WhatsApp chu smartphone internet thahrui inpawh tawnna hmanraw chi khat, phone number leh internet hmanga tunlai inbiakpawhna hmanraw lar ber a ni tih kan hre theuh awm e.
Kumin Jan 2015 ah mi mtd 700-in an hmang a, Apr-ah mtd 800-ah a pung a. A lar ber WhatsApp bakah, wechat (mtd 488), Viber (mtd 209) te pawhin hriat an hlawh hle a, smartphone chauhlo ah pawh hman theih na tur phone siam pawh a awm tawh a ni.
A HMUCHHUAKTUTE CHANCHIN
Yahoo-a computer engineer, Brian Acton leh Jan Koum te chuan Sept 2007 -ah an hna bansan in, Facebook-ah hna an dil hlawhchham a. Koum-a phei chu Yahoo-a a thawh laia a sum khawl $nuai 4 ringin a tei hawi ta a, 2009 Jan-ah Koum-a chuan a iPhone lei that atangin, iPhone App store-a download theih applications (apps) chu a lar chho hle tih a hria a, "Internet leh phone number tangkawp a, internet man chauh chawia thil thawn/dawn theihna apps mawl leh awlsam tak siam ta ila..." tiin a ngaihtuah a. A thian Brian Acton-a nen, thian dang Alex Fishman-a an sawi phur pui ta bawk a. Mahse iPhone developer tel lova an tih theih loh avangin Fishman-a chuan Russian Igor Solomenikov chu thawhpui ah a sawm a, an thawk ho ta a ni.
WHATSAPP HMING TOBUL
'Whatsapp' tih hi Koum-a ngaihtuah chhuah a ni a. "What's Up?" lamrik chu "Engtizia nge ni ta? / Eng thil nge thleng?" tihna a ni a. A hawrawp thlakin "Eng (Software) app (Application) nge?" tihna a ni thei tho a. Tunhma in (y) (thumbsup) hi khawvel ram tam tak ah zaizir a "A tha ka ti e" tih lantirna a ni lemlo. Mahse Facebook-in an hman tlat avang leh, FB hmangtu khawvel mihring 20.57% (ftd 7 zinga 1.44) kan lo awm tak avangin khawvel pumah (y) kan lo hmang ta a ni. Chutiang bawkin, mihring vaibelchhetak 8-in WhatsApp kan hman tak avangin, What's up? awmzia chu "WhatsApp" (Eng Application nge nita....!? tih alo ni ta a ni.
MAKTADUAI 800 SULHNU
2009-a bul an tan lai chuan an thil siam chu a chhe (crash) ngun hle mai a, Koum-a chu a beidawng titih tawh a. Mahse, Acton-a chuan, "Hawh, beidawn ngawt ai chuan thla hnih khat lek i nghak leh ang", a ti a, hlawhtlin hun an nghak chhuak ta a, 2009 Jun-ah a thawntu in a thil thawn an en leh en loh hriat theihna dah an rawt angin an dah leh ta a ni. Hmangtu mi nuai 2.5 an rawn tling ta thut mai. 2009 -ah Acton-a chuan mi panga hnenah Cheng nuai 150 vel theuh thawhkhawm a, tih takzet a bul tanpuiah a sawm ta a, iPhone App Store-ah Nov ah an hlangkai a. A hnu thla hnih ah Blackberry milin an siam leh a. August 2010 atangin smartphone tam zawk Android smartphone milin an siam leh ta a ni. Kum 3 chhungin hmangtu mtd 200 an nei a. A tira thawktu mi panga (5) kha mi 50 lai an lo ni ta a ni.
2015 Jan-ah phei chuan WhatsApp kaltlanga thil thawn chhuah hi nikhatah nitin in thluklehdingawn 30 chuang an lo ni ta hial a ni.
WHATSAPP NEITU FACEBOOK
Facebook chuan inpawhna atan internet chauh a hmang a, WhatsApp chuan internet leh smartphone a hmang kawp a, 2014 kum tirah WhatsApp hlut zawng chu $tld 1.5 vel nia chhut a ni a. A len chhoh zel chuan reiloteah Facebook a khing phak dawn tih hriain Facebook chuan 2014 Feb ni 19-ah $ tld 19 hu vel in a lei a ni. Facebook dawr lian bulah an zawrh ang zuar WhatsApp dawr tereuhte an rawn inhawng thar a. An lunin an thang chak nek mai a, dawrtê chuan dawrlian chu a rawn dip dawn tih Facebook chuan an hria a. Dan dik taka dawr hawngtu chu an hnawt bo ngawt thei silo va, WhatsApp dawr hlut zawng chu cheng khat leh duli lek ala nih laiin, an hralh loh theih lohna tur khawpa tam, cheng 19-in WhatsApp dawr chu a signboard chawpin a kharsak tawp mai tihna a nih chu...! Social Media Company inleina sang ber a la ni.
Facebook ngei vanga WhatsApp hmangtu mi tam takin WhatsApp chhuahsanin hmanraw dang an hman phah a. WhatsApp anpui Telegram chuan hmangtu mtd 8 an neih belh a. Iran Sawrkar chuan Facebook neitu Mark Zuckerberg-a chu "American Zionist a ni" an tih avangin WhatsApp chu an rama hman an khap phah bawk.
FAKNA AWM LO
Social Media hmangtute 'pindan kawngka biang' a fakna lo intar ve sek thin hian, mimal fianrial zalenna a dipa hriatna a nasa zel a. Fakna thupa search engine mawl tak anga langa Google-in an siam hi hmangtu tan a nelawm a, Google chuan an hlawhtlinpui a ni. Hei hi entawn in WhatsApp hian, fakna aiah hman man khawn a tum a ni.
