hlut zual hun tum hnih an nei;
1) Kan neih theih hma leh.
2) Kan chân hnuin.

4. Khawvela hmun hlu ber pahnih te chu:
1) Tuemaw ngaihtuahna chhungril bera awm reng leh
2) Mi tawngtainaa chham tel nih hi.

5. 'HLAUHNA' tih hian awmzia pahnih a nei a;
1) Engkim theihnghilh a tlanchhiat.
2) Engkim hmachhawna hlim.
Duhthlanna chu kan ta a ni e.

6. 'Intihveina'  hi inlaichinna zawng zawng tihchhiatna hmanrua a ni.
Chutianga buai tawk lek ni lo la, bansan daih rawh.

7. Min hliamtute kan ngaihdam theih hma chu, 'LUAH MAN CHAWILO' in kan thinlungah hmun an luah reng mai a ni.

8. Pawisa ip ruak hian Nundan chi hrang hrang tam tak min zirtir a. Mahse ip khat tlat chuan kawng chhiarsen loh in min tichhe thung.

9. Rinngamna hi lehkha ban ang mai a ni; Khawh anih tawh pawhin a bel nawn theih a, mahse a tira bel angin a nghet tha tawh ngailo.

10. Inhnialna hmangin mi rilru hneh tum suh. I seih hmangin hneh zawk ang che. A chhan chu i hnialpuite khan i ngawih rengna kha an tuar zo lo a ni.

11. 'HRIATRENGNA' hi thil hlu tak a ni reng ang. A chang chuan kan lungngaih nite kha kan nuihpui leh a, a chang erawh chuan kan hlimlai nite kan tahpui leh bawk a. Chu chu NUN a ni.

5. THIL PATHUM

1. Thil pathum zah turte :-
1) Kum upa
2) Sakhua
3) Dan

2. Thil pathum ngainat turte :-
1) Rinawmna
2) Thianghlimna
3) Taihmakna

3. Thil pathum ngaisan turte :- 
1) Hawihhawmna
2) Ngilneihna
3) Duhsakna

4. Thil pathum neih tum turte :-
1) Huaisenna
2) Hlimna
3) Lungawina

5. Thil pathum vawn tlat turte :-
1) Thutiam
2) Inthian thatna
3) Ngainatawmna

6. Thil pathum thuhnuaia dah turte :-
1) Lei
2) Thinrimna
3) Thlemna

7. Thil pathum ven tlat turte :- 1) Thusawi
2) Awmdan
3) Thiltih

8. Thil pathum dan tlat turte :-
1) Thatchhiatna
2) Dawt thu
3) Mi sawichhiat.

6. TLAI FO HI

1. Tlai fo hi chu chhungkaw inkaihhruai dan thalo (disfunction) zia pakhat a ni.

2. Mi tuanmuang apiang an tlai thin chuang lova, mi tuanrang fe fe tlai reng a awm theih tho.

3. Tlai bik fo hi chu midang/thawhpui te zah loh vang a ni thei.

4. Tih loh/ Kal loh hreh si, kal peih bawk silo-te hi an tlai thin.

5. Tlai duh hauh lo hi chu an tlai lo mai thin niin a lang, tlai pawisa lo chu an tlai zel mai.

6. Tan hun sawn tlai pawh hian a tlaia te chu an tlai reng tho thin.

7. Tlai lo turin hmanhmawh phili kher a tul chuang lova, mi hmanhmawh phili chungte zingah tlai an awm tho. Hun manages thiam a tul.

8. Chhuanlam chu a awm zel, mi sincere an tlai reng ngai lo.

9. Tlai reng mai te hi mi rilru hrisel lo an ni thei bawk.

10. Tlai fo mai te hi planning felfai tak nei lemlo te zingah an chhiar tel theih tho awm e.

          Chuvang chuan, thil engkim tihna apianga tlai nih i tum lo ang u. Tlai loh hi hmasawn na kawng te zinga rahbi pawimawh tak pakhat a ni tih hi i hre reng ang u.

7. LALPA FAK

1. Lalpa hi fak i duh chuan fak tuma tan lak vak aiin i tana a thiltih ropuite hi ngaihtuah mai la,  fak loh har i ti viau zawk ngei ang.

2. Thil pek lama tan lak i duh chuan pe tura in san phek viau lam aiin a thlawn ngawta a pek hnem tawh zia che hi ngaihtuah la, a thil pek ropui tak avang hian Lalpa chu enge ka pek ve ang tihna thinlung i pu thei zawk ang.

