RAMHMUL DAMDAWI

RAMHMUL DAMDAWI. (A HMANNA LEH A HMAN DAN).

ASTHMA
1. Balhla kung tuai, a zung chawpa lak a, a kung chu meiah rawh uai a, sah sawm a, a tui sawr tur. Chu chu Khawizu nen chawhpawlh in no½ in nikhatah vawi 3 tal ei tur.

2. Thingfanghma hnah ro leh Kawldai hnah daihhlim a dah ro te, Tawtawrawt par hnah ro meizial anga zuk tein thawhah a chhawk thei a ni.

Thawhah zual laia enkawl dan :-

         Hnungzang ruh bawk, nghawng bul atanga pali na thlenga kutzungpui leh kutzungchalin abawk laiah 1-2-3-4-5 thlenga hmeh thlak a, dinglam leh veilamah palina leh pathumna zawn, zangruh sir tisaah kutzungpui leh kutzungchalin hmeh bawk tur a ni. Chutiang hlir chuan 5 mins chhung tih hnuah 5 mins chawlh a tih leh thin tur ani.

AWMVEL
          Samtawkte rah rawt sawm emaw ‘Awmvel’ thingkung leh kham panga bet thin tui sawr hnawih a tha hle a ni.

AR PÛL
          Uihlo hnah chhum tui intir a tha hle a ni.

BP SANG
          Kawldai hnah a chim tawk tui leih a, darkar khat vel chhum hnuah 15ml in nikhat ah vawi 3 in tur.

BP HNIAM
          Sunhlu rah den sawm a, chaw tlem nen pawlh a, ’Dawi’ nena bilh tur a ni. Ni 3 chhung emaw a thawh hunah no ½ in zing leh tlaiah in/eitur a ni.

CHUAP
          Balhla kung den sawm tui sawr a, no te deuhin nikhatah vawi 3/4 in tur. Ni 7 chhung in tur.

CHHÛL LÂWNG
          Tâtkawng pil densawm a, a chîm tawk tuiin darkar 12 vel chiah tur a ni a, chumi hnuah sawr a, thlitfim hnuah 15ml in nikhatah vawi 3 in tur. Ni 7 chhung ei tur a ni. Tin, Teak thing pil pawh hetiang bawka sawngbawl hian a hman theih tho a ni.

CHINGCHIP SEH
          A sehtu Chingchip chu tih hlum a, a pum chhunga tui awm chu hnawih mai tur a ni. Ramhmul damdawi chu a ni chiah lo nain ka telh ve tho a ni.

HA NA
          Khuangthli hnah chhum tui in leh a hnah tui sawr seh sawm leh a tui hmuam a, a na lai chiah tir mai tur a ni.

KAL
          Perhpawng chaw (hnim chikhat) emaw hnim thuamthum a kung leh a hnah densawm a, a chîm tawka tuia chiah a sawr a, thlitfim hnuah in tur.
Dose :- 15ml in nikhatah vawi 3 ei/in tur.

KAL / ZUN KAWNG
          Khamhlo hnah a chîm tawk tuia darkar 1 vel chhum hnuah thlitfim a, no ½ atanga no 2 thlengin nikhatah vawi 3 in tur a ni.

KHAWIHLI
          Hnahchhah hnah hem uai a bel mai tur a ni.

KAIH
          Hnahchhah hnah emaw Mutih hnah tui sawr in a tha a ni.

LU NA
          Purûn sen rawt diak bekah leh kutphah chungah bel/dah a mut vang vang mai tur a ni.

MIT THÎP / THAK
          Ngiau thing hnah thuai emaw den sawm sawk sawk a, a chîm tawk tuiin darkar 12 chiah a, thlitfìm hnuah mit sil nan hman mai tur a ni.

NAU NEI HNUTE TUI NEI HAR TE TAN
          Thingfanghma hnah hnuailam thai rân vaka, hem uaia hnute hmur tel lovin hnute bu tuam tur a ni. Tin, Changkha hnah rawt sawma bel a tha bawk. Reilo te chhungin Hnute tui a awm nghal thei a ni.

PUMPUI
1. Ngiau thinghnah den sawm a, a kawi tawka tui leiha darkar khat vel chiah hnuah sawr a, thlitfim hnuah a thlum leh kha inpawlh tawkin Khawizu nen pawlh tur. 15ml in nikhatah vawi 3 chawei hmain ei tur. Tin, pumna thut ang chi ah chuan glass no ½ in ei a tha bawk a ni.