Internet -a kan phone number, mail, address leh kan nihna dang kan tarlante hi, sumdawngten min chhui letna remchang ah an lo hmang a. Ralchah dawra pheikhawk kan zawn chuan lei lo mah ila, a zawngtu chu min rawn chhinchhiah zui a, kan ' pindan kawngka biang' ah pheikhawk lem mit la deuh deuh an rawn tar zui sek tawh mai thin. Jan Koum-a hian, Yahoo-a Brian-a nena an thawhho laia anni leh engineer dangte hna lian ber chu 'thang' tha zawk kam a ni ber. Chu chu mipuiin an ning hle tih hriain, "Heti lo zawnga mipui tana hna thawh dan hi awmin kan ring, WhatsApp hi kan siam ta a ni," a ti.
MAN CHAWI NGAI DAWN
Fakna a tel si loh chuan, phone bill kan pek ang hian, WhatsApp hi (la free rih mahse) a hman man kan chawi ala ngai dawn. A tel lova awm thei lova inhre khawpa kum khat vel min han tem virtir hnuah, a man (kum 1:Rs 53, kum 3:Rs 145, kum 5:Rs 202.01) chawi dan tur duan lawk vek a ni tawh. A hmangtu mipuite hian kum khat atan Rs 53 theuh pawh lo pe ta ila, kum khat ah vaibelchhe 4,240 kan thawhkhawm dawn tihna a ni...! Google Wallet etc... hmangin i pe thei a, midang pawh i peksak thei bawk. I pawisa pek hnuah phone number i thlak pawhin a buai chuang lo. Free-Account a tawp hnuah pawisa pek loh pawhin (Whatsapp anpui dangah i pem an hlauh vangin) thlahnih khat chu an nghak tho mai thei che.
India ram hi, SMS thawn man takngial pawh hautak a hria tamna ram kan ni a, chuvangin, a tlawm zawk WhatsApp hi india-ah a thang chak hle. 2014 Oct-ah khan, khawvel pum a WhatsApp hmangtu 10% (mtd 70) chu India mi kan ni.
HRIAT ATANA THATE
WhatsApp hi a mawlin hman a awlsam a, hman dan tlanglawn thenkhat tarlang ila,
Hman theih dan :-
WhatsApp hmangin smartphone handset nei apiang inzawm ngawt theih a ni lo. Internet Connection eng chi ber emaw (WiFi, 3G....etc) neih a ngai a. Phone -ah WhatsApp thuna tih nun ve ve a, contact list -ah indah tawn ve ve hnua inzawn chhuah ngai a ni.
Information :-
Thil i thawn chhuah in, i thil thawn tawh chu han hmet vang vang la, chung lamah information (i) enna a lo lang ang. A dawngtu in alo en hun alo lang ang. Group-a thil i thawnin, (i) atang hian alo chhiartute i en let thei ang.
An dawng ngei em?
1) I thil thawn sirah √√ (double tick mark) a awm chuan a dawng ngei tihna a ni a.
2) I thil thawn sirah tho chuan √√ (double tick mark blue ) a pawlin a awm chuan a dawng a, a chhiar (Read) tawh tihna.
3) I thil thawn sirah √ (single tick mark) a awm chuan i thawnchhuak a, ala dawnglo tihna.
4) I thil thawn sirah • (dot) a awm chuan nangman signal i neih loh vang emaw in i thawn chhuak lo tihna.
Backup (vawng tha):-
WhatsApp hian zing dar 4-ah i thil thawn / dawnte a vawng tha zel a. I duh chuan Settings>>Chat settings>>Back up chats-ah nangmahin i back-up thei. I paih tawh neih leh i duh chuan uninstall emaw Application Clear data emaw la, install / WhatsApp setup laiin restore alo lan hunah restore hmet la, i memory/ SD card a i back-up sa chu i hmu leh thei ang. Tin, i sulhnu mamawh tawh lohte chu Archive-ah i dah thei bawk.
Privacy :-
WhatsApp hian a hranpa in password hranpa dahna a nei lova, password dah duh chuan application dang hmanga password dah a ngai a ni. WhatsApp i hawn (open) hnuhnun ber hun kha midangin lo hre ve zel lo se i duh chuan Privacy>>Last Seen>>Everyone kha thlak theih a ni. I personal info i thup duh pawhin midang info pawh i hmu theilo ang.
Block :-
Midang WhatsApp hmang ve in i WhatsApp hmang ve hmuh i duh loh chuan awlsam takin i block thei bawk.
Home Screen :-
Computer desktop a application shortcut kan dah ang hian i smartphone home screen-ah i dah thei bawk. (WhatsApp a i thian te i chat-na awmsa list ah khan i duh ber kha hmet vang vang (long press) la, "Add chat shortcut" kha hmet rawh. I phone home screen en la, a lo lang ang.
I sulhnu (History) :-
Settings>> Account>>Network Usage kha hmet la, WhatsApp i hman lai data zawng zawng, i dawn zat te, i thawn chhuah zat te, etc... MB thlengin i hmu thei ang.
Font Size :-
Settings>>Chat Settings>>Font Sizei hmu ang. Thlang mai rawh. Mit chaklo tan a lian ber 'Large' hmuh nuam tak a ni.
Call and Receive :-
WhatsApp hi version tharah chuan phone a top up man chawia kan inbiak ang khan call leh receive a theih tawh a, internet man kan chawi thung a ni. He mi hmang tur hian internet chak tha tak a ngai a ni. Mizoram internet chuan kan la zo chiah lo niin a lang.
No comments:
Post a Comment