3. Inpekna tak tak nena Lalpa hnung zui i duh chuan inpe turin insawr bing vak lam aiin i tana a inpekna hlut zia hi chhut la,  ngaihtuah la, chu chuan atana inpe turin i pheikhai a ti zang ngei ang.

4. Rinna chu thiltih tel lovin thi a ni tih hre mahla nung taka thil ti tur chuan rinnaa awm a, rin phawt a tul tih hi theihnghilh miah suh.

5. I tello pawhin Lalpa hian a ropuina a hloh chuang lova,  nimahsela, a ropui puan nan a hmang duh thung che.

6. Pathian thu zawm hi a har i ti viau anih chuan i zawm tur thu chu a hlut zia ila hmu fiah tawk lo a, a thu ni lo duh zawng i ngah em vang a ni ngei ang.

8. SUH

1. Pathian ring duh miah suh;
          Rin tur dang tha tawk tak i hriat chuan.

2. Vanrama kal duh lem suh;
          Kalna tur tha zawk i hriat phawt chuan.

3. Pathian hnenah thilpek pe duh lêm suh;
          Pathian hnen atanga engmah i dawn loh chuan.

4. I mihringpuite tumah ngaihsak suh;
          Engpawh tawk la, tumah i mamawh dawn loh chuan.

5. Khawvel thlahlel em em rawh;
          Nang leh khawvel in kumhlun dawn phawt chuan.

9. TAWNGTAI LEH RAWH

1. Pathian thu te, tawngtai te leh Kohhrana inpawlkhawmna neihte i châkna alo chuai a, i thlarau nun alo chauh chuan TAWNGTAI LEH RAWH.

2. Pathian thu Bible chhiar i thatchhiat a, Pathian aw i hnenah a rawn thlen khât hle tawh chuan TAWNGTAI LEH RAWH.

3. Inngaihtlawmna leh misual nih inhriatna i tlakchham hunin TAWNGTAI LEH RAWH.

4. Mi mangang leh tlachhamte pawh hmangaihna i neih tawh miah loh chuan TAWNGTAI LEH RAWH.

5. I thinlungah midangte tawngtai sak tur i dawng tawh ngai lo anih chuan TAWNGTAI LEH RAWH.

10. HAHTHLAK VS HAHDAM

1. Inti fel tak bula awm chu a hahthlak a;
          Mi fel bula awm chu a hahdam thlak.

2. Inti hausa bula awm a hrehawm a;
          Hausa bula awm chu a nuam.

3. Inti lehkhathiam bula awmin min ti â a;
          Lehkhathiam bula awm chuan min tifing.

4. Inti changkang bula awm a hahthlak a;
          Changkang bula awm chu a nuam.

5. Inti thlarau mi bula awm chu a hrehawm a;
          Thlarau mi bula awm chu a thlamuan thlak.

6. Inti fing tak bula awmin min ti mawl a;
          Mi fing bula awm chuan min ti fing sawt.

11. I NUN I HMAN MEK AH KHAN

1. Famkim tum suh, thei an la awm lo. Mitha tak nih tum la, that chhuah zel tum zawk rawh. Chutichuan, midang mitah chuan mi famkim i ni thei mahna.

2. Hmel hlim sang pu reng mi tluka ngainatawm leh duhawm an awmlo. Hmelthatna hi duhawmna a ni hauh lova, duhawmna chu hmel atanga thatna lo lang chhuak zawk hi a ni.

3. Hmangaihna mit hi a del hauh lo. Ani chuan mit ni lovin thinlungin a thlir lehnghal. Enlenna -a en ang vel a ni a, tlinlohna leh thatlohna chu chiang takin a hmu a, a haider mai a ni. Hmangaihna panna hmun apiangah tlinlohna a chhah thin a sin.

4. Thu tha tak tak  sawitute hian an zawm vek bik kher lova, an nunah hmuh tum kher lovin an thusawi tha chu zawm tum bik mai rawh, a finthlak zawk.

5. Hmangaihna hi hmangaih lêt loh pawh inhuamna a ni asin.

6. Mahni inngaihhlut luatna hi mi mâwl kan nihzia inhriatna hliah khuh tu a ni.

7. Ngaihdamna hi i mihringpui chunga i thiltih theih hlu tak a hnua nangmah ngeiin ila tangkai pui leh tur a ni.

8. I din theih hmain tlan tum ngawt suh; Thlawh zirtu chuan din, kal leh tlan a zir hmasa phawt tur a ni.

9. Nuih sêih hian man a nei lova, thil tam tak a siam thei si. A petuten an retheih phah chuan loh laiin a dawngtuten an hausak phah si.
Reilote chhunga pek chhuah pawh ni se khuarei thlenga hriatreng a ni lawi si.