2. Chhawntual thing pil sahsawma chhum tui in tur. A tam thei ang ber in thin tur a ni.

3. Thuamriat thing pil chhum tui in pawh a tha. Mahse, BP hniam tan chuan a tha lo.

PILE
1. Hlonuar sen chi hnah rawt sawm no½ vel a daha bawnghnute a tihkhah a chawhpawlh a, a tak nen chuan zing karah ni 7 chhung in thin tur a ni.

2. Sekhupthur den sawm tui in pawh a tha a, mahse, pumpui ulcer nei tan chuan a tha lemlo.

RIL
          Fartuah hnah densawm, tuia darkar 1 vel chiah hnuah a tui thlitfim in tur.
Dose :- Glass no ½ in zing leh tlaiah in thin tur a ni.

RUH TLIAK
          Nothak hnahno Artui hel pawn var (hawng) leh dawidim kutzungpui tiat vel rawt pawlha, chu chu ruh tliak laiah puan pan deuha tuam hnan mai tur a ni.

RUL CHUK
1. A chuktu Rul tan bun a, tan bunna a hmuamhma lamin a chukna laiah chuktuaha hip tir tur.

2. Dawl kuang tan buna hip tir pawh a tha.

3. Vakep kung pil or a hnah tihsawm a, a chukna ah bel tur.

4. Tin, changel/Balhla kung tui sawr in tir a tha.

RINGWORM
          Uihlo hnah rawtsawm tui sawr inchulh mai tur a ni.

SCIATICA
          Bawnghnute 1 Litre leh tui 4 Litres chawhpawlh tur a ni a, chu chuan purunvar 150g rawtsawm puan pan deuha fun bawka, rei tak chhum tur. 1.250L thleng a kang hunah purunvar chu sawr a paih mai tur ani.
Dose: 25ml (Chaw ei fian hnih vel) in nikhatah vawi 5 ei tur.

SERH THAK (HMEICHHIA)
          Sunhlu kung pil densawm a, a chim tawk tuia chhum a, a zatve a kang thlenga chhum hnuah a tui chu thlitfim a, zing leh zan mut dawnah serh sil nan hman thin tur a ni.

THIN LIAN / MITLIAM
1. Mitthi sunhlu sahsawm a chim tawk tuia chhum a, a zatve kangin chhum tur, thlitfim hnuah 15ml in nikhat ah vawi 3 ei tur. He damdawi ei lai hian hriak leh damdawi dang ei loh tur a ni.

2. Theikelki / Theiherawt hnah chhum tui chaw ei dawn apiangin no khat in in tur.

3. Chakai hel leh Tumbu den pawlh tui in emaw a tak ei emaw chhum hmin pawhin a tha tho a ni.

4. Mutih var leh thinghmarcha thial pawlha ei emaw denpawlh hnua ei.

TONSIL / HRAWK NA
          Khuangthli hnah ro rawtsawm tuisawr thirfiante khatin zingah leh tlaiah ei/in tur a ni.

THISEN CHHUAK DANNA

1. Hnahchhah den sawm tuisawr hnawih a, tuam hnan tur ani.

2. Japan hlo emaw tlangsam tuisawr hnawih a tha.

3. Balhla/Changel kung tuisawr a tha tho bawk a ni.

TIT/KHAWMUAL KAIKUANG SEH
          Panhnah rawt sawm bel mai tur a ni. Tin, Lengser hnah ei a hnawih pawh a tha.

THINLIAN
          Uihlo chhum tui no ½ in, nikhatah vawi 3 ei a, a kung tawi te tea tan bun 100, lazai a ramkhawm belval anga suih kual, Lu chhip a khuma, a fan zauh hnua ke lama lak chhuah tur.

THA NA / NERVE THALO
          Hnim chikhat te reuh te te, Thasuih chhum tui emaw densawm tuisawra zut a tha. Tin, Tumthang hnah chhum tuia zut pawh a tha a ni.

VUNG / ULH / BILH
          Keptuam hnah hem uai emaw nuai zawra a na laia tuam hnan mai a tha. Kawng na leh ruh na tan pawh a tha a ni. Tin, a bulbawk zai buna liah zeuh zeuh hi rannung tur seh damdawi a ni bawk.

VUN THAK
          Tengtere hnah densawm tuisawr a tha.

- Ziaktu - Dr. R Vanlalkunga