12. HRINGNUNAH HIAN

1. Nihnain min pek chawp zahawmna aiin hlawhchhuah zahawmna a hlu zawk.

2. Zahawmna hi eng dinhmun atang pawhin a hlawhchhuah theih.

3. Hausakna dik chu neih tam ni lovin, neih saa lungawi hi a ni.

4. Mi neih awt thinte hian mahni leh mahni an inhmusit a ni.

5. Incheina hi pawimawh ber mahse nihna leh dinhmun erawh min pe lo.

6. Mahnia ngaihdan nghet nei lote hi lehkhachhia ang an ni.

7. Mi lei i bat chuan an bawihah i insiam tihna a ni.

8. Hausa tlak lo leh retheih inhmeh lo a awm theih.

9. Thawkrim hmasa peih lo chuan nawmsak a phu lo.

10. Thlifim hlutna hre chiangtu ber chu thlantui a ni.

11. Duh apiang neih theih ai chuan neih apiang duh theih a hlu zawk.
94. Khawvel i chen lai chuan hlim takin i nui ani mai thei e, khawvelin i taksa a chen let hunah chuan i mittui ala far ang.

13. I VANGLAI HIAN

1. Ruihhlo i hlimpui a, i nuihpui emaw i tih khan, chu ruihhlo vek chuan i taksa a chen hunah chuan inchhirna mittui i biangah alo luang tawh ang.

2. Lalpa mite hmusita khawvel mite i zui anih chuan, i mangan, harsat niah, khawvel miten an tlansan ang chea, Lalpa mite i pan tawh thung ang.

3. I vanglai hian, i siamtu hre lova i tlansan lui anih chuan, manganna khur atangin Lalpa i tih hun ala
thleng tho tho ang.

4. I chak that lai, i vanglai hi, khawvel tan i in tlakral anih chuan i lei taksa alo chauh hunah, lungngaihna mittuiin a bual ang che. Lalpa ila mamawh tho tho ang.

5. Khawvel tlansana Lalpa tana ke i pen ni apiangah, hlimna avangin i bianga mittui luang chu Lalpan a hruk hul sak ang che.
---------------------------------------------------------------

1. A tawp thleng peihlo tan bul tan loh a finthlak zawk.

2. Fakna i lawm viau chuan sawisel pawh i haw viau ang.

3. Chapona tlangsanga kan din lai aiin tlawmna ruama kan thingthit lai hian finna kan hnaih zawk.

4. Hausakna tehfung chhe zawk chu sum a ni a, a tha zawk chu lungawina.

5. Intluktlanna tak tak chu thlanmualah ani a awm ni.

6. A bul tan that a tha e, amaherawhchu zawh that a tha zawk.

7. An laka beisei tur awmlo te kan dawnsawn dan hian kan mize dik tak a tarlang thin.

8. Beidawnna hi min tiphurtu atan hman hlauh tur a ni, min tihnualtu atan ni lovin.

9. Chetsual palhna a thlen hnu a thurawn inpek chu thih tawh hnua damdawi inpek ang a ni.

10. Rinhlelhna nei ngailo mihring chuan thutak a pawh ngai lovang.

11. Kan hmangaihte ai chuan min hmangaihtute hi kan tan an hlu zawk.

12. I thinlung hliamtu chu theihnghilh la, i nih ang ang a pawmtu che chu vuan tlat ang che.

13. Thu tiam mai mai suh, mi'n an ringlo hlauh dah ang che. I ti thei ngei dawn tih i hriat chauhin thu tiam thin ang che.

14. I lungngaih laiin Pathian ka lamah a tanglo ami tiin ngaihtuah ngai suh, Pathian lamah ka tang em tih ngaihtuah zawk rawh.

15. Beiseina neilo mihring chu ala boral ang, beiseina neitu erawh ala ropui ang.

16. I hlim leh lawmin i siamtu Pathian hre reng la, i lungngaih laiin amah au thin ang che.

17. I dik loh chuan i dik lohna pawm la, i lo dik anih chuan ngawi tlat rawh.

18. Taimak hi vanneih na bul a ni.

19. Mahni tih tur tha taka tih hi ropuina a ni.

20. Hausakna in thian a siam a, retheihna erawh chuan a hnawt bo thung.

21. Retheihna anga zirna tha a awm lo.

22. Hmangaihte inkara thil chiang tak mai pakhat awm chu intheihnghilh theih lohna hi a ni.

23. Hawtu neilo mihring a awm theih loh.

24. Fate zilhhauna tha ber chu hmangaihna lan tira, thinrim inthup chunga zilhhau hi a ni.

25. Thu zeprukpui turin tumah sawm suh, ani pawh kha thu zeprukpui tura mi sawm ching ve tho anih kha hre rawh.

26. Thinrim hmel i put fo chuan miten an hmu hmeltha lovang che.

27. Thinlung sak tinem tur chuan tawngkam thlum hi a tangkai ber.

28. Tawngkam hi mihring mize zawnawlna a ni.

29. Tawngkam tha hi hnehna kawng khat a ni a, ngawih hi hnehna kawng dang a ni.

30. Thatna chi khat tal nei lova sual famkim a theih loh a, sualna chi khat tal nei lova that famkim pawh a theih bawk hek lo.

31. Ral lakah leh hmelma hmaa thin phu ngai lo mi pawh hi, hmangaihte hnenah chuan a phu der der thin.

32. Rinawm hlut zia i hriat duh chuan vawikhat rinawm lovin awm la i hre maiang.

33. Phal vak lo chung chuan pe suh la, phur vak lo chung chuan thu intiam suh.

34. Pa tha ni tur chuan bengngawng anga awm a ngai a, nu tha ni tur chuan mitdel anga awm a ngai thung.

35. Nangmah leh a nu leh pa bum ngailo chauh nupui pasalah thlang ang che.

36. Nitin i sual paih la, thianghlimna belh la, hmangaihna puntir la, chanchin tha sem thin rawh.

37. Mi huaisenin hmelma a ngam a, mi tumruh a hlawhtling a, mi remhria a him thin.

38. Mi duham chu an tawngkam a thlum a, mi thinchhia chu an tawngkam a vin.

39. Lungngaihna chu naktuk atan dah tha la, vawiinah hlim takin awm rawh.

40. I thinlung hmun tha ber chu Isua pe la, a dawtah mite, a dawt lehah nangmah, tichuan Lalpaah lawmna ilo nei ang.

41. I tum anga thil a awm lohvin Lalpa tum dan a ni tih hre thin ang che.

42. I kuta awmlo thilte avangin in ngaihtuah buai lo la, i kuta i neih thil kha a hlu thei ang bera hman tum zawk rawh.
Buaina leh harsatna i tawh aiin malsawmnah i dawn chhiar zawk la.

43. I hloh aiin i hlawkna hmu lian thiam ang che.

44. Sum leh pai hausakna aiin i taksa hriselna a hlu tih hrethiam ang che.

45. Tanpui ngai tanpui uar la tanpui nih erawh hmanhmawh suh.

46.Mahni inngaih hniamna hi hmasawnna hmelma lian tak a ni.

47. Hlawhtlinna hi tan lakna rah a ni a, hlawhchhamna erawh nuamtawlna rah a ni.

48. Ruahmanna chu tha hle mahse thawhrimna in a zui si loh chuan mumang aiin a ropui chuang lo.

49. Nung turin ei la, ei tur ringawt chuan nung suh.

50. Tumah mahni thlan tuiah an tlahlum ngailo, bei nasa rawh.

51. Mi thalote kawppui ai chuan mahnia awm a tha zawk.

52. Minute khat thinrimin damchhung daih pawi a thlen thei.

53. Thil tha tih hi a thamral mai lova thil tha lo tih pawh a thamral mai ngai lo.

54. Chapona hian sual dang a cho chhuak thin.

55. Thil neih a zawnga hlu ber chu mahni inthunun theihna hi a ni.

56. Phuba lak dan tha ber chu theihnghilh hi a ni.

57. Mihring chu a thih dan aiin a nun dan a pawimawh zawk.

58. Hlimna zawng suh. Dik takin nung la, hlimnain a zawng hmu mai ang che.

59. Engkima hlawk vek i tum chuan, i rilru a piangsual hle tawh a ni.

60. An laka beisei tur awm lote i dawnsawn danin i mize dik tak a tar lang.

61. Vanduaina tam zawk hi hun hman that loh rah a ni.

62. Mi lungawilo chuan midang hnenah lungawina a pe thei lo.

63. Fate tan i pek theih hlu ber chu i hun kha a ni.

64. Beidawng suh, nangmah siamtu che chuan a thlahthlam dawn si lo che